Cantica Nobo pa Alaba Jehova
1 Dia 4 di october 2014 tabatin e reunion anual di Watch Tower Bible and Tract Society of Pennsylvania. Na e ocasion aki a anuncia cu tin plan pa revisa nos buki di cantica. Sin duda esey tabata un noticia emocionante. Tur esnan presente a ser recorda cu cantica di alabanza ta importante den nos adoracion.—Sal. 96:2.
2 Pero dicon tin cu revisa e buki di cantica? Tin varios motibo. Pa di prome, awor nos tin mihor comprondemento di algun siñansa di Bijbel y esey ta pone cu letra di algun cantica kisas tin cu cambia. (Prov. 4:18) Di dos, na Ingles hopi expresion den nos buki di cantica actual ta basa riba e edicion anterior di e New World Translation. Pues, mester ahusta e letranan pa cuadra cu e palabranan di e edicion revisa. Ademas, como cu lo mester cambia e buki di cantica considerablemente, a opta pa agrega algun cantica nobo tambe.
3 Afortunadamente nos no tin cu warda hopi pa cuminsa canta e canticanan nobo. Durante e siguiente lunanan lo publica algun di e canticanan nobo riba nos website, jw.org. Asina cu haya un cantica nobo lo hinc’e den e programa di Reunion di Sirbishi cu e nota “cantica nobo.”
4 Yudansa pa Siña Cantica Nobo: Siña un cantica nobo tin biaha no ta bay un, dos, tres. Pero mescos cu e salmista nos ‘no kier keda keto’; nos kier canta na reunionnan di congregacion cu henter nos curason. (Sal. 30:12) Pa bo siña canta un cantica nobo, haci lo siguiente.
Regularmente scucha e grabacion musical, cu lo bay tin riba jw.org. Mas bo scucha e melodia, mas facil bo ta cord’e.
Studia e letra y purba di siñ’e for di cabes.
Canta e cantica te ora bo por e bon.
Train e canticanan nobo durante boso Adoracion Como Famia te ora boso por canta nan di curason.
5 Durante e binidero lunanan, ora tin un cantica nobo na final di e Reunion di Sirbishi, e congregacion lo scucha e grabacion musical prome. Y despues lo canta e cantica manera nos tin custumber di haci.
6 En realidad, canta na nos reunionnan ta un ocasion hopi special ya cu e ta un manera cu nos por alaba Jehova hunto. Pesey, nos no mester crea e custumber di lanta bay for di nos asiento ora anuncia cu ta bay canta.
7 Tin un manera mas cu nos por demostra cu nos musica ta algo sagrado pa nos. Na asamblea y congreso, prome cu cada sesion cuminsa, ta toca un intermedio musical. Dos biaha pa aña rumannan for di tur skina di mundo ta biaha bay Patterson, New York, riba nan mes gasto pa graba tur musica cu nos ta uza den nos adoracion. Pues, ora e presidente di sesion pidi nos pa tuma asiento y scucha e orkesta musical, nos mester haci esey mesora. Esaki ta yuda nos dedica, esta, prepara nos curason pa e informacion cu nos lo bay haya.—Esd. 7:10.
8 Awe nos lo cera nos reunion cu un cantica nobo. A presenta e cantica aki na e reunion anual, y a compone pa conmemora e 100 aña di existencia di e Reino.
9 Sin duda, e canticanan nobo ta algun di e cosnan bon cu nos a haya for di Jehova. (Mat. 12:35a) Laga nos pone como meta pa siña e canticanan aki y canta nan di curason. Asina nos ta duna Dios e alabanza y honor cu e merece!—Sal. 147:1.