For di Nos Lectornan

Welonan Mi a caba di lesa e articulo “Hobennan Sa Puntra . . . Con Mi Por Bira Mas Cera cu Mi Welonan?” (8 di juni 2001) Pa hopi tempo mi mayornan a anima mi pa mi cera amistad cu mi welonan, pero como cu semper tawatin un rivalidad entre mi mayornan y mi welonan part’i mama, mi a sinti semper cu mi no mester papia cu nan. E articulo aki a yuda mi realisa cu ta Yehova kier pa mi tin amistad cu nan. En bes di tuma parti pa un of e otro, lo mi tuma parti pa Yehova so.

C.L.M., Merca

E articulonan tocante welonan tawata tremendo! Mi a keda masha contento cu boso a menciona pa skirbi carta. Asta algun di nos cu ta ‘mas jong’—mi tin 36 aña—ta warda tur carta of carchi cu hende manda pa nos. Ta hopi dushi pa haya algo otro fuera di resibo pa paga y post di propaganda!

M. Q., Merca

Mi kier yama boso danki pa e articulonan tocante welonan den e edicionnan di 8 di mei y 8 di juni 2001. Aunke mi wela ta biba leu for di mi, mi tin un amistad yen di amor cu ne. Ta precis manera boso a describi den e articulonan. Mi wela ta un Testigo di Yehova, y el a duna mi hopi conocemento spiritual. Tin biaha nos ta prepara hunto pa e reunionnan Cristian. Mi amor pa Yehova ta crece cada bes cu mi mira cu cuanto smak mi wela ta sirbie. E articulonan aki ta yuda mi mantene e amistad special aki. Masha masha danki!

G. M., Yugoslavia

Mi tin un pregunta. Mi welo ta hopi malo, y mi wela casi no tin placa. Con mi por bira mas pega cu nan si mi no por bai sali cu nan?

T. O., Merca

“Spierta!” ta contesta: Si bo welonan ta biba cerca, podise bo por bai bishita nan of papia cu nan na telefon de bes en cuando. Y door cu nan ta den e situacion ei, podise bo por asta haci algun rospondi pa nan. Manera e articulo a bisa, skirbi carta por ta un otro manera pa pega mas cu bo welonan. En todo caso, bo welonan sin duda lo aprecia cualkier contacto cu bo por tin cu nan.

Bon Salu Mi a haya masha hopi consuelo y animacion mes for di e serie “Bon Salu pa Tur Hende Ta Posibel?” (8 di juni 2001) Mi ta sufri di un problema psikiatrico, y den pasado mi a pensa riba suicidio. Tur dia mi ta puntra mi mes: ‘Con mi ta bai pasa door di e dia aki?’ E revista aki a corda mi riba Yehova su promesa na Revelacion 21:4 cu ta bisa cu lo E ‘seca tur lagrima di nos wowo.’

C. T., Hapon

Masha danki pa boso articulonan excelente. Siendo un docter naturista, mi ta anhela e dia ora cu lo no tin malesa mas. E ora ei lo mi por sosega di mi trabou como docter y cuminsa traha den cunucu, locual ta mi di dos trabou faborito!

B. C., Merca

Catedralnan Mi a disfruta di e articulo “Catedralnan—Monumento na Honor di Dios of Hende?” (8 di juni 2001) Pero no ta asina cu Testigonan di Yehova tambe ta traha Salon di Reino y Salon di Asamblea basta grandi?

R. B., Merca

“Spierta!” ta contesta: Nos a critica e trahamento di catedralnan no djis pasobra nan ta grandi, sino pasobra e motivacion pa traha nan hopi bes tawata loke un historiado a yama e “orguyo arogante” di lidernan religioso. Tambe e financiamento di e edificionan inmenso aki hopi bes tawata un peso masha grandi pa e parokianonan. Na contraste, Salonnan di Reino y Salonnan di Asamblea ta edificionan modera cu no ta ser traha pa elogia hende. Mas bien, nan ta sirbi como luga di adoracion. E salonnan aki ta ser financia door di contribucionnan boluntario y nan no ta pone un carga financiero irasonabel riba ningun hende.