Perfume den Transcurso di Historia
DI E CORESPONSAL DI SPIERTA! NA MEXICO
Perfume tin un historia hopi bieu. Expertonan ta kere cu hende a cuminsa traha perfume door di kima hars y lijm di palo como sencia den ceremonianan religioso. Pesei e palabra “perfume” ta bini di e palabra Latin per fumum, cu ta nifica “mediante huma.” Un di e prome registronan di perfume ta bini di Egipto. Ora nan a habri e graf di Farao Tutancamon, nan a haya mas cu 3.000 boter di perfume cu ainda tawatin un poco di nan fragancia despues di mas cu 30 siglo!
Mil cincoshen aña prome cu Era Comun, “e perfumenan mas selecto” a ser inclui den e formula cu Dios a duna pa traha e azeta santo cu sacerdote Israelita a uza pa ungi hende. (Exodo 30:23-33, NW) E Hebreonan a uza enguentenan perfuma como cosmetica y remedi, y tambe pa prepara morto pa entiero; esaki sin duda a sirbi como desinfectante y deodorante. Por ehempel, cierto mohenan a hiba specerij y azetanan perfuma na Hesus su tumba pa hunta su curpa cu ne. (Lucas 23:56; 24:1) Den un cas Israelita, nan a considera hunta pia di un huespet cu azeta perfuma, como un muestra di hospitalidad.—Lucas 7:37-46.
Segun informe, den prome siglo Roma tawata uza alrededor di 2.800 ton di olibano y 550 ton di mirra pa aña. Nan a hiba e ingredientenan aromatico ei como regalo pa e mucha Hesus. (Mateo 2:1, 11) Segun historia, na aña 54 Era Comun, e emperador Romano Nero a gasta e ekivalente di 180.000 florin pa duna un aroma dushi na un fiesta. Pipanan scondi den e comedornan di su palacio tawata spuit e huespetnan cu un nubia fini di awa perfuma. Di siglo 7 Era Comun padilanti Chinesnan a cuminsa uza perfume. Tambe nan a cuminsa uza saconan chikito cu potpuri of puiro perfuma. Durante Edad Medio, e cultura Islamico a uza perfume, specialmente e fragancia di rosa.
Durante siglo 18 e industria di perfume a bira asina bon estableci na Francia cu nan a yama e corte real di Louis XV, e corte perfuma. Hende tawata pone fragancia no riba cuero so, sino tambe riba paña, handschoen, waira y mueble.
Colonia, inventa den siglo 18, tawata ser uza den awa pa baña, tambe nan a mescl’e cu biña, com’e riba clompi di sucu como cos pa laba boca, y a uz’e como remedi den kliste y compres. Den siglo 19, hende a desaroya fragancianan sintetico. Asina, pa prome bes nan a cuminsa bende perfumenan cu no por a uza pa remedi. Awe perfumeria ta un negoshi di miles di miyones di dollar.a
[Nota]
a Den e Spierta! (na Spaño) di 8 di augustus 2000, a trata e asunto di ta alergico pa perfume.
[Plachi na pagina 31]
Egipto, boter di perfume for di e tumba di Tutancamon, siglo 14 P.E.C.
[Reconocemento]
Werner Forman/Egyptian Museum, Cairo, Egypt/Art Resource, NY
[Plachi na pagina 31]
Grecia, siglo 5 P.E.C.
[Plachi na pagina 31]
Musée du Louvre, Paris
[Plachi na pagina 31]
Francia, siglo 18 E.C.
[Reconocemento]
Avec lʹaimable autorisation du Musée de la Parfumerie Fragonard, Paris
[Plachi na pagina 31]
Boter di perfume moderno