For di Nos Lectornan

Oracion E articulo “Hobennan Sa Puntra . . . Dios Lo Tende Mi Oracionnan?” (8 di juli 2001) a fortalece mi hopi. Mi a ricibi e revista ora mi tawata drumi den hospital. Mi no por a bai Salon di Reino ni nos congreso. Mi tawata hopi tristo, y mi no por a controla mi sintimentonan. Oracion na Yehova a trankilisa mi, y mi a keda sorprendi con bon mi a sinti mi. Ta un consuelo pa sa cu Yehova lo no lubida mi nunca.

A. O., Hapon

Mi tin 18 aña di edad y mi ta un pionero regular, un predicado di tempo completo. Mi tin un par di luna ta sinti mi deprimi. Mi tawata sinti mescos cu Steve, e hoben menciona den e articulo cu a bisa cu tin bes e sa sinti cu e no mester cansa Dios cu su problemanan. Pero mi a tuma e conseho na Lucas 12:6 y 7 na pecho. El a trankilisa mi y motiva mi pa habri mi curason pa Yehova.

M. D., Nicaragua

Salu Den boso edicion di 8 di juni 2001 mi a lesa e articulo “Medicina Moderno—Con Halto E Por Yega?” Como un hende cu no a studia medicina ni ciencia, mi a haya boso splicacion y referencianan na historia di medicina hopi interesante y probechoso. Lo mi warda e edicion ei bon.

E. F., Alemania

Mal Uzo di Droga Regularmente, mi ta ricibi boso revistanan cerca un colega, y mi ta lesa nan. Pero mi a keda masha straña tocante algo cu e articulo “Mal Uzo di Droga—Tin Un Solucion!” ta duna di comprende basta cla, esta, cu tur musico di rock lo ta drogadicto. (8 di juli 2001) Tin masha hopi musico di rock cu no tin nada di aber cu droga, y cu ta tuma nan trabou na serio.

M. M., Hapon

“Spierta!” ta contesta: Nos intencion no tawata pa duna di comprende cu tur musico di rock ta uza droga. Sinembargo, ta bon conoci cu hopi musico di rock y nan fanaticonan ta uza droga durante concierto.

Tragedia Horibel Mi a kere cu ta den pelicula so cierto cosnan por a pasa. Pesei, e experencia “Enfrentando un Tragedia Horibel” a dal mi hopi duro. (8 di augustus 2001) Asina cu mi a caba di les’e mi a resa pidi Yehova sostene Jonathan, Oscar y Oscar su welonan. Experencianan asina ta anima nos pa duna lo miho di nos mes na Yehova prome cu “tempo y suerte” alcansa nos.—Eclesiastes 9:11.

E. P., Italia

Mi a keda profundamente conmovi ora mi a lesa e historia horibel di e tragedia cu a dal Theresa y su famia. Mi tin hopi gana pa su famia sa cu ami tampoco no por warda pa brasa Theresa den e mundo nobo cu Yehova a priminti.

L. T., Italia

Mi tin seis aña ta bula pipa pa bautismo. Mi no tawatin e determinacion necesario pa haci cierto cambionan. Pero e experencia di Theresa a pone mi pensa hopi. Mi a yega na e conclusion cu mi no por biba sin Yehova, y mi a habri mi curason p’e. Apesar cu loke e famia a pasa aden ta un tragedia, el a anima mi.

M. L., Republica Checo

Mi a keda straño cu un Testigo di Yehova por a bira victima di un crimen asina, pero e articulo a yuda mi realisa cu Yehova no ta proteha nos milagrosamente. Mi no sa ki dia ami mes lo por haya mi cu un tragedia. Pero e fe fuerte cu cua e famia di Theresa a enfrenta e situacion a yuda mi pa ta determina pa enfrenta cualkier prueba cu curashi.

S. O., Hapon