Tanto Tempo pa e Madura!

DI E CORESPONSAL DI SPIERTA! NA BOLIVIA

PAKICO tin bishitante ta core dos te tres ora for di ciudad di La Paz den Andes, crusa parti di e tereno bashi di Altiplano, pa yega te na un area isola cu yama Comanche? Pakico tin botanico ta bini for di tur parti di mundo pa bishita e baranca na halto aki cu ta keda manera un punta insignificante den e enorme paisahe?

E contesta ta: Pa bin mira loke hende a yega di yama e yerba di mas gigantesco y e mata di mas extraordinario di Andes—Puya raimondii. Si bo bai den fin di aña, cu un tiki suerte lo bo mira un espectaculo floral excepcional cu segun algun hende ta tuma shen aña pa desaroya.

Den un area di cientos di kilometer, ta aki so Puya raimondii ta crece. De echo, ta na un par di luga so e tipo di mata straño aki ta crece, y tur ta den e Seronan di Andes. Door cu e no tin ni troncon ni taki, botaniconan ta categoris’e como un yerba. Pero un yerba di e tamaño aki si bo no a yega di mira nunca! E enorme corona di blachi smal, yen di sumpiña ta mas halto cu cualkier hende por rek yega. Si bo wak aden lo bo nota cu e ta un trampa mortal pa parha chikito. Casi semper tin cadaver seco di parha den e espacio smal meimei di e blachinan. Nan ta drenta, kisas pa scapa di un parha yagdo, y ta dal pega den e sumpiñanan mortal.

Pero probablemente lo bo haya cu ta e flornan ta e parti mas interesante di e mata aki. Maske bo por haya hopi di e mesun tipo di mata aki den grupo, mayoria bes ta uno of dos so lo bo topa ta floria, of kisas ningun mes.

Mira e mata gigante aki floria ta un experencia emocionante di berdad. Riba su corona di blachi e tin e stengel di flor di mas largo di tur mata. Un stengel cu por yega te 10 meter di haltura; mas halto cu un edificio di tres piso! Y na dje tin miles di flor hel. E ta para su so asina, mahestuosamente, hancra den baranca, y como si fuera purbando di mishi cu shelo.

Pero lamentablemente, Puya raimondii ta den peliger di extincion. Pa un of otro motibo, hende gusta pega e mata aki na candela. No ta sigur si nan ta hacie djis pa e pret di mira un flambeu gigantesco, pa haya calor ora temperatura ta hopi abou, of pa miedo cu nan carnenan ta pega den su blachinan cu sumpiña y muri. Sinembargo, e mata aki ta keda bibo maske e kima of vries, y e ta soporta biento fuerte, solo cayente y falta di tera. Con esei ta posibel?

Puya raimondii ta forma parti di un famia grandi di rond di 2.000 especie cu aparentemente a specialisa nan mes den sobrevivi na luganan cu otro mata ta muri, esta, bromelia. Ta un tipo di bromelia so tin cu ta crece otro caminda cu no ta na e continente Americano. Mescos cu Puya raimondii, hopi di nan tin raiz cu ta sirbi principalmente pa tene nan na nan luga. Nan tin manera scama microscopico riba nan blachi pa nan absorba humedad for di aire na luga di sac’e for di suela. Ademas, ora awa cai of serena baha, e ta lek den un reserva di awa cu ta sirbi pa e mata, pero tambe pa yen di bestia chikito. Sinembargo, Puya raimondii ta e bromelia di mas grandi.

Loke ta hala atencion na e “reina di Andes” aki, manera hende a yega di yam’e, ta e tempo excepcionalmente largo cu ta tuma pa e madura y saca flor. Un botanico renombra a conta e marcanan riba blachi di un di e matanan aki cu a muri, y a calcula cu e mester tawatin 150 aña. Otronan ta bisa cu ta 70 aña so e ta biba. Hende local ta yama nan mata centenario, door cu nan ta kere cu ta tuma 100 aña pa nan cuminsa saca flor. Na aña 1986 na California, pa di prome bes un di e matanan aki cu hende mes a planta for di simiña a saca flor. E tawatin 28 aña so planta. Loke sea ta e berdad en cuanto esnan cu ta crece halto den Andes, echo ta cu nan ta tarda hopi tempo pa madura.

[Plachi na pagina 14]

Con ta posibel cu e gigante “Puya raimondii” por crece den asina tiki tera?

[Plachi na pagina 15]

E miles di flor di “Puya raimondii” ta atrae masha hopi parha

[Plachi na pagina 15]

Un “Puya raimondii” cu a sobrevivi un candela