For di Nos Lectornan

Teenager Deprimi Mi a bira masha contento ora mi a haya e serie di articulo di portada di Spierta!, “Yudansa pa Teenagernan Deprimi”! (8 di september 2001) Mi tin varios aña ta lucha cu e malesa aki. Danki pa a duna mi un man den un temporada dificil.

L. D., Francia

Mi ta un verpleegster di mucha. Hopi hende ta balota con grave y extenso depresion ta, pero boso no. Mi a bestel shen ehemplar di e revista aki. Mi tin intencion di entrega nan na tur docter di mucha y persona cu ta traha den cuido di salu mental den e area cu mi ta biba.

B. P., Merca

Mi tin varios famia cu nan a diagnostica cu depresion of trastorno bipolar. Reconociendo e cosnan aki como malesa y no como un debilidad por yuda masha pa restaura e dignidad cu hopi hende a perde. E sugerencianan cu boso a duna lo yuda nos tur mustra mas comprension y duna mas apoyo.

C. M., Canada

Asina cu mi a haya e revista aki den mi man, mi a cuminsa les’e. Mi a yora di alegria pa e echo cu boso ta aprecia hobennan asina tanto y a dedica 12 pagina na e tema. Masha, masha danki!

M. M., Austria

E articulo aki a echt yuda mi calma mi mes. Tambe el a haci mi conciente cu no ta mi so tin e malesa aki. Mi ta resa pidi Yehova cu e por duna consuelo y yudansa na tur hende cu ta sufri di depresion.

Y. T., Hapon

Mi ta bai tene un stock di e revista aki na man tur momento. E ta precis loke teenagernan tin mester, y mi ta kere cu lo e yuda hopi di nan y nan mayornan enfrenta loke boso a describi debidamente como un malesa. Probablemente lo e salba bida.

R. F., Merca

Mi a haya un consuelo ora mi a lesa cu e dolo emocional aki no ta bini di un of otro deficiencia spiritual. Un peso a kita for di mi curason y mi a yora ora mi a lesa cu Yehova “ta cerca di e hende di curason kibra.”—Salmo 34:18.

A. I., Hapon

Mi tin 16 aña, y pa añanan mi ta sufri di atakenan di depresion. E revista aki ta net loke mi mester! E articulonan a duna mi e conseho cu mi tawatin mester.

L. B., Australia

Mi tawata un teenager deprimi, y nunca mi no a conta mi mayornan ni ningun otro hende cu mi kier a mata mi curpa. Esaki tawata un eror grave. Ta importante pa busca yudansa ora bo ta deprimi. Danki pa mustra boso interes y precupacion pa hobennan.

S.G.C., Merca

Mi tawatin un tarea di scol pa skirbi un opstel tocante un problema social di mi gusto cu ta apropiado pa teenagernan. Mi a uza e serie di e portada di 8 di september 2001, “Yudansa pa Teenagernan Deprimi.” Tin hopi teenager cu depresion caminda mi ta biba. Mi a yega di uza Spierta! den pasado pa otro tareanan di scol, y a ricibi masha bon punto!

S. H., Australia

Tin biaha mi ta sinti mi hopi down y mi ta cuminsa pensa cu mi no ta bal nada. Mi tawatin berguensa di papia cu mi mayornan cristian of cu e ancianonan di congregacion tocante mi sintimentonan. Sinembargo, ora mi a lesa e frase cu ta bisa: “No ta bo falta cu bo tin e malesa aki”, mi a sinti un gran alivio! Y mi a bolbe realisa cu mi no ta e unico.

H. T., Hapon