E Punto di Bista Biblico

Oracionnan Cu Dios Ta Scucha

“[Sigui] pidi, y lo wordo duna na boso; [sigui] busca, y boso lo haya; [sigui] bati, y lo wordo habri pa boso. Pasobra ken cu pidi, ta ricibi; y esun cu busca, ta haya; y pa esun cu bati, lo wordo habri.” —LUCAS 11:9, 10.

D EMOSTRANDO pleno confiansa den e palabranan di Hesucristo cita ariba, hopi cristian ta acudi na Dios den oracion cu nan problemanan y ansiedadnan, cu e siguransa cu Dios stima nan y ta percura pa nan. Sinembargo, tin hende ta cuminsa sinti nan mes frustra segun cu nan ta warda pa Dios contesta nan oracionnan. Abo ta sinti cu bo oracionnan no ta logra nan meta? Dios ta scucha ora bo ta haci oracion?

Asta si ta parce cu Dios no ta contesta nos oracionnan, esaki no kiermen cu E no a tende nan. Bijbel ta sigura nos: “E wowonan di SEÑOR ta riba e hustonan, y su horeanan ta atento pa scucha nan oracion.” (1 Pedro 3:12) Pues Yehova Dios ta tende e oracion di hende husto, sea cu nan expres’e na bos halto of den nan curason. (Yeremias 17:10) Tambe Yehova ta examina e pensamento- y sintimentonan cu tin tras di cada oracion, sintimentonan cu kisas ni esun cu ta resa no ta comprende plenamente of no ta conciente di dje.—Romanonan 8:26, 27.

Pero pa oracionnan ta aceptabel pa Dios nan mester cumpli cu cierto rekisito. Na prome luga, nan mester ta dirigi exclusivamente na Dios, no na Hesus, ni na un “santo” ni un imagen. (Exodo 20:4, 5) Tambe mester haci oracion den nomber di e Yiu di Dios, Hesucristo. (Huan 14:6) Esaki kiermen cu Hesus ta tende nos oracion prome anto caba e ta pasa e mensahe pa Dios? No. Mas bien, door di haci oracion na Yehova den nomber di Hesus, nos ta identifica nos mes como disipel di Cristo y nos ta reconoce cu ta solamente pa motibo di su rescate nos por acerca Dios.—Hebreonan 4:14-16.

Nos mester haci oracion cu fe. Apostel Pablo a indica: “Sin fe ta imposibel pa agrada [Dios], pasobra esun cu bin serca Dios mester kere cu E ta, y cu E ta esun cu ta recompensa esnan cu ta busc’e.” (Hebreonan 11:6) Con un hende por sa si e tin e clase di fe ei? E escritor biblico Santiago ta contesta: “Ami lo mustra bo mi fe pa medio di mi obranan.” (Santiago 2:18) Si, fe ta produci accion, y e accionnan ei na nan turno ta mustra cu nos stima Dios y ta purba agrad’e.

Tambe adoradonan di Dios mester ta persistente ora nan ta haci oracion. Hesus a mustra esaki bon cla den e texto di Lucas 11:9 y 10 cita den introduccion, caminda e verbo Griego original ta indica accion continuo. Al fin y al cabo, si un persona resa djis un solo biaha tocante un asunto, esei no ta mustra cu e no ta realmente serio cu su peticion?

Loke Dios Ta Priminti

Sin importa cu cuanto frecuencia y sinseridad nos ta resa, nos ta bibando ainda den “temponan trabahoso.” (2 Timoteo 3:1) Aunke ta cierto cu Hesus a bisa cu su siguidonan lo ta felis, e no a bisa cu nan bida lo ta sin problema. (Mateo 5:3-11, Beibel na papiamentu koriente) El a bisa cu su disipelnan lo por ta felis apesar di ta yora, pasa hamber y sed of sufri persecucion.

Pa nos logra e felicidad cu Hesus a papia di dje no ta necesario pa nos tin sircunstancianan ideal. Mas bien, e felicidad ei ta un satisfaccion interno cu nos ta sinti pasobra nos ta sirbi Dios. Pues, nos por alcansa un grado di felicidad asta ora nos ta den yen di problema.—2 Corintionan 12:7-10.

Con pa Trata cu Problemanan Personal

Pues anto, ta pornada nos ta resa na Dios tocante cosnan personal, manera con pa haya un bon casa of con pa trata cu problemanan di famia, di salu of di empleo? No. Pasobra maske Dios no ta priminti di cambia e sircunstancianan di nos bida milagrosamente, lo E duna nos e sabiduria pa maneha nan cu exito. Santiago a skirbi en conexion cu prueba: “Si cualkier di boso falta sabiduria, lag’e pidi Dios, kende ta duna na tur hende generosamente y sin reproche, y esaki lo wordo duna na dje.” (Santiago 1:5) Pues mediante su spirito santo, Yehova lo guia nos. Esaki lo yuda nos comprende principionan biblico y aplica nan ora di tuma decision.

Claro cu no ta Dios su spirito ta tuma decision pa nos. Al contrario, nos mester haci esfuerso personal. Por ehempel, si nos tin un problema, nos a haci investigacion relaciona cu ne, analisa e varios aspecto- y elementonan di e situacion? Esaki lo ta un obra cu ta mustra Dios cu nos tin fe. (Santiago 2:18) Nos ta persisti pa purba soluciona nos problema door di pidi Dios su guia continuamente? (Mateo 7:7, 8, NW) Nos a examina cuidadosamente e principionan biblico cu ta aplica na e situacion? E Palabra di Dios por haci nos “cualifica y bon prepara pa haci tur sorto di bon obra.”—2 Timoteo 3:16, 17, BPK.

Aunke ta berdad cu Dios por interveni den asuntonan di hende y elimina tur nos problemanan, El a permiti nos expresa nos boluntad liber. Lamentablemente, hopi hende ta uza nan boluntad liber pa causa daño na otronan. Pesei algun problema cu nos ta haci oracion tocante dje lo por sigui te ora Dios su mundo nobo yega. (Echonan 17:30, 31) Kisas ta un situacion cu ta existi den e area caminda nos ta biba, por ehempel criminalidad of guera; of kisas nos tin cu persevera bou di dificultadnan cu opositornan ta causa. (1 Pedro 4:4) Nos tin cu reconoce cu den e mundo malbado aki, tin situacion cu lo no drecha.

No obstante, Dios stima su adoradonan y E kier yuda nan. Ora su Reino ta eherce pleno dominio riba tera, lo E elimina tur e problemanan horibel di e mundo aki. (Revelacion 21:3, 4) Tanten, nos tin cu sigui pidi pa su guia pa nos por trata cu e problemanan di bida. Si nos haci esei, nos por tin sigur cu Yehova lo cumpli cu su promesa cu tin para skirbi den Bijbel na Isaias 41:10: “No tene miedo, pasobra Mi ta cu bo; no desmaña, pasobra Mi ta bo Dios. Lo Mi fortalece bo, si, lo Mi yuda bo, si, lo Mi sostene bo cu mi man drechi di husticia.”