Un Dilema Religioso na Brasil Colonial

DI E CORESPONSAL DI SPIERTA! NA BRASIL

DIA 30 di november 1996, representantenan di e Conferencia Riba Mision Mundial y Evangelismo (organisa pa Consilio Mundial di Iglesia) a reuni na un haf na Salvador, Brasil. E sitio tawata significativo. E haf aki ta caminda den siglonan pasa nan a bende miyones di Africano como catibo. Papiando di e biahe desafortuna di e presonan ei, un pasto a bisa: “E lama aki a fango nan lagrimanan.” Riba e dia special aki di conmemoracion, hende a expresa remordimento pa loke un orado a yama cristianismo su participacion escandaloso den sclabitud. Con religion tawata envolvi den e comercio di catibo na Brasil tempo cu e pais aki tawata un colonia Portugues?

“Salba Almanan Perdi”

Na aña 1441—casi 60 aña prome cu oficialmente nan a descubri Brasil—e nabegante Portugues Antão Gonçalves a captura y transporta e prome cargamento di hendenan di tribu Africano pa Portugal. Masha tiki hende durante Edad Medio a cuestiona si principionan moral a permiti pa haci prizoneronan di guera catibo, specialmente esnan cu iglesia a cataloga como “infielnan.” Sinembargo, durante e siguiente binti añanan, nan mester a hustifica e comercio lucrativo di catibo den tempo di pas. Algun hende a pretende cu door di haci e Africanonan catibo, nan tawata “salba almanan perdi”, ya como cu nan tawata rescata e stranheronan aki for di nan forma di biba pagano.

E decreto Romanus Pontifex, cu Papa Nicolas V a saca dia 8 di januari 1455, a duna sosten oficial na e comercio di catibo cu ya caba tawata prospera. Pues, iglesia no a proteha hende contra sclabitud. Al contrario, segun e historiado Brasileño João Dornas Filho, algun di e pastonan tawata “promotornan cabesura” di sclabitud. Asina nan a pone e base pa sclabitud plama na Brasil ora cu colonistanan Portugues a establece nan mes einan.

“E Unico Opcion”

Na aña 1549, misioneronan hesuita cu a caba di yega Brasil a keda hopi molestia ora nan a descubri cu gran parti di e forsa laboral tawata consisti di catibonan captura ilegalmente. Doñonan di tereno simplemente a obliga nan bin traha den nan cunucu y plantacionnan di sucu. Na 1550, e superior hesuita Manuel de Nóbrega a skirbi: “Mayoria di e hombernan [aki] nan consenshi ta molestia nan debi na e catibonan cu nan tin.” Pero toch e doñonan di tereno a keda cu nan catibonan, apesar cu esaki a nifica cu kisas nan lo no a haya absolucion of pordon di iglesia.

Pero no a tarda cu e hesuitanan na Brasil a confronta un dilema. Tawata dificil pa nan haci obranan di caridad debi na scarsedad di placa. Un solucion tawata di cultiva e terenonan cu gobierno a duna nan y uza e ganashi di cosecha pa financia actividadnan religioso. Pero ta ken lo a bai traha den e cunucunan aki? Segun historiado Portugues Jorge Couto, “e unico opcion tawata pa uza e forsa laboral di catibo Negro. Un solucion cu a base di principionan moral a molestia nan consenshi, pero cu e Superior na Brasil a dicidi di ignora.”

E hesuitanan a duna apoyo na e creciente grupo di doño di tereno cu tawata sclama pa nan haya catibo Africano. E catibonan indjan aparentemente tawatin dificultad pa custumbra cu e trabou continuo den cunucu, y hopi bes nan a rebela of simplemente a hui bai den mondi.a Di otro banda, e Africanonan tawata traha caba den plantacionnan di sucu riba e islanan colonial di Portugal den Oceano Atlantico y a resulta masha eficas. Segun un escritor di e tempo ei, e Africanonan “nunca a hui, ni nan no tawatin ningun caminda pa hui bai.”

Pues anto, cu bendicion di e pastonan e importacion di catibo Africano a sigui aumenta. Despues Brasil tawata depende pisa di e comercio di catibo cu a crusa Oceano Atlantico. Pa aña 1768 plantashi Santa Cruz cu tawata propiedad di e hesuitanan, tawatin 1.205 catibo. E religiosonan di e orden benedictino y e carmelitanan tambe a adkiri propiedad y gran cantidad di catibo. Joaquim Nabuco, un persona di siglo 19 cu a opone sclabitud, a sclama: “E monasterionan ta yen di catibo.”

Como cu cultivacion di e tera tawata un negoshi competitivo, doñonan di catibo cu tawata traha riba tereno di iglesia hopi bes a impone un orario di trabou masha pisa. Stuart Schwartz, docente di historia, ta remarca cu asta hopi di e pastonan cu a protesta contra e abuso di catibo tawatin “masha tiki respet pa e Africanonan” y “a kere cu disiplina, castigo y trabou tawata e unico manera pa vence e catibonan su supersticion, flohera y falta di bon manera.”

“Teologia di Sclabitud”

Segun cu pastonan tawata haci esfuerso pa trece harmonia entre normanan cristian y un sistema cu tawata drei a base di abuso persistente, nan a crea un apoyo moral pa sclabitud. Y un teologo a yama esaki teologia di sclabitud. Siendo cu e barconan di catibo tawata preta y yen di malesa y nan a causa morto di un gran parti di nan cargamento humano, iglesia a insisti cu mester batisa e Africanonan prome cu nan sali rumbo pa e Mundo Nobo.b Claro cu e personanan cu nan comberti asina, masha poco bes tawata ricibi instruccion religioso prome cu nan batisa nan.—Wak e cuadro “Cristiannan Instantaneo?”

Di tur manera, e oranan largo cu e catibonan mester a traha y e bida cortico cu awor nan tawatin a nifica cu e catibonan tawatin masha tiki chens di practica nan religion nobo. Sinembargo, doctrinanan di iglesia relaciona cu “e separacion entre curpa y alma” a minimisa e problema aki. E pastonan a rasona: ‘Ta berdad cu e Africanonan tawata pena debi na sclabitud cruel, pero nan alma tawata liber. Pesei catibonan mester acepta nan humiliacion cu goso, como parti di Dios su plan pa prepara nan pa gloria cu nan lo ricibi den shelo.’

Mientrastanto, iglesia a sigui corda doñonan di catibo di nan deber moral di permiti nan catibonan bai misa, celebra dianan di fiesta religioso y casa. Sacerdotenan a critica maltrato severo, pero a la bes nan a percura pa enfatisa e peliger di ta mucho tolerante. Un sacerdote hesuita a conseha: “Uza zwiep, cadena y bui di pia, pero tur cos na su tempo y cu regla y moderacion, y lo bo mira con lihe bo ta domina crianan rebelde.”

Masha poco di nan a pensa pa uza medionan menos doloroso pa comberti e Africanonan. Mas bien, esnan cu abiertamente tawata apoya sclabitud, manera e obispo Brasileño Azeredo Coutinho, a duna e impresion cu comerciantenan di catibo tawata haci e Africanonan un fabor! Den su defensa vigoroso di sclabitud publica na aña 1796, Coutinho a puntra: “Lo tawata miho y mas apropiado si cristianismo a permiti [Africanonan] muri den paganismo y idolatria en bes di den nos religion santo?” Asina tambe e misionero hesuita António Vieira a anima e Africanonan: ‘Boso mester gradici Dios sin fin cu El a trece boso na e pais aki, caminda una bes boso haya instruccion den e fe, boso lo biba como cristian y lo salba.’

E Prijs di Sclabitud

Door di apoya sclabitud, iglesia a spera di “salba almanan perdi.” Ta un ironia cu esei simplemente a prepara e caminda pa division, pasobra e Africanonan a resisti di bandona nan custumber- y creencianan religioso. Pesei awe un cantidad grandi di Brasileño ta practica sincretismo: un religion cu ta un mescla entre catolicismo y religion di tribu Africano.

Aunke pa algun hende di e tempo ei tawata parce masha bentahoso cu iglesia a acepta sclabitud como un necesidad economico den e colonia Brasil, riba termino largo esei a resulta desastroso. E morto y sufrimento cu sclabitud a causa a lanta pregunta relaciona cu e etica di iglesia, y e preguntanan aki no por ser contesta satisfactoriamente. Den bista di un historiado, e echo cu iglesia a aproba sclabitud tawata como si fuera nan a adopta e actitud di esnan cu profeta Isaias a denuncia pasobra nan tawata “yama loke ta malo, bon, y loke ta bon, malo.”—Isaias 5:20.

Abuso di Catibo No Ta Cuadra cu Bijbel

Bijbel ta laga nos comprende bon cla cu Yehova Dios no ta aproba cu ‘hende ta eherce autoridad riba un otro hende pa su daño.’ (Eclesiastes 8:9) Por ehempel, e Lei cu Dios a duna Israel a declara cu secuestra y bende un ser humano tawata castigabel cu morto. (Exodo 21:16) Ta berdad cu den Dios su pueblo antiguo tawatin un sistema di sclabitud, pero esei no ta di compara cu e forma cruel di sclabitud cu nos a trata den e articulo aki. Si nos wak bon, e echo cu algun catibo Israelita a opta pa keda cu nan doño ora cu nan a bini na remarca pa haya libertad, ta indica bon cla cu den e pueblo di Dios nan no tawata abusa di e catibonan. (Deuteronomio 15:12-17) Pues, un hende cu ta pretende cu sclabitud den Israel ta hustifica e inhumanidad cu a tuma luga durante henter historia, ta saca e Scritura completamente for di su contexto.c

Den su Palabra, Bijbel Santo, Yehova Dios ta priminti cu pronto lo bini un fin na tur forma di sclabitud. Nos por ta masha contento cu den Dios su mundo nobo, hende lo no biba den miedo bou di control opresivo di un doño cruel. En bes di esei, “cada un di nan lo sinta bou di su palo di wendruif y bou di su palo di figo, y ningun hende lo no spanta nan.”—Mikeas 4:4.

[Nota]

[Comentario na pagina 15]

Yehova Dios Ta Priminti Cu Tur Forma di Sclabitud Lo Disparce Pronto

[Cuadro/Plachinan na pagina 13]

PA DIOS OF PA GANASHI?

Segun Fernão de Oliveira, un erudito Portugues di siglo 16, ta golosidad pa placa—y no celo pa evangelisa—a motiva e comerciantenan di catibo. Barconan for di Europa carga cu producto a cambia nan pa catibo na hafnan Africano. E catibonan aki e ora ei a ser transporta pa e continente di America caminda tawata cambia nan pa sucu, cu nan a hiba bek Europa pa bende. E ruta comercial triangular aki a produci masha hopi ganashi tanto pa e comerciantenan como pa e monarkia Portugues. Asta e pastonan a saca beneficio, pasobra nan tawata cobra un impuesto pa cada Africano cu nan a batisa prome cu barca nan pa America.

[Cuadro na pagina 14]

Cristiannan Instantaneo?

“Na principio di siglo 17, a bira un custumber pa batisa e catibonan na Africa prome cu nan salida”, Hugh Thomas a skirbi den su buki The Slave Trade (E Comercio di Catibo). “Por lo general e catibonan no a haya ningun tipo di instruccion prome cu e ceremonia aki, y hopi di nan, si no ta mayoria, nunca no a yega di tende cu ta existi un Dios cristian. Pues e bautismo tawata algo superficial.”

Profesor Thomas ta comenta cu normalmente nan tawata hiba e presonan misa, caminda un instructor di catisashi—cu por lo general tambe ta un catibo—a papia cu e catibonan den nan idioma natal tocante nan combertimento. Thomas ta agrega: “Anto e pasto tawata pasa meimei di e catibonan tur confundi, y duna cada un di nan un nomber cristian, cu mas prome el a skirbi riba un pida papel. Tambe el a sprengo salo riba lenga di e catibonan, y despues a sigui cu awa bendita. Por ultimo, lo el a bisa mediante un interprete: ‘Considera cu desde awor, boso ta yiunan di Cristo. Boso ta saliendo rumbo pa teritorio Portugues, caminda boso lo siña asuntonan di e Fe [catolico]. No pensa nunca mas riba boso luga di origen. No come cacho, ni djaca ni cabai. Keda satisfecho cu loke boso tin.’”

[Plachi na pagina 13]

Papa Nicolas V

[Reconocemento]

Culver Pictures

[Plachi na pagina 15]

Sutamento publico, pinta door di Johann Rugendas, kende tawata testigo di esaki den siglo 19

[Reconocemento pa Potret na pagina 15]

Catibonan pinta na pagina 13 y 15: De Malerische Reise in Brasilien de Johann Moritz Rugendas, cortesia da Biblioteca Mário de Andrade, São Paulo, Brasil