“Lus Perfecto”

SI BO a yega di mishi cu un bombio di lus cu tawatin un rato sendi, bo sa cu e por bira hopi cayente. E calor cu e bombio di lus ta produci ta bini di desperdicio di energia. Un bombio di lus convencional ta emiti solamente 10 porshento di su energia como lus y ta desperdicia 90 porshento como calor. Na comparacion, bich’i candela, e insecto chikito cu ta produci lus, (mira ariba, amplifica) tin un eficiencia di casi 100 porshento.

Bich’i candela ta gasta asina poco energia como calor cu e lus cu nan ta produci a ser yama “lus perfecto.” Con nan ta produci e lus aki? E bariga di un bich’i candela ta contene un substancia organico conoci como luciferina. Ora e oxigeno cu e hala den su bariga pa medio di un tubo cu yama trakea abdominal mescla cu luciferina, e ta causa un reaccion kimico cu ta emiti un briyo hel cla cu por bira te asta un berde combina cu cora.

E celnan cu ta produci e lus di e bich’i candela ta contene tambe cristal di acido urico, cu ta yuda refleha e lus cu tin den bariga di e insecto manda afo. Cientificonan ta bisa cu bich’i candela ta uza nan lus pa atrae nan pareha, y cu diferente tipo di bich’i candela ta saca diferente patronchi y ritmo.

Bo no ta di acuerdo cu e manera cu e criaturanan chikito aki ta traha ta duna alabansa na nan Creador, Yehova Dios? Si, manera e salmista a declara: “Laga tur loke tin rosea alaba SEÑOR.”—Salmo 150:6.

[Reconocemento pa Potret na pagina 31]

© Darwin Dale/Photo Researchers, Inc.