E Punto di Bista Biblico

Arkeologia Necesario pa Tin Fe?

Na 1873 e miembro di clero Ingles Samuel Manning a skirbi tocante Herusalem: “Un atraccion iresistibel ta trek peregrinonan for di tur parti di mundo pa bini aki. E murayanan kibra, e cayanan sushi y descuida, e ruinanan cu ta serca di basha den otro, tur ta obheto di un interes y respet profundo pa miyones di hende cu ningun otro sitio riba tera por lanta.”

E Tera Santo a atrae hende por lo menos for di tempo di Emperado Romano Constantino.a Pa rond di 1.500 aña, peregrinonan a bini y bai, buscando contacto religioso y personal cu e Tera Santo. Toch, pa straño cu por parce, ta te na principio di siglo 19 numa eruditonan a cuminsa compaña e peregrinonan aki, habriendo asina e epoca di arkeologia biblico; e estudio di artefacto, hende, luga y idioma di e Tera Santo di antiguedad.

Descubrimentunan arkeologico a pone cu hende a bin comprende hopi aspecto di e tempo di Bijbel miho. Tambe, hopi bes e cosnan cu arkeologia a saca na cla ta cuadra cu historia di Bijbel. Pero un conocemento asina ta necesario pa e fe cristian? Pa contesta esei, laga nos dirigi nos atencion na un sitio caminda hopi arkeologo ta explora: e stad di Herusalem y su tempel.

‘Niun Piedra Lo No Keda Riba Otro’

Riba e fecha di 11 di nisan, kalender Hudiu, den lente di aña 33 di nos era, Hesucristo, compaña pa algun di su disipelnan, a bandona e tempel den Herusalem pa ultimo biaha. Segun cu nan tawata cana bai e Sero di Oleifi, un di su disipelnan a bis’e: “Maestro, mira ki piedranan y ki edificionan grandi!”—Marco 13:1.

E Hudiunan fiel aki tawatin un amor profundo pa Dios y pa su tempel. Nan tawata orguyoso di e compleho di edificio magnifico aki y e 15 siglonan di tradicion cu esakinan a representa. Loke Hesus a contesta su disipel a shock e: “Bo ta mira e edificionan grandi aki? Ni un piedra lo no keda riba otro cu lo no wordo basha abou.”—Marco 13:2.

Awor cu e Mesias priminti a yega, con Dios por a permiti pa su propio tempel ser destrui? Ta gradualmente, cu yudansa di spirito santo, Hesus su disipelnan a bin comprende completamente ta kico e tawata kiermen. Pero kico Hesus su palabranan tawatin di aber cu arkeologia di Bijbel?

Un “Stad” Nobo

Na Pentecoste di aña 33 di nos era, e nacion Hudiu a perde su posicion di fabor dilanti Dios. (Mateo 21:43) Esaki a habri caminda pa algo mucho mas grandi—un gobierno celestial cu lo trece bendicion pa henter humanidad. (Mateo 10:7) Hesus su profecia a cumpli ora cu Herusalem y su tempel a ser destrui na 70 Era Comun. Hayasgonan arkeologico ta confirma cu esei en berdad a pasa. Sinembargo, pa e cristiannan su fe no ta importante si a haya e ruinanan di e tempel antiguo ei of laga. Nan fe ta basa riba un otro Herusalem, pero esaki ta un otro tipo di stad.

Na aña 96 di nos era, apostel Huan, cu a tende Hesus su profecia tocante e destruccion di Herusalem y su tempel y cu a biba pa mira su cumplimento, a haya e siguiente vision. “Mi a mira e stad santo, Herusalem nobo, ta baha for di shelo, for di Dios.” Un bos for di trono a bisa: “E lo biba meimei di [humanidad], y nan lo ta su pueblo, y Dios mes lo ta meimei di nan, y E lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo.”—Revelacion 21:2-4.

E “stad” aki ta consisti di cristian fiel cu lo sirbi como rei cu Cristo den shelo. Hunto nan ta forma e gobierno celestial—e Reino di Dios—cu lo goberna riba tera, treciendo e rasa humano bek na perfeccion durante e Milenio. (Mateo 6:10; 2 Pedro 3:13) E cristiannan Hudiu di prome siglo cu mester a forma parti di e grupo ei a realisa cu nada cu nan tawatin den e sistema di cosnan Hudiu no tawata comparabel cu e privilegio di reina cu Cristo den shelo.

Ora apostel Pablo a skirbi di e posicion prominente cu e tawatin den hudaismo, el a papia pa nan tur: “Tur cos cu tawata ganashi pa mi, e cosnan ei mi a considera como pierde pa causa di Cristo. Mas cu esei, mi ta considera tur cos como pierde compara cu e balor superior di conoce Cristo Hesus mi Señor.”—Filipensenan 3:7, 8.

E echo cu apostel Pablo tawatin un gran respet pa e Lei di Dios y e areglo di tempel ta indica bon cla cu su palabranan no ta nifica cu hende mester a desprecia e areglonan dibino aki.b (Echonan 21:20-24) Pablo kier a djis mustra cu e areglo cristian tawata superior cu e sistema Hudiu.

Sin duda Pablo y otro cristiannan Hudiu di prome siglo tawatin un conocemento spesifico di hopi detaye fasinante di e sistema di cosnan Hudiu. Y ya cu arkeologia ta tira lus den pasado, cristiannan por comprende awor algun di e detayenan ei. Pero, tuma nota riba kico Pablo a bisa e yoncuman Timoteo pa dirigi su atencion principalmente: “Percura pa e cosnan aki [cu tin di aber cu e congregacion cristian]; sea dedica na nan, pa bo progreso por ta bisto pa tur hende.”—1 Timoteo 4:15.

Ta bon cu arkeologia di Bijbel a yuda nos comprende miho e marconan historico di e Scritura. Pero cristiannan ta realisa cu nan fe no ta depende di hayasgonan arkeologico di hende, sino di Bijbel, e Palabra di Dios.—1 Tesalonicensenan 2:13; 2 Timoteo 3:16, 17.

[Nota]

[Plachinan na pagina 26]

Ariba: Herusalem na 1920; moneda Romano cu e Hudiunan tawata uza, aña 43 E.C.; granatapel di marfil na flor, posiblemente di e tempel di Salomon, siglo 8 P.E.C.

[[Reconocemento]

Moneda: Potret © Israel Museum, Herusalem; pa cortesia di Israel Antiquities Authority; granatapel: Pa cortesia di Israel Museum, Herusalem