E Punto di Bista Biblico

Dios Ta Ignora Nos Debilidadnan?

‘Mi no ta un malbado! Mi a haci hopi esfuerso pa stop di haci malo, pero gewoon mi ta mucho debil!’

E PALABRANAN aki ta expresa loke abo of un otro hende cu bo conoce ta sinti? Hopi hende ta conclui cu ta casi imposibel pa vence debilidadnan moral cu ta duro hancra den nan. Tin hende ta adicto na alcohol, tabaco of droga. Golosidad ta domina bida di hopi otro hende. Y tin hende ta entrega na inmoralidad sexual, pretendiendo cu nan ta iremediablemente adicto na sex.

Manera Mateo 26:41 ta indica, Hesus a expresa bondadosamente cu e tin comprension pa hende su debilidadnan.a De echo, henter Bijbel ta mustra bon cla cu Yehova Dios y Hesus ta realmente misericordioso cu hende. (Salmo 103:8, 9) Pero nos por spera cu Dios ta ignora tur nos defectonan?

Moises y David

Analisa e relato di Moises. Bijbel ta bisa: “E homber Moises tawata masha humilde, mas cu tur homber cu tawatin riba superficio di tera.” Y el a haci esfuerso pa keda cu e bon cualidad ei. (Numbernan 12:3) Segun cu e Israelitanan tawata pasa door di e desierto, nan a actua hopi bes na un manera irasonabel y a demostra falta di respet pa Dios y pa su representantenan. Durante di tur esei, Moises a busca Dios su guia humildemente.—Numbernan 16:12-14, 28-30.

Pero net ora cu e biahe largo y agotador tawata yegando su fin, Moises a perde dominio propio y a rabia dilanti henter e nacion y a desobedece Dios su instruccionnan. Dios a pordon’e. Pero el a pasa por halto di e incidente? No. El a bisa Moises cu Aron: “Pasobra boso no a kere mi . . . boso lo no hiba e asamblea aki na e tera cu mi a duna nan.” Moises lo no a drenta e Tera Priminti. Despues di a lucha 40 aña largo pa e privilegio maravioso ei, un debilidad humano serio a pon’e perde e recompensa.—Numbernan 20:7-12.

Rei David tawata un otro homber temeroso di Dios cu un debilidad. Na un ocasion el a laga pasion domin’e y a tene relacion sexual cu e esposa di un otro homber. Caba el a purba tapa esei door di laga mata e homber. (2 Samuel 11:2-27) Despues, el a repenti sinseramente di su crimennan, y Dios a pordon’e. Pero David a destrui e famia di Urias, y Yehova no a proteha David di e calamidadnan cu a sigui. Su yiu homber baby a bira hopi malo, y Yehova no a spar e mucha, apesar cu David a haci oracion na su fabor. E yiu a muri, y despues di esei a sigui un serie di tragedia den e famia di David. (2 Samuel 12:13-18; 18:33) David a paga hopi caro pa e echo cu el a laga debilidad moral domin’e.

E ehempelnan aki ta mustra cu Dios ta tene hende responsabel pa nan comportacion. Esnan cu kier sirbie mester reforsa e areanan debil di nan spiritualidad y bira miho cristian. Den prome siglo hopi persona a haci esei.

E Lucha pa Libra for di Practicanan Pecaminoso

Apostel Pablo ta ser considera como un bon ehempel di bida cristian, y esei ta na su luga. Pero bo tawata sa cu e tawatin un lucha constante contra su debilidadnan? Na un manera bibo Romanonan 7:18-25 ta describi e conflicto of ‘bataya’ aki, manera versiculo 23 ta yam’e. Pablo a lucha sin stop, pasobra e tawata sa cu pica ta persisti.—1 Corintionan 9:26, 27.

Algun miembro di e congregacion cristian di antiguo Corinto tawata hende cu anteriormente tawatin custumber di comete pica. Bijbel ta bisa cu antes nan tawata ‘fornicado, adultero, homosexual, ladron, golos pa placa, burache.’ Pero tambe e ta bisa cu nan a ser “laba.” (1 Corintionan 6:9-11) Con asina? Mediante conocemento exacto, asociacion cristian y e spirito di Dios, nan a haya e fortalesa pa stop cu nan practicanan malbado. Cu tempo, Dios a declara nan husto den nomber di Cristo. Si, Dios a pordona nan y asina a duna nan un consenshi limpi.—Echonan 2:38; 3:19.

Pablo y e cristiannan di Corinto no a haci manera cos cu nan tendencianan pecaminoso no tawata nada. Mas bien, nan a lucha contra nan y cu Dios su yudansa nan a triunfa. E adoradonan ei di prome siglo a bira bunita den sentido moral, apesar di nan ambiente y inclinacionnan imperfecto. Kico di nos?

Dios Ta Spera pa Nos Lucha Contra Nos Debilidadnan

Ora nos ta lucha contra un debilidad, esei no kiermen cu e ta ser elimina completamente. Y aunke nos no tin cu entrega na nos imperfeccion, nos no por destru’e. Imperfeccion kisas ta produci debilidadnan cu ta masha persistente, pero toch nos no mester entrega na nan. (Salmo 119:11) Dicon esaki ta asina importante?

Pasobra Dios no ta permiti nos uza imperfeccion constantemente como un excuse pa mal comportacion. (Hudas 4) Yehova kier pa hende drecha nan bida y biba segun bon normanan moral. Bijbel ta bisa: “Aborece loke ta malo.” (Romanonan 12:9) Dicon Dios ta tuma un posicion asina firme?

Un motibo ta cu ora un hende entrega na debilidad esei ta perhudica e mes. Bijbel ta bisa na Galationan 6:7: “Loke un hende sembra, esaki tambe e lo cosecha.” Hende cu ta entrega na adiccion, golosidad y inmoralidad sexual, hopi bes ta haya nan cu consecuencianan teribel den nan bida. Pero tin un motibo mas importante ainda.

Pica ta ofende Dios. E ta causa “separacion” entre nos y Yehova. (Isaias 59:2) Pesei, como cu esnan cu ta practica pica no por haya su aprobacion, Yehova ta spierta nan: “Laba boso mes, haci boso mes limpi. . . . Stop di haci maldad.”—Isaias 1:16.

Nos Creador ta amoroso y misericordioso. “[E] no kier pa ningun hende bai perdi, ma pa tur bin na repentimento.” (2 Pedro 3:9) Ora cu constantemente nos ta entrega na debilidad, nos no por haya Dios su aprobacion. Y ya cu Dios no ta ignora nos debilidadnan, nos tampoco no mester ignora nan.

[Nota]