Ondol—Un Sistema Unico pa Keinta Cas

DI UN ESCRITOR DI SPIERTA! NA REPUBLICA DI COREA

NOS ta para pafo, temblando den e winter friu di Corea. Un doño di cas ta smile y invita nos pa bin paden. Ora nos drenta, e aire ta agradabel; e ta keinta nos curpa. Sinembargo, ningun caminda nos no ta mira un sistema di calefaccion of verwarming. Nos ta kita sapato na entrada, anto ora nos pone pia riba flur, e ta cayente. Nos ta cai sinta riba e flur, pone nos mannan blou di friu riba dje, y nos ta sinti con nan ta cuminsa keinta.

Na Corea, casi tur cas tin e sistema di calefaccion di flur aki. Nan ta yam’e ondol. Con e sistema unico aki di keinta cas ta traha, y ki impacto e tawatin riba estilo di bida di Coreanonan? Prome cu nos contesta e preguntanan ei, ban wak e historia di ondol tradicional.

Historia di Calefaccion di Flur

Historia di calefaccion di flur a cuminsa for di prome cu Hesucristo a bin na tera. Hayasgonan arkeologico y registronan historico ta mustra cu kisas ta e Romanonan di antiguedad ta e promenan cu a uza un sistema di calefaccion di flur.a Entre siglo 4 y 5 di nos era, ya un sistema di calefaccion di flur tawata popular na tur parti di e peninsula Coreano, y el a haya e nomber ondol. E nomber aki ta bin di dos letter Chines cu ta nifica “canal cayente.” Cronicanan di Dinastia Tang, un registro historico Chines, ta menciona ondol den e siguiente pasashi: “Den winter [Coreanonan] tawata tene nan mes cayente door di traha canal largo y pasa candela den nan.”

Con Ondol Tradicional Ta Funciona

Tradicionalmente, e fuente di calor den e sistema ondol ta un fogon. E fogon por ta sea den cushina, of pafo contra muraya di sala. Si un cushina tawatin dos of tres fogon, por a keinta dos of tres camber banda di dje via e sistema ondol. Den un cushina Coreano di antes bo por a haya un of dos weya grandi di hero riba fogon. Pues, e mesun candela cu nan tawata cushina aros of sopi cu ne, tawata sirbi pa keinta e camber banda di cushina tambe! Eficiente, no?

Hopi bes nan tawata traha e cushina mas o menos un meter mas abou cu e camber cu tawata siendo keinta. Door di e diferencia di haltura aki tawata facil pa e huma y e aire cayente pasa bou di flur di e camber mas na halto. Huma bou di flur? Si, esei ta e secreto di ondol.

Cuminsando na e fogon, tawatin canal horizontal cu ta core bou di flur di un camber y bin sali na e schoorsteen. Aire cayente di e candela tawata pasa door di e canalnan y keinta e flur di piedra y tera. Esaki no tawata bai asina facil manera e ta zona. Pa haci esei posibel, bo mester a logra dos cos cu normalmente ta traha contra otro. Pa e candela por kima bon, e huma cu e ta saca mester por pasa lihe door di e canalnan y sali via e schoorsteen sin estorbo. Canalnan stret y cortico ta permiti esaki tuma luga miho. Pero pa e cayente di e candela keinta e flur, e aire cayente y e huma tin cu keda mas tanto tempo posibel den e canalnan. Pa nan logra esaki, nan tawata traha e canalnan di tal manera cu nan tawata cubri henter e area bou di e flur. Asina e aire cayente no tawata sali mucho lihe via e schoorsteen. Si bo por a logra pone e aire move net na e velosidad corecto, ni mucho lihe ni mucho pocopoco, bo por a tene un camber cayente henter anochi cu un candela cu a kima un par di ora so.

Ta ser bisa cu tawatin un camber di varios siglo bieu, keinta via e sistema ondol, cu tawata conserva e cayente cu un eficiencia increibel. E diseño di e canalnan tawata di tal manera cu e flur tawata keda bon cayente pa 45 dia largo despues di ser keinta un biaha so! Nan ta bisa cu 100 dia despues di keint’e, ainda bo por a sinti e flur un tiki cayente. Lamentablemente, e camber ei a keda destrui durante e guera Coreano na cuminsamento di e decada di 1950. Na 1982, ingenieronan a restaura e edificio, y awor turista por bishita e camber ondol. E manera cu e camber aki ta conserva cayente no ta nada compara cu e camber original. Asina mes, despues di un solo keinta, e flur ta keda cayente 10 dia largo den lente y herfst, y tres dia largo den winter, asta ora temperatura ta mas friu cu 10 grado Celsius bou di cero.

Otro secreto di e sistema di calefaccion ondol ta e diseño di e flur mes. Prome cu pone e flur nan tawata traha canal pa aire cayente. Nan tawata cubri e canalnan cu piedra delega plat, di mas o menos seis centimeter diki. Como cu di mes e flur ta mas cayente serca di e fogon, nan tawata pone piedra mas diki ei banda pa evita e cayente di bai perdi. Despues nan tawata pone klei geel riba e piedranan, y caba nan tawata haci e flur pareu. Finalmente nan tawata cubri e flur door di plak varios capa di papel di wax riba dje.

Den un camber keinta cu e sistema ondol tradicional, e flur tawata menos cayente na e banda cu ta mas leu for di e fogon. Pesei, nan tawata laga hende grandi, por ehempel mayornan y welanan y bishitante, sinta na e parti mas cayente. Tawata un manera di mustra respet.

Cambernan keinta via e sistema ondol tradicional na e parti nort di e peninsula Coreano no tawata precis mescos cu esnan den suit. Den nort no tawatin un muraya entre e cushina y e camber keinta door di e sistema ondol. Tanto e flur ondol como e cayente di e fogon tawata tene e camber cayente. Casnan den suit tawatin un muraya pa separa cushina y sala, pa huma no molestia hende den sala.

Tradicionalmente Coreanonan tawata uza palo como combustibel pa e tipo di fogon aki. Pesei, prome cu nan sende e ondol nan tawata montona palo banda di e fogon. E ora ei nan tawata uza sea papel of yerba seco pa sende e candela. Tin bes nan tawata uza carbon tambe. Pero den siglo 20, Coreanonan a cuminsa cumpra clompi di carbon comprimi. Claro cu mantencion ta esencial pa un camber ondol. Si tin scheur den e flur, e gas koolmonoxide por filtra drenta e camber, y esaki por asta resulta den morto.

Ondol Moderno

Awendia, masha poco bo ta topa e sistema ondol tradicional den casnan Coreano. Na su luga, casnan moderno y edificionan halto di apartamento cu ta uza ondol tin un sistema di calefaccion di flur cu ta uza awa cayente den tubo na luga di aire cayente pa keinta e flur. Ta interesante cu no ta Coreanonan a desaroya e sistema aki.

Net na comienso di siglo 20, e famoso arkitecto Mericano Frank Lloyd Wright tawata trahando un hotel na Hapon, y nan a invit’e na cas di un noble Hapones. Ei Wright a topa un camber cu tawata diferente for di e cambernan Hapones tipico. E flur tawata cubri cu papel geel, y e tawata cayente. Tawata un camber ondol Coreano! E cabayero Hapones a conoce ondol na Corea, y e no por a lubid’e mas. Pesei, ora el a bai bek Hapon el a laga traha un camber ondol den su cas. Wright a keda impresiona. Manera el a bisa: “Bo no por splica con agradabel ta pa haya cayente di abou.” Mesora el a dicidi cu ondol ta e sistema di calefaccion ideal, y el a cuminsa uz’e den su edificionan. Ta Wright a inventa e sistema di calefaccion di flur cu ta uza awa cayente via tubo en bes di aire cayente via canal.

E sistema nobo aki a pas hopi bon cu e estilo di bida di e Coreanonan di e tempo ei. Unabes cu e sistema mas simpel aki a yega Corea, el a gana popularidad masha lihe. Actualmente, casi tur cas Coreano tin e.

Ondol y Estilo di Bida

Ondol tawatin un gran impacto riba estilo di bida di Coreanonan. Por ehempel, debi cu e flur ta mucho mas cayente cu e aire den cas, di mes tur hende ta prefera sinta riba e flur cayente cu riba stul mas friu. Pesei, Coreanonan ta sinta, come, combersa y drumi riba flur. Pa tene e flur asta mas cayente, tin bes nan ta tap’e cu un deken diki cu nan ta yama ibul. Ora e miembronan di famia yega for di riba caya, nan tur ta hinca nan pianan friu bou di e deken pa nan disfruta di e cayente; un bon manera pa uni mas cu otro como famia!

Door cu estilo di bida Coreano tin cada bes mas influencia Occidental, e generacion mas jong ta prefera di sinta riba stul na mesa, y drumi riba cama. Toch, mayoria Coreano ta prefera e calor agradabel di un flur ondol, cu su sistema di calefaccion cu awa cayente. Si bo bishita Corea, sin duda lo bo disfruta di e sistema unico aki pa keinta cas: ondol.

[Nota]

[Diagram/Plachi na pagina 15]

(Pa e teksto den su formato kompleto, wak e publikashon)

Sistema di canal, mira di ariba

1 Fogon

2 Canalnan horizontal

3 Schoorsteen

→ → 2 → →

→ → 2 → →

→ → 2 → →

● 1 → → 2 → → ● 3

→ → 2 → →

→ → 2 → →

→ → 2 → →

[Plachinan]

Nan tawata uza un fogon pa cushina y pa keinta e camber na banda

Un bon sistema di schoorsteen y canal den flur tawata esencial pa un “ondol” eficiente

[Reconocemento]

Luga: Pueblito Coreano Tradicional

[Plachi na pagina 16, 17]

Den un camber “ondol” nan ta laga hende mas grandi sinta na e parti mas cayente

[Reconocemento]

Luga: Pueblito Coreano Tradicional