Un Maribomba Parasit Pero Toch Util

TA BERDAD cu sluipwesp (un tipo di maribomba) tin un aparencia straño, casi spantoso. Pero dicon nan ta yam’e un parasit? Pasobra por lo general e ta reproduci su mes door di pone un webo riba—of den—e larva di un otro insecto of haraña.

Na Norte America tin mas cu 3.000 sorto di sluipwesp. Sluipwesp na nan turno ta forma parti di un famia grandi di diferente tipo di maribomba parasit. Cientificonan ta calcula cu mundialmente tin mas cu 40.000 sorto cu ta pertenece na e famia di insecto aki.

Tin varios tamaño di sluipwesp, for di mas o menos 0,3 centimeter te 5 centimeter largo. E parti patras di nan curpa ta delega y curva, y ta mas largo cu nan cabes y pecho hunto. Distinto for di maribomba cu ta pica, sluipwesp su antenanan na su cabes ta mas largo.

E rasgo cu mas ta distingui sluipwesp ta un tubo manera hangua cu nan tin na punta di e parti patras di nan curpa. E ta un organo pa pone webo (legboor), y hopi bes e ta mas largo cu e curpa. E ta fini manera un cabei di cabai y tin tres drachi cu ta move bai bin pa pusha e webo manda abou door di e tubo.

Con sluipwesp ta haya sa unda tin larva pa sirbi como un posibel anfitrion pa su webo? Hende a yega di observa con un tipo di sluipwesp embra, Megarhyssa, ta klop cu su antenanan riba un palo pa detecta vibracion di un larva cu tawata 2 centimeter of mas bou di casca di e palo. Unabes cu e sinti cu tin un larva, e ta cuminsa klop mas duro. Caba e ta cuminsa pusha door di e casca di palo cu e tubo, como si fuera e ta bora e palo.

Observadonan a remarca: “Unabes cu e punta di e tubo di pone webo di e sluipwesp mishi cu e larva, e ta primi saca un solo webo door di e tubo, y ta pon’e sea banda, of riba, e anfitrion condena.” Ora e webo brui, e larva di sluipwesp ta alimenta su mes cu e vet y likido di curpa di e larva anfitrion. Caba e ta lora su mes den un cocon di seda den cua lo e desaroya bira un sluipwesp adulto. Ora cu e sluipwesp sali for di e palo, e ta cla pa castiga un generacion nobo di insecto.

Aunke un hende podise ta describi e grupo di insecto aki como parasit cruel, sluipwesp ta sirbi un proposito importante. Nan larvanan ta alimenta nan mes cu insectonan cu ta perhudica plantacion di cuminda, insectonan manera chincha di maishi, bacator di catuna, bichi di apel y bacator di asparago, pa menciona djis un par. Pues, evidentemente sluipwesp ta yuda mantene pest di agricultura bou di control.

Aunke tin masha hopi sluipwesp, masha poco bes hende ta mira nan pasobra por lo general nan ta come, brui y pone webo na luganan cu rara bes hende ta bishita. Pues sluipwesp ta sirbi como un ehempel mas di e diversidad y balansa cu tin den organismonan bibo, algo cu hende tin cu caba di compronde ainda.

[Plachi na pagina 18]

Un sluipwesp preparando pa pone su webo

[Reconocemento]

Scott Bauer/Agricultural Research Service, USDA