Mi Fundeshi pa un Bida Significativo

SEGUN E RELATO DI ERNEST PANDACHUK

Mi a nace den e sabananan di Saskatchewan, Canada. Tempo mi tawatin 23 aña mi a bai Africa, caminda pa 35 aña mi tawatin un bida fasinante como misionero. Con bin mi bida a bai asina? No ta pa casualidad. Laga mi splica dicon.

MI PROME cas tawata traha di palo, klei y yerba; e no a duna nos famia suficiente proteccion contra e winternan pisa di sabana. Na 1928, Tata cu Mama a tuma literatura biblico serca un persona cu tawata bishita nos cas den cunucu. Nos ta nuebe ruman, pero e tempo ei mayoria di nos no a nace ainda. Durante e winter largo cu a sigui, Tata cu Mama a studia Bijbel cu yudansa di e publicacionnan cu nan a haya. Pa e siguiente lente, nan tawata combenci cu nan a haya e berdad. Nan a cuminsa papia tocante e berdad cu nan famianan, amigonan y biciñanan pero specialmente cu nan yiunan.

Mi a nace na 1931, y no mucho tempo despues mi cinco rumannan mas chikito a nace. Lesamento y studio di Bijbel tawata parti di nos rutina di famia. Mi tin masha dushi recuerdo di e maintanan cu nos tawata pasa hunto. Tata tawata dirigi e consideracion di un texto di Bijbel cu nos, y e tawata haci esei asta si nos tawatin bishita. Mama cu Tata y tambe e yiunan mas grandi tawata haya beurt pa lesa duro for di e publicacionnan basa riba Bijbel.

Fuera di siña nos lesa y skirbi, tambe Tata a siña nos pa haci investigacion via concordancianan biblico. No a dura mucho cu nos a siña con pa uza Bijbel pa splica nos creencianan na otro hende. E combersacionnan agradabel ei a yuda mi rasona riba temanan biblico. Cu tempo, mi por a uza Bijbel pa refuta siñansanan religioso cu ta falso. Mi por a proba cu e alma ta muri, cu fierno di candela no ta existi y cu Dios y Hesus no ta igual of parti di un asina yama Trinidad.—Eclesiastes 9:5, 10; Ezekiel 18:4; Huan 14:28.

Tambe Tata cu Mama a siña nos mediante nan ehempel y a anima nos pa para firme pa loke ta corecto, asta si esei a nifica ser impopular. Por ehempel, nunca nan no a uza tabaco, y nan a spierta nos con esei lo por contamina nos y di e presion cu nos lo por a haya na scol pa uz’e. Mi ta corda Tata su palabranan: “Kisas un mucha lo por yama bo mohe si bo nenga di huma. Pero djis puntra e mucha: ‘Ken ta homber? Esun cu ta domina e yerba of esun cu e yerba ta domina?’”

Tempo cu mi tawatin 11 aña mi a haya un otro prueba cu lo a indica si lo mi a actua na harmonia cu e entrenamento biblico cu mi a haya den mi infancia. E tempo ei Segundo Guera Mundial a cuminsa, y na scol muchanan mester a rindi lealtad na bandera. Mi a compronde for di mi studio di Bijbel cu esei ta un acto di adoracion, anto pesei mi no a participa. Como consecuencia nan a schors mi pa seis luna for di scol.

Pero cu tempo mi a caba scol toch, y na maart di 1947 mi a simbolisa mi dedicacion na Yehova Dios mediante bautismo bou di awa. Seis luna despues mi a bira pionero, un predicado di tempo completo di e bon nobo. Prome mi a sirbi na e parti suit di Saskatchewan, caminda mi tawata predica na cunukeronan y doñonan di rancho den e teritorio inmenso aki. Durante zomer mi tawata predica riba cabai, y den winter friu, mi tawata uza loke nos a yama caboose, esta, un garoshi cu cabai ta lastra. Tawatin un confo den dje pa ten’e cayente, pues mi mester a tene cuidou pa e garoshi no kenter.

E hendenan di cunucu tawata amigabel y hospitalario. Si mi a haci bishita atardi laat, hopi bes e hendenan tawata invita mi pa pasa anochi serca nan. Mi tawata gusta e combersacionnan biblico cu tawata sigui un mundo! Famia Peterson a reacciona bon despues di un di e combersacionnan aki cu nos tawatin henter un anochi largo. Earl cu su mama a bira Testigonan di Yehova masha celoso.

Sirbiendo na Quebec

Na 1949, mi a responde na e yamada cu nan a haci pa pioneronan bai yuda cu e trabou di predica na e provincia di Quebec. Alrededor di 200 pionero di west Canada a responde na e yamada aki. Nan a yega na e stad di Montreal na september y tawata cla pa ricibi nan asignacion na cualkier parti di Quebec. Esaki tawata durante e periodo cu e Prome Minister catolico Maurice Duplessis, kende a hura di caba cu e Testigonan den e provincia, tawata na mando.

Eseinan tawata temponan druk y emocionante, yen di desafio. E desafionan aki tawata entre otro siña Frances y tambe enfrenta aresto y gruponan di bochinchero cu tawata lanta contra nos, anto tambe intrusonan fanatico cu tawata bin stroba nos asambleanan cristian. Sinembargo, e intolerancia ei no a intimida mi ni no a pone mi bandona mi carera como sirbido di Dios. Mi mayornan a siña mi stima loke ta corecto y a duna mi e conviccion cu e obra mundial di predica cu Hesus a predeci lo wordo haci, apesar di oposicion.—Mateo 24:9, 14.

Durante e tempo cu mi tawata na Quebec, mi a conoce Emily Hawrysh, un pionero fiel di Saskatchewan. Nos a casa dia 27 di januari 1951, y desde e dia ei Emily ta mi partner y compañera fiel cu ta anima mi. Door cu nos meta tawata pa participa mas plenamente den sirbishi, nos a yena solicitud pa bai Scol Biblico di Galad di Watchtower y nos a wordo acepta. E curso aki ta dura varios luna y ta prepara studiantenan pa e trabou di misionero. Na februari 1953 nos a gradua, esaki tawata e di 20 klas di Galad.

Mientras nos tawata warda riba e documentonan pa nos por a drenta Africa, nos a haya invitacion pa yuda e congregacionnan di Testigonan di Yehova na Alberta y Ontario, Canada. E tempo ei nos tawata uza transporte publico pa bai di congregacion pa congregacion. Ta pesei nos a siña biba simpel y carga tur loke nos tawatin den un falis. Un par di luna despues, ora tur nos papelnan pa bai Africa a bin cla, nos a sali rumbo pa Sur Rodesia, loke awe ta Zimbabwe.

Ahustenan Cu Nos Mester A Haci na Africa

Cinco luna despues di nos yegada, nos a haya asignacion pa bishita gruponan di Testigo di Yehova tanto na Zimbabwe como na Botswana y tambe e parti suit di Nort Rodesia (loke awe ta Zambia). Na Scol di Galad nos a siña pa no compara nos asignacion nobo den exterior cu esun di nos pais natal y pa corda cu sea cual sea e circunstancia cu nos haya nos aden, nos por siña algo for di nos experencianan. E bon palabranan ei a yuda nos ahusta nos pensamento. Te awe, ami cu Emily ta di acuerdo cu e lema: “Saca lo miho di cada situacion cu presenta; kisas lo ta e prome y ultimo biaha cu lo bo pasa aden.”

Nos a biaha cu trein, bus, truck of bais, loke tawata disponibel. Aunke esaki tawata hopi duro, tawatin otro circunstancianan cu a pone nos determinacion pa “saca lo miho di cada situacion cu presenta” na prueba. Durante e prome dos añanan, pa motibo di restriccionnan legal Emily no por a bai den e teritorionan di tribu cu mi. Kiermen cu ora nos tawatin apenas un poco aña casa, mi esposa mester a keda den cercania di pueblonan caminda trein ta pasa. Hopi bes sin compaño di otro Testigonan. Emily su fe, curashi y determinacion no solamente a yena mi cu admiracion y amor p’e sino tambe a duna fruta di Reino den e comunidadnan aki.

Asina cu Emily a haya un luga di keda serca un di e habitantenan local, e tawata cuminsa predica mesora den cercania te ora cu mi bolbe bek for di e teritorio di tribu. Tin bes, e tawata traha su so pa un luna largo. El a haya fortalesa y proteccion door di confia riba e poderoso man di Yehova, y su sirbishi a duna fruta. Rita Hancock tawata un di e personanan cu a reacciona faborabel na e berdad di Bijbel y mas despues su esposo tambe. El a bira un ruman fiel cu a sirbi como anciano cristian te na su morto. Awe tin congregacionnan cu ta florece masha bon mes den algun di e pueblonan caminda Emily a planta simiña di e berdad di Bijbel.

Hospitalidad y Creatividad Africano

Entretanto, den e teritorionan di tribu, e aprecio profundo cu e Testigonan Africano tin pa Yehova su organisacion y su representantenan biahero tawata un experencia cu a conmove mi masha. E rumannan cristian amoroso aki a percura bon pa mi. Tur dialuna mi tawata biaha bai un otro sitio di asamblea. Mi luga di keda tawata un casita di yerba cu nan a caba di traha. Esaki a pone mi corda e cas di mi mayornan den nos cunucu na Saskatchewan. Mi cama tawata un tapijt di yerba di 30 centimeter diki riba flur, cu un clechi riba dje.

Generalmente nan tawata tene e asambleanan di e teritorionan di tribu den un ambiente di naturalesa. Esnan cu tawata asisti tawata limpia e suela, pero tawata laga e palonan cu tawatin hopi blachi keda pa fresco. Nan tawata mara bultonan di yerba bunita asina hunto y pone nan un tras di otro pa hende por a sinta riba nan. Por ultimo nan tawata traha un cura rond di e luga cu nan a haci limpi. Den e ambiente di naturalesa aki, loke semper tawata touch mi curason ta e stemnan bunita di nos rumannan Africano cu ta canta alabansa na Yehova den un harmonia inolvidabel.

Un Experencia Inolvidabel

Den transcurso di mi añanan den sirbishi, mi a conoce Gideon Zenda, alto inspector di enseñansa di e scolnan cu tawata cai bou di Iglesia Anglicano. Gideon a haya su educacion, incluso su estudio universitario, via e iglesia ei. Sinembargo, e no a haya contestanan satisfactorio pa e tantisimo preguntanan cu e tawatin tocante Bijbel. Pesei el a pidi pa mi topa cu ne y un par di otro colega di dje pa mi contesta e preguntanan aki. En total tawatin mas o menos 50 hende presente pa e reunion aki, cu a inclui entre otro inspectornan di scol, maestronan y cabesnan di scol. Gideon a habri e reunion. Den un manera ordena, nos tawata trata un topico tras di otro. Mi a papia pa 15 minuut riba cada topico anto caba mi a considera preguntanan. E reunion a dura basta ora.

E resultado di e reunion extraordinario aki tawata cu Gideon, su famia y un cantidad grandi di su coleganan tur a bira sirbidonan dedica y batisa di Yehova. E obispo local a duna nan tur cu tawata traha den e sistema di educacion anglicano nan retiro. Sinembargo, ningun no a laga esei intimida nan y nan a keda firme den Yehova su sirbishi; algun asta a cuminsa traha pionero.

Reaccion Riba un Pelicula Cu A Causa un Impacto

Na 1954, Testigonan di Yehova a estrena un pelicula nobo: E Sosiedad di Mundo Nobo den Accion. E siguiente aña gobierno a kita e restriccionnan legal cu tawata stroba un esposa di compaña su esposo pa bai den e teritorionan di tribu. Esaki a pone cu djei padilanti Emily por a bai cu mi den e teritorionan di tribu. E tempo ei nos a haya un vehiculo, un delco electrico y un proyector pa pasa e pelicula den e comunidadnan di tribu. Hopi di nan nunca no a mira un pelicula, pa e motibo ei nos presentacionnan a hala hopi atencion. E pelicula a mustra con paso a paso nos imprenta grandi na Brooklyn, New York, ta produci Bijbel y literatura basa riba Bijbel.

Tambe e pelicula tin esenanan di e hermandad internacional di Testigonan di Yehova participando hunto den adoracion na Yankee Stadium, New York, na 1953. Nunca prome e Africanonan aki no a mira tal muestra di unidad y amor entre diferente rasanan. E pelicula aki a motiva hopi famia di Zimbabwe pa studia Bijbel y asocia cu e Testigonan. Masha hopi peticion tawata bin di parti di cabesnan di scol rond Zimbabwe pa pasa e pelicula ya cu nan tawata reconoce e balor educacional cu tal medio visual tin pa nan alumnonan.

Un anochi laat un par di ruman a lanta mi for di soño pa mi pasa e pelicula. Pa mi sorpresa alrededor di 500 hende a cana varios ora pa nan por a mir’e. Nan a tende cu mi tawata den bicindario y a pasa e pelicula. Pa ora cu e multitud a bai, un otro grupo di 300 hende a yega. Pues, mi a bolbe pasa e pelicula. Figura bo, e ultimo hendenan a bai tres or di marduga! Durante un periodo di 17 aña, mas cu un miyon hende a mira e pelicula impactante aki, anto esei ta na Zambia so!

Asignacion Nobo na Africa

Despues cu nos a sirbi cinco aña y mei na Zimbabwe, nan a transferi nos pa Sur Africa. Esaki a nifica cu nos mester a siña e idioma Afrikaans. Mas despues nos mester a siña papia Sesoto y Zulu tambe. E echo cu nos por a yuda otro hende siña e Palabra di Dios den otro idiomanan a haci nos mas eficas den sirbishi y a duna nos un gran satisfaccion.

Na principio di 1960 nos a haya asignacion pa traha den e trabou biahero den e parti suit di Africa. Pa e siguiente 27 añanan nos a biaha masha hopi mes rond Lesoto, Namibia, Sur Africa y Suazilandia, y tambe e islanan Ascension y St. Helena den e parti suit di Oceano Atlantico. En total nos a biaha miles y miles di kilometer pa sirbi nos rumannan cristian. Nan fe y lealtad bou di circunstancianan desfaborabel a anima nos pa nunca no entrega.

Por ehempel, mi a sera conoci personalmente cu Testigonan na Suazilandia cu no a compromete nan fe ora Rei Sobhuza II a muri. Door cu nan a nenga di participa den e ritonan antibiblico na entiero di e dignatario ei, nan tawata kita e Testigonan for di trabou y priva nan di nan derechonan como ciudadano. Apesar cu pa añanan largo nan tawata pasa trabou, nunca nan no a renuncia nan fe. E echo cu mi a siña conoce e rumannan cristian maraviyoso aki y cu mi por a papia cara cara cu nan ta un privilegio masha grandi, y semper lo mi keda gradicido na Yehova pa esaki.

Un otro experencia ta esun di Philemon Mafereka, un pionero di Mokhotlong, Lesoto, cu ta keda den seronan na un haltura di mas cu 3.000 meter. Debi cu no tin transport disponibel, e cu su kerida esposa, y nan dos yiunan, y cuater candidato pa bautismo a cana mas cu 100 kilometer pa bai na un asamblea cu tawata keda na un haltura di 1.200 meter. Gran parti di e caminda tawata consisti di seronan stijl cu nan mester a subi baha na man cu pia y di varios riu cu nan mester a crusa.

Despues di e asamblea, ora nan tawata riba caminda pa cas, nan tawatin shen buki di E berdad cu ta hiba na bida eterna hunto cu nan. E bukinan aki tawata pa e hendenan di Mokhotlong. Pero pa motibo cu e hendenan cu nan tawata topa riba caminda pa cas tawata interesa den literatura biblico, nan stock di buki a caba prome cu nan a yega cas. Tawata un privilegio pa ami cu Emily di por a mira personalmente e entusiasmo y debocion di rumannan cristian manera Philemon y su casa. Y nan ta ehempelnan cu te awe nos ta corda cu hopi cariño.

Tin bes nos tawata haya nos cu colebranan venenoso, manera cobra, y tambe inundacionnan y otro peligernan. Pero maske e experencianan aki tawata spanta nos na e momento ei, nan no ta nada na comparacion cu e recompensanan y gosonan di un carera den Yehova su sirbishi. Nos a siña cu Yehova nunca no ta bandona su sirbidonan leal.

Ora Emily a haya problema serio cu su salu, Yehova a duna nos e sabiduria pa trata cu e situacion den un manera balansa. Un cambio den su dieta y miho condicionnan sanitario a haci su recuperacion mas facil. Nos a comberti un truck den un trailer, y esei a pone cu Emily tawatin un ambiente controla pa biba aden y cu tempo el a bira bon atrobe.

Bek pa Canada

Na 1988, despues di 35 aña den e trabou di misionero den e fasinante continente di Africa, nan a asigna nos pa bai traha na Canada atrobe. Anto na 1991, un biaha mas mi a cuminsa traha como superintendente biahero. Despues di ocho aña mi a haya un atake celebral. Aunke mi actividad a baha drasticamente desde e tempo ei, ainda mi ta sinti un goso pa sirbi como anciano den un di e congregacionnan na London, Ontario.

Awe mi ta sinti un satisfaccion ora mi wak bek na e tempo cu mi a cuminsa traha pionero riba cabai den e parti suit di Saskatchewan, mas o menos 56 aña pasa. Esta gradicido mi ta cu Tata a persisti den siña nos con pa pensa manera un persona spiritual, y pa nunca sinti miedo di defende berdad y husticia! El a siña mi e Palabra di Dios, loke a haci mi bida significativo. E herencia ei a beneficia mi durante henter mi bida. Lo mi no cambia mi bida den e sirbishi di Yehova pa nada di mundo.

[Plachi na pagina 19]

Nos famia di nuebe yiu na 1949, hunto cu Mama cu tin e yiu mas chikito den su brasa. Ami ta para net patras di dje

[Plachi na pagina 20]

Mi a traha e “caboose” aki pa mi uza den sirbishi

[Plachi na pagina 20]

Hende mohenan cu a wordo aresta na Quebec pa motibo di e predicacion

[Plachi na pagina 22, 23]

Mi tawata un di e instructornan di e superintendentenan biahero aki na Zimbabwe

[Plachi na pagina 23]

Nos a traha e trailer aki pa Emily recupera

[Plachi na pagina 23]

Un potret resien di mi cu Emily