E Simiña Mas Grandi na Mundo

Hopi aña pasa, ora cu un simiña extraordinariamente grandi a ser benta na costa di islanan Maldiva y di Indonesia, el a pone hende su imaginacion traha. Mitonan a cuminsa circula tocante su origen. Tawatin hende cu a pensa cu e simiña a bin for di un palo den lama. Pesei nan a dun’e e nomber Coco-de-Mer, esta, coco di lama. Hende a asta kere cu e tawata e fruta prohibi cu Adam a come den hofi di Eden. Sinembargo, porfin meimei di siglo 18 nan a descubri e berdad. E simiña misterioso aki a bin di un tipo di palo di coco cu bo ta haya solamente na Seychelles, un grupo chikito di isla den Oceano Indio.

Na Vallée de Mai, riba e isla di Praslin, bo ta haya e consentracion mas grandi di Coco-de-Mer. E palonan di coco aki por alcansa un haltura di 30 meter y segun calculo nan ta biba pa cientos di aña. Un cos fasinante di Coco-de-Mer ta cu tin palo macho y palo embra. Pa e palo embra por produci fruta, e mester ser polinisa door di un palo macho di Coco-de-Mer. Pues anto, pa e tipo di coco aki sobrevivi den mondi mester tin palo madura di ambos sexo.

E fruta di e palo embra di Coco-de-Mer ta realmente unico. Ora e coco ta na palo e ta parce un curason berde grandi. Pero den e coco tin un simiña grandi cu un split meimei cu por pisa te cu 20 kilo. Algun coco tin mas cu un simiña. No ta un sorpresa anto cu The Guinness Book of Records a registra Coco-de-Mer como e palo cu ta pari e simiña mas grandi na mundo.

Ora bo para bou di un di e palonan ei y hisa cara wak e troshi di baranca di coco aki, bo ta keda impresiona cu e maraviya ei di creacion. Pero esei tambe ta pone bo den un situacion precario. E troshinan ei por pisa un 180 kilo. Sinembargo, sorprendentemente no tin ningun informe di hende cu a muri door cu coco a cai riba nan. Pero toch ta un bon idea pa no bishita Vallée de Mai durante mal tempo. E miho tempo pa admira e fruta peculiar aki ta ora weer ta calmo.