Mi A Acepta Dios Su Punto di Bista di Sanger

Un Docter Ta Conta Su Historia

MI TAWATA den e sala di conferencia di hospital, resumiendo e resultadonan di un autopsia pa un grupo di docter. E pashent cu a muri tawatin un tumor maligno, y mi a bisa: “Nos por conclui cu e causa inmediato di morto di e pashent aki tawata hemolisis [destruccion di cel cora di sanger] y mal funcionamento severo di su niernan causa door di transfusion di un cantidad grandi di sanger.”

Un profesor a lanta para y a grita rabia: “Bo kier bisa cu nos a dun’e sanger robes?” Mi a contesta: “No ta esei mi kiermen.” Mi a mustra un par di slides riba pantaya di seccionnan chikito di e pashent su nier, y a agrega: “Nos por mira desintegracion di un cantidad grandi di cel cora di sanger den e nier y pesei nos por conclui cu ta esaki a causa e mal funcionamento severo di su niernan.”a E ambiente a bira tenso, y mi boca a seca. Aunke mi tawata un docter hoben y e tawata un profesor, mi a sinti cu mi no por a hala mi palabranan atras.

Mi no tawata Testigo di Yehova tempo cu e incidente aki a tuma luga. Mi a nace na 1943 na Sendai, un stad den parti nort di Hapon. Como cu mi tata tawata un patologo y psikiatra, mi a dicidi di studia pa docter. Na 1970, durante mi di dos aña di scol medico, mi a casa cu un mucha mohe cu yama Masuko.

Drentando den e Campo di Patologia

Masuko a traha pa mantene nos mientras cu ami tawata caba mi educacion. E campo di medicina a fasina mi. Mi tawata hopi impresiona cu e manera excelente cu e curpa humano ta traha! Pero asina mes, nunca mi no a pensa riba e existencia di un Creador. Mi a pensa cu investigacion medico lo a duna mi bida un proposito. Pesei despues cu mi a bira docter, mi a scohe pa sigui studia medicina door di drenta e campo di patologia: e estudio di caracteristica, causa y efecto di malesa.

Segun cu mi tawata haci autopsia riba pashentnan cu a muri di cancer, mi a cuminsa duda di e balor di transfusion di sanger. Pashentnan cu cancer avansa kisas ta anemico debi na sangramento. Como cu chemotherapie ta empeora anemia, docternan hopi biaha ta prescribi transfusion di sanger. Sinembargo, mi a bin sospecha cu transfusion simplemente ta pone e cancer plama. Di tur manera, awe ta conoci cu transfusion di sanger ta stroba e curpa di resisti malesa (inmunosupresion), locual por aumenta e posibilidad cu tumor ta bolbe sali y ta reduci e chens di sobrevivi di pashentnan di cancer.b

Na 1975, mi a topa e caso menciona den introduccion. E profesor tawata na encargo di e caso y tawata un specialista riba tereno di sanger. Pesei no tawata nada straño cu el a bira furioso ora el a tende mi bisa cu ta un transfusion di sanger a causa e pashent su morto! Sinembargo, mi a sigui cu mi presentacion, y pocopoco el a bin calma.

Ni Malesa ni Morto Mas

Tawata rond di e tempo ei cu mi casa a ricibi bishita di un señora di edad cu tawata Testigo di Yehova. E señora a uza e palabra “Yehova” den su presentacion, y mi casa a puntr’e ta kico esei kiermen. E Testigo a contesta: “Yehova ta e nomber di e Dios berdadero.” Masuko tawata lesa Bijbel for di mucha, pero e Bijbel cu e tawata uza a remplasa Dios su nomber cu “SEÑOR.” Awor el a haya sa cu Dios ta un persona cu tin un nomber!

Mesora Masuko a cuminsa studia Bijbel cu e señora Testigo. Ora mi a bin cas for di hospital rond di un or di marduga, mi casa tur excita a bisa mi: “Bijbel ta bisa cu lo no bai tin malesa ni morto mas!” Mi a contest’e: “Esei lo ta tremendo!” El a sigui bisa mi: “Ya cu e mundo nobo lo bin pronto, mi no kier pa bo perde bo tempo.” Ami a pensa cu e tawata kiermen cu mi mester stop di traha como docter, pesei mi a rabia y nos relacion a bira basta tenso.

Pero mi casa no a entrega. El a resa pidi Dios yud’e haya textonan biblico apropiado y a mustra mi nan. Specialmente e palabranan di Eclesiastes 2:22 y 23 a touch mi curason: “Kico hende ta haya den tur su trabou y den su lucha cu cual e ta traha duro bou di solo? . . . Anochi su mente no ta sosega. Esaki tambe ta banidad.” Esaki a aplica na loke mi tawata haci: dedica mi mes na ciencia medico di dia y anochi sin haya berdadero satisfaccion.

Un diadomingo mainta na juli 1975, despues cu mi casa a sali bai e Salon di Reino di Testigonan di Yehova, mi a dicidi diripiente cu mi tambe ta bai. Mi casa a keda hopi sorprendi di mira mi einan, y mi a haya un bonbini caloroso serca e Testigonan. Djei padilanti mi a keda bai tur reunion di diadomingo. Mas o menos un luna despues, un Testigo a cuminsa un studio di Bijbel cu mi. Tres luna despues cu mi casa a haya su prome bishita di Testigonan di Yehova, el a batisa.

Aceptando Dios Su Punto di Bista di Sanger

No mucho despues, mi a siña cu Bijbel ta bisa cristiannan pa ‘abstene di sanger.’ (Echonan 15:28, 29; Genesis 9:4) Como cu ya caba mi tawata duda cu transfusion di sanger tawata efectivo, mi no tawatin problema pa acepta Dios su punto di bista di sanger.c Mi a pensa: ‘Si tin un Creador y esei ta loke e ta bisa, anto esaki mester ta corecto.’

Tambe mi a siña cu e causa di malesa y morto ta pica hereda for di Adam. (Romanonan 5:12) E tempo ei mi tawata haciendo un estudio di arteriosclerosis (aderverkalking). Segun cu nos ta bira bieu, nos adernan ta bira duro y smal, y ta causa enfermedadnan manera malesa di curason, problema cu ader di celebro, y malesa di nier. Tawata logico cu e causa ta nos imperfeccion hereda. Despues di esei, mi celo pa medicina a cuminsa mengua. Ta Yehova Dios so por elimina malesa y morto!

Na maart 1976, shete luna despues cu mi a cuminsa studia Bijbel, mi a stop cu mi estudio na e universidad di hospital. Mi tawatin miedo cu nunca mas lo mi a bolbe traha como docter, pero mi a haya trabou na un otro hospital. Mi a batisa na mei 1976. Mi a dicidi cu e miho manera pa mi uza mi bida tawata door di sirbi como un predicado di tempo completo, of pionero, locual mi a cuminsa haci na juli 1977.

Defendiendo Dios Su Punto di Bista di Sanger

Na november 1979, ami cu Masuko a muda pa un congregacion na Prefectura di Chiba caminda tawatin un gran necesidad di predicado. Mi a haya un hospital caminda mi por a traha part-time. Riba mi prome dia di trabou, un grupo di ciruhano a rondona mi. Cu persistencia nan a puntra mi: “Como Testigo di Yehova, kico lo bo haci si nan trece un pashent cu tin mester di transfusion di sanger?”

Cu respet mi a splica nan cu lo mi cumpli cu loke Dios ta bisa tocante sanger. Tambe mi a splica nan cu tawatin alternativanan pa transfusion di sanger y cu lo mi a haci lo miho cu mi por pa yuda mi pashentnan. Despues di un combersacion di casi un ora, e cabes di departamento di cirugia a bisa: “Mi ta compronde. Pero si nan trece un pashent cu a perde hopi sanger, nos lo atende e situacion.” E docter ei tawata conoci como un persona dificil, pero despues di e combersacion ei nos a desaroya un bon relacion, y semper el a respeta mi creencianan.

Respet pa Sanger Ta Ser Poni na Prueba

Mientras cu nos tawata sirbi na Chiba, Testigonan di Yehova na Hapon tawata trahando un sucursal nobo na Ebina. Un biaha pa siman ami cu mi casa tawata bai einan cu auto pa atende e salu di e boluntarionan Testigo cu tawata construi e facilidad aki, yama Betel. Despues di un par di luna, nos a haya invitacion pa sirbi fulltime na e Betel di Ebina. Pues, na maart 1981 nos a cuminsa biba den e edificionan temporal cu nan a uza pa aloha mas cu 500 trahado boluntario. Parti mainta, mi a yuda limpia baño y w.c. di e sitio di construccion, y parti atardi mi tawata tene consulta medico.

Un di mi pashentnan tawata Ilma Iszlaub, cu na 1949 a bin Hapon for di Australia como misionero. Ilma tawatin leukemia y su docternan a bis’e cu e tawatin solamente un par di luna di bida. Ilma a nenga di acepta transfusion di sanger pa prolonga su bida y a opta pa biba e dianan cu a rest’e na Betel. E tempo ei no tawatin remedi cu ta stimula produccion di cel cora di sanger, manera por ehempel eritropoyetina. Pesei tawatin biaha su hemoglobina tawata baha te na 3 of 4 gram! (Normal ta 12 pa 15.) Pero mi a haci loke mi tawata por pa trat’e. Ilma a sigui desplega su fe firme den e Palabra di Dios te na su morto na januari 1988, un shete aña despues!

Atrabes di añanan varios boluntario na e sucursal di Testigonan di Yehova na Hapon mester a haci operacion. Ta di elogia cu docternan di e hospitalnan den cercania a coopera door di opera sin uza sanger. Hopi bes nan a invita mi den e sala di operacion pa observa e procedura, y tawatin biaha cu asta mi a yuda cu e operacion. Mi ta gradicido na e docternan ei cu ta mustra respet pa e posicion cu Testigonan di Yehova tin pa cu sanger. Trahando cu e docternan ei a duna mi hopi oportunidad pa conta nan tocante mi creencianan. Poco tempo pasa un di nan a bira un Testigo batisa.

Un cos interesante ta cu e esfuerso di e docternan pa trata Testigonan di Yehova sin sanger a beneficia medicina masha hopi. Operacionnan sin sanger a comproba e beneficionan di evita transfusion di sanger. Estudionan ta demostra cu e pashentnan ta recupera mas lihe y cu menos problema despues di operacion.

Siñando Continuamente for di e Docter di Mas Grandi

Mi ta purba keda na haltura di e ultimo avancenan den medicina. Sinembargo, tambe mi ta siña continuamente for di Yehova, e Docter di mas grandi. E no ta djis wak e aparencia di pafo, sino mas bien e ta wak e persona completo. (1 Samuel 16:7) Como docter, mi ta purba trata cada pashent como un persona completo, y no djis enfoca riba su malesa so. Esaki ta yuda mi duna un pashent miho cuido medico.

Mi ta sirbi te ainda na Betel. Y un di e cosnan cu ainda ta duna mi e goso di mas grandi ta di yuda otro hende siña tocante Yehova—incluso tocante su punto di bista di sanger. Mi oracion ta cu e Gran Docter, Yehova Dios, pronto lo caba cu tur malesa y morto.—Segun e relato di Yasushi Aizawa.

[Nota]

[Comentario na pagina 14]

“Mi a splica nan cu tawatin alternativanan pa transfusion di sanger y cu lo mi a haci lo miho cu mi por pa yuda mi pashentnan”

[Comentario na pagina 15]

“Operacionnan sin sanger a comproba e beneficionan di evita transfusion di sanger”

[Plachinan na pagina 15]

Ariba: Dunando un discurso biblico

Man drechi: Ami cu mi casa, Masuko, awe