Bo Mester Paga Bo Belasting?

“Duna tur hende loke boso debe nan: si boso ta debe belasting, paga belasting; si ta tributo, tributo; si ta respet, respet; si ta honor, honor.” —Romanonan 13:7.

MIRANDO con tarifanan di belasting ta sigui subi, e conseho ariba por parce dificil pa acepta. Sinembargo, e palabranan ei ta di apostel Pablo, y nan ta para skirbi den Bijbel. Sin duda, bo ta respeta Bijbel. Pero kisas bo ta puntra bo mes: ‘Realmente cristiannan mester paga tur belasting, incluso esnan cu algun por considera irasonabel of inhusto?’

Pensa riba e spiertamento cu Hesus a duna su disipelnan. E tawata sa cu su compatriotanan Hudiu tawatin masha rabia riba e belasting cu Roma tawata impone riba nan. Apesar di esaki, Hesus a urgi: “Duna Cesar loke ta di Cesar, y Dios loke ta di Dios.” (Marco 12:17) Ta interesante cu Hesus a boga pa paga belasting na e mesun regimen cu despues di poco tempo lo a ehecut’e.

Un par di aña despues, Pablo a duna e conseho cita den introduccion. El a urgi pa paga belasting, apesar di e echo cu sumanan grandi di e placa di belasting tawata ser uza pa financia e forsanan militar di Roma y pa mantene e estilo di bida inmoral y exagera di emperadonan Romano. Dicon Pablo a tuma un posicion impopular asina?

Autoridadnan Cu Ta Goberna

Considera e contexto di e palabranan di Pablo. Na Romanonan 13:1, el a skirbi: “Laga tur hende somete nan mes na e autoridadnan cu ta goberna. Pasobra no tin autoridad cu no ta di Dios, y esnan cu ta existi, ta Dios a establece nan.” Ora e nacion di Israel tawatin gobernante temeroso di Dios, tawata facil pa considera dunamento di apoyo financiero na e nacion como un deber di ciudadano y un deber religioso. Pero cristiannan tawatin e mesun responsabilidad ora cu e gobernantenan tawata hende incredulo cu a adora dios falso? Si! Pablo su palabranan ta mustra cu Dios a duna gobernantenan e “autoridad” pa goberna.

Gobiernonan ta haci hopi pa mantene orden. Esaki ta permiti cristiannan cumpli cu e varios actividadnan spiritual cu nan tin. (Mateo 24:14; Hebreonan 10:24, 25) Pesei Pablo a bisa relaciona cu e autoridadnan gubernamental: “E ta un sirbido di Dios pa bo, pa bon.” (Romanonan 13:4) Pablo mes a probecha di e proteccion cu gobierno Romano a ofrece. Por ehempel, un biaha cu el a bira victima di un multitud violento, ta soldanan Romano a scap’e. Despues el a apela na e sistema hudicial Romano pa asina e por a sigui sirbi como misionero.—Echonan 22:22-29; 25:11, 12.

Pesei Pablo a duna tres motibo pa paga belasting. Prome, el a papia tocante e “furia” di gobierno ora di castiga kibradonan di lei. Di dos, el a splica cu e consenshi di un persona deboto na Dios lo ser perhudica si e ta deshonesto den su pagamento di belasting. Por ultimo, el a indica cu belasting ta simplemente un compensacion pa e servicionan cu gobierno ta rindi como “sirbido” publico.—Romanonan 13:1-6.

Pablo su rumannan cristian a tuma su palabranan na pecho? Evidentemente cu si, pasobra Justino Martir, un escritor supuestamente cristian di siglo 2 di nos era (rond di aña 110 pa 165), a bisa cu cristiannan tawata paga nan belasting “cu mas buena gana cu tur hende.” Awe, ora gobierno ta exigi pago, sea den forma di tempo of placa, cristiannan ta sigui cumpli cu esei boluntariamente.—Mateo 5:41, NW.a

Claro cu cristiannan ta liber pa probecha di cualkier bentaha cu nan por haya di deduccionnan legal di belasting. Den algun caso nan lo por haya deduccion a base di contribucionnan cu nan ta duna na organisacionnan religioso. No obstante, como cu cristiannan berdadero ta obedece e Palabra di Dios, nan no ta participa den evasion di impuesto. Nan ta paga nan belasting, y ta laga e autoridadnan carga pleno responsabilidad pa e manera cu nan ta uza e placa.

Demasiado belasting ta djis un di e maneranan cu “hende a eherce autoridad riba un otro hende pa su daño.” (Eclesiastes 8:9) Testigonan di Yehova ta haya consuelo den e promesa di Bijbel cu pronto husticia lo reina pa tur hende bou di e gobierno di Dios, un gobierno cu nunca lo no pone e peso di belasting inhusto riba lomba di hende.—Salmo 72:12, 13; Isaias 9:7.

[Nota]

[Comentario na pagina 11]

E prome cristiannan a paga nan belasting “cu mas buena gana cu tur hende.”—JUSTINO MARTIR

[Plachi na pagina 10]

Cristiannan berdadero ta obedece lei di belasting

[Plachi na pagina 11]

Hesus a bisa: “Duna Cesar loke ta di Cesar”

[Reconocemento pa Potret na pagina 10]

© European Monetary Institute