Habon—Un “Vacuna Cu Bo Por Duna Bo Mes”

“E CAUSA number dos di morto di mucha chikito na mundo no ta malaria, ni tuberculosis ni AIDS. Sino . . . diarea”, e revista The Economist ta informa. Sinembargo, hopi di e victimanan jong aki lo ta na bida awe si regularmente nan y nan famianan a laba nan man cu habon.

The Economist ta informa cu investigadonan na e Facultad di Higiena y Medicina Tropical di Londen a descubri cu “si hende laba man manera debe ser, esei lo por reduci casonan di diarea cu 43%. Lo e por tin e mesun impacto grandi riba infeccionnan di e sistema respiratorio, e causa principal di morto di mucha chikito. Un estudio extenso cu a ser haci pa e ehersito Mericano a saca afo cu casonan di ferkout y tosamento a baha cu 45% ora cu soldanan tawata laba nan man cinco bes pa dia.” Mayoria famia cu ta biba na paisnan den desaroyo por cumpra habon. Pesei e por wordo describi apropiadamente como “un tipo di vacuna cu bo por duna bo mes.” Anto riba dje e ta uno cu no ta haci dolor tampoco!

Bijbel tambe ta promove higiena. Dos Corintionan 7:1 ta bisa: “Laga nos purifica nos mes di tur impuresa di carni y spirito.” Aunke Dios ta precupa primeramente cu nos puresa spiritual, e ta considera higiena fisico importante tambe. (Levitico, capitulo 12-15) Claro cu e no ta spera pa nos bai te den extremo. Sinembargo, nos mester desaroya e custumber di laba man ora nos caba di uza baño, ora nos caba di baña un baby of cambia su bruki, prome cu nos cuminsa cushina of come y na cualkier otro ocasion den cua tin chens cu nos por contamina otro hende cu bacteria of virus. Si nos laba nos man regularmente, nos ta mustra amor cristian pa nos famia y tur hende cu nos lo por bin den contacto cu ne.—Marco 12:31.