For di Nos Lectornan

Diabetes Mi kier gradici boso di henter mi curason pa e serie “Con pa Biba cu Diabetes.” (8 di mei 2003) For di tempo cu mi tin cuater aña mi ta lucha cu diabetes. Semper mi a pensa cu algun cos lo tawata imposibel pa mi, manera casa y drenta den e trabou di predica tempo completo, pero e articulonan aki a duna mi speransa. Awor, na edad di 17 aña, mi a pone como mi meta e trabou di predica tempo completo, y lo mi haci mi best pa logr’e.

T. A., Japon

Un sugerencia cu mi a haya masha bon mes tawata esun pa famia y amigonan no anima hende cu diabetes pa come cosnan cu no ta bon pa nan. Ta un lucha pa cushina pa mi famia, anto caba mi mes no por come e cosnan cu mi a prepara. Pa ken cu no tin diabetes, esaki por parce un co’i kens, pero mi por sigura boso cu no ta asina!

V. N., Italia

Mi ta verpleegster y docente. Na principio di e siguiente trimester, lo mi siña mi alumnonan tocante diabetes. E plachi na pagina 8 y 9 ta facil pa compronde, y lo mi uz’e den mi les. Danki pa publica articulonan simplifica riba topiconan medico.

C. B., Francia

Danki pa e articulonan tocante diabetes. Mi no tin e malesa aki, pero mi ruman mohe di 14 aña si tine. Awor mi ta compronde loke mi ruman ta pasa aden. Ta berdad cu ami mester sacrifica cos p’e, pero esei no ta dje dificil ei manera biba cu diabetes!

E.D.M., Italia

Mi mama tin cinco aña cu diabetes. Hopi bes mi ta precupa pa su salu, ya cu mi ta biba leu for di dje. Mi tin pensa di manda un copia di e revista aki p’e. Kisas e por yud’e ora ami no t’ei.

R. W., Indonesia

Lesion Mi a disfruta di e articulo “Un Lesion Cu A Cambia Mi Bida.” (8 di mei 2003) E articulo aki a yuda mi trata cu e lesion na mi lomba cu mi ta sufri di dje pa mas cu 30 aña caba. Mi a experencia hopi di e mesun cosnan cu Ruman Stanley Ombeva a experencia. Tawata un consuelo pa mi pa sa cu e Palabra di Dios ta yuda bo depende riba Yehova.

G. G., Merca

Mi a keda masha conmovi pa Ruman Ombeva su descripcion franco di e manera cu el a reacciona riba su incapasidadnan fisico. E relato a pone mi realisa cu mi problemanan ta masha insignificante compara cu loke e tin cu enfrenta. E articulo aki a yuda mi consentra riba e cosnan positivo den mi bida.

S. C., Canada

Fenomenal! Esei ta e palabra cu mi tin cu uza pa describi e articulo aki. Mi no por a pon’e abou. E manera cu e Scritura a bira hopi mas significante pa Ruman Ombeva ora cu e tawatin mas mester di dje a duna mi cos pa pensa ariba. Esaki lo yuda mi mustra mas comprension ora di ofrece yudansa na otro hende.

R. G., Merca

Tawata un animacion pa mi pa sa cu asta un cristian cu ta sirbi como un anciano di congregacion a sinti e tipo di frustracion aki y ta reconoce cu ta tuma tempo pa trata cu un situacion manera esei. Ruman Ombeva a conta cu asta durante e periodo di mas dificil di su afliccion, nunca el a bira iregular den sirbishi. Mi tambe ta determina pa haci mescos.

M. K., Japon

Mi a cai asina hopi biaha tempo mi tawata mas jong, cu awor mi ta sufri. Constantemente mi tin dolor, ta dificil pa mi cana y mi tin masha tiki energia. Esei ta limita mi den e predicacion cristian y ta laga mi sinti masha malo. Pero lesando con Ruman Ombeva a maneha su problema, a yuda mi. Masha danki!

E. E., Merca