E Punto di Bista Biblico

Diplomacia Lo Trece Pas Mundial?

LO BO kier mira fin di tur guera? Lo mester tin un of otro solucion diplomatico pa conflictonan nacional y internacional. Hopi hende ta kere cu si lidernan mundial simplemente coopera cu otro, lo por caba cu guera. Sinembargo, probablemente bo ta decepciona cu e resultadonan di diplomacia. Pa siglonan diplomaticonan a ratifica tratado, formula resolucion y tene reunionnan cumbre, pero masha tiki problema a ser soluciona permanentemente.

Bijbel tin hopi di bisa tocante diplomacia y pas. E ta contesta e siguiente preguntanan: Ki factornan actualmente ta stroba diplomacia di produci pas? Cristiannan mester envolve nan mes den diplomacia? Con mundo finalmente lo logra berdadero pas?

Ta Kico Ta Stroba Pas?

Varios relato di Bijbel ta ilustra con contacto personal, persona pa persona, por hiba na pas. Por ehempel, Abigail habilmente a combence David y su ehersito pa no tuma vengansa contra su famia. (1 Samuel 25:18-35) Hesus a duna e comparacion di un rei cu no tawatin ningun otro recurso rasonabel sino di manda un delegacion pa pidi pas. (Lucas 14:31, 32) Si, Bijbel ta reconoce cu algun forma di diplomacia por soluciona conflicto. Pero dicon conferencianan di pas hopi bes tin masha tiki exito?

Bijbel a predeci cu exactitud cu nos tempo lo ta trabahoso. Debi na e influencia malbado di Satanas e Diabel, hende lo ta “ireconsiliabel”, es decir, nan lo no ta dispuesto na ningun acuerdo, mas bien nan lo ta “grosero, odiado di loke ta bon, traido, imprudente, soberbe.” (2 Timoteo 3:3, 4; Revelacion 12:12) Ademas, Hesus a profetisa cu fin di e sistema actual aki lo ta marca pa “gueranan y rumornan di gueranan.” (Marco 13:7, 8) Ken por nenga cu mas y mas ta e cosnan aki ta reina? Siendo cu ta asina, ta straño anto cu intentonan pa logra pas entre e nacionnan hopi bes ta resulta en vano?

Considera tambe e echo aki: Mientras cu diplomaticonan ta traha duro pa evita conflicto, cada un di nan su meta principal ta pa promove e interesnan di su propio nacion. Esei ta e factor mas importante di diplomacia politico. Cristiannan mester envolve nan mes den asuntonan asina?

Cristiannan y Diplomacia

Bijbel ta conseha: “No confia den prinsnan, den yiu di hende, den kende no tin salbacion.” (Salmo 146:3) Esaki ta nifica cu sea cual sea nan motivacion, diplomaticonan di mundo no tin ni e habilidad ni e poder pa bin cu solucionnan permanente.

Ora cu Hesus tawata ser husga dilanti di Poncio Pilato, el a declara: “Mi reino no ta di e mundo aki. Si mi reino tawata di e mundo aki, mi sirbidonan lo a bringa, pa mi no wordo entrega na e Hudiunan; ma t’asina cu mi reino no ta di e mundo aki.” (Huan 18:36) Iniciativanan di pas hopi bes ta ser influencia pa odio nacionalista y egoismo politico. Pa e motibo ei, cristiannan berdadero ta evita di envolve nan mes den e conflictonan di e mundo aki y su intentonan pa diplomacia.

Esaki kiermen cu cristiannan no tin cu nes ni ta interesa den asuntonan di mundo? Nan no ta sinti ora nan mira sufrimento humano? No, no ta asina. Al contrario, Bijbel ta describi e berdadero adoradonan di Dios como personanan cu ta “suspira y keha” pa motibo di e cosnan malo cu ta tuma luga rond di nan. (Ezekiel 9:4) Cristiannan simplemente ta steun riba Dios pa trece pas, manera el a priminti. Pa bo, pas ta nifica solamente fin di guera? E Reino di Dios sigur lo logra esei. (Salmo 46:8, 9) Pero fuera di esaki, lo e garantisa e pleno siguridad y bienestar di tur habitante di tera. (Mikeas 4:3, 4; Revelacion 21:3, 4) Diplomacia of e esfuersonan di hende su organisacionnan “pa mantene pas”, nunca lo por alcansa un pas superior asina.

Profecia di Bijbel y experencia di pasado ta indica bon cla cu si nos confia den diplomacia humano pa trece pas, esei solamente lo hiba na decepcion. Esnan cu ta pone nan speransa pa pas den Hesucristo y ta apoya e Reino di Dios, lo mira nan deseo pa berdadero pas ser realisa. Ademas, nan lo disfruta di pas pa semper!—Salmo 37:11, 29.

[Comentario na pagina 27]

Abou: Potret di Stephen Chernin/Getty Images

[Reconocemento pa Potret na pagina 26]

Sea cual sea nan motivacion, diplomaticonan di mundo no tin ni e habilidad ni e poder pa bin cu solucionnan permanente