Drecha Bo Auto na un Manera Safe

Kevin tawata sa di experencia con pa cambia azeta di su auto. E tawata sa con pa kita e plug di azeta di e oil pan, haci e crankcase bashi, pone e plug bek, y tight e. Pero un biaha, segun cu Kevin tawata drei su yabi cu forsa, e yabi a slip for di e cabes di e scruf. Kevin su man a bai dal den un pida metal skerpi y el a corta su plant’i man mal corta te cu e mester a haya varios cosi.

MESCOS cu Kevin, tin hopi hende cu nan mes ta traha riba nan auto cu regularidad, tin di nan djis pa baha gasto. Pero tin otro bentahanan mas den siña e cosnan basico relaciona cu mantencion y drechamento di auto. Un señora cu yama Kathy a bisa: “Un biaha, durante un biahe largo riba caminda, mi auto a haya un problema. Como cu mi a siña drecha mi auto, mi mes por a corigi e problema y sigui cu e biahe.”

Podise bo tambe tin gana di por mantene y drecha bo auto. Pero con bo por hacie na un manera safe?

Pensa di Antemano!

Bo prome prioridad mester ta siguridad, esta, traha na un manera safe.a Manera loke a pasa cu Kevin ta ilustra, ta facil pa lesiona bo mes ora bo ta traha den un luga preta of ora bo ta uza forsa riba un herment. Con bo por evita di lesiona bo mes? Ora bo ta uza un yabi pa sera un scruf, haci sigur cu e yabi ta bon poni riba e scruf. Puntra bo mes: ‘Si e herment aki slip, unda mi man lo bai?’ Bo por haya un grado di proteccion door di bisti handschoen of door di mara un lapi rond di bo man. Pa yuda controla e forsa cu bo ta pone riba e herment, hal’e na bo si ta posibel, en bes di push’e fo’i bo. Asina tambe, ora bo ta los un scruf cu ta pega, bo meta mester ta pa laga e scruf drei cada bes djis un cuart ronchi. E principionan aki di premira algo y controla bo movecion semper ta valido. No neglisha nan nunca pasobra bo tin pura!

Hopi bes accidente ta tuma luga ora cu un persona ta purba uza un herment pa un cos cu e no a ser traha p’e. Por ehempel, Tom tawatin dificultad pa cambia e sparpluknan di su auto. Dicon? Pasobra su socket tawata mucho cortico, y cada bes e tawata slip for di e prome plug. Finalmente, Tom a pega un extension entre e socket y e ratchet. E ora ei el a cambia e cinco plugnan cu a sobra den e mesun cantidad di tempo cu a tum’e pa cambia e prome plug, anto el a cambia nan na un manera safe! Ki les esei ta siña nos? Cu ta masha importante pa bo tin e herment adecua.

Cos dañino por bai den bo wowo ora cu bo ta traha bou di auto of ta wak bou di dash-board. Con bo por preveni esaki? “Bisti un tipo di proteccion pa bo wowo, manera goggles”, segun Sean, kende tin mas cu dies aña como mecanico. El a agrega: “Den e garashi caminda mi ta traha, ta obligatorio pa uza tal ekipo di siguridad.” Tambe bo mester uza algo pa proteha bo wowo ora bo ta traha banda di likidonan peligroso, manera acido di bateria.

Ora bo ta traha bou di bo auto, semper uza un cabai bon diseña pa wanta e auto, of un lift profesional pa hisa e auto of un buraco reforsa cu ta laga bo drenta bou di e auto. Nunca bai bou di un vehiculo cu tin solamente un jack ta want’e. E manual di algun auto ta indica unda bo mester pone jack of cabai pa nan wanta e auto bon. Sinembargo, corda cu un movemento fuerte diripiente—manera ora bo ta pone forsa pa los un scruf cu ta duro pega—por pone e auto schuif y slip for di loke ta want’e.

Con pa Evita Sorpresanan Peligroso

Algun parti di bo auto por bira hopi cayente y kima bo si bo mishi cu nan. Por ehempel, e awa den radiator ta keda cayente pa basta rato despues cu bo paga e motor. Pesei no habri e tapa di radiator sino te ora cu e tapa ta suficiente friu cu bo por los e cu bo man sin handschoen. Den algun auto, e fan di radiator ta drei riba coriente y ta sende automaticamente, asta despues cu paga e motor. Pa evita lesion, bo tin cu desconecta e waya di ground for di e bateria, prome cu bo cuminsa traha riba e auto.

Ora bo ta traha riba bo auto, kita renchi y hoyas for di bo curpa, specialmente si e motor ta sendi. Hoyas di metal, fuera di keda pega den partinan di e auto, por causa un corto sircuito y bira cayente cayente! Tambe piesanan cu ta drei of move por gara manga largo cu ta colga, dashi, sjaal y asta cabei largo.

Asta ora bo ta pensa cu bo trabou ta cla, tin un ultimo regla cu bo tin cu cumpli cu ne. “Semper dobel chek bo trabou”, segun Dirk, hefe di un garashi hopi druk. El a sigui bisa: “Un biaha, un mecanico a lubida di haci esaki despues cu el a traha riba break di un auto. E breaknan a faya, y e auto a bin dal den mi lessenaar!”

Con pa Atende Emergencia

Un dia Tom a ripara cu su auto tawata keinta di mas. Ta un slang a kibra, y e awa di radiator a basha abou. Uzando un rol di duct tape [tape shinishi hancho] cu semper e tin den auto, Tom a logra drech’e temporalmente door di tape e slang y basha un mescla di antivries cu awa den e radiator. Caba el a core bai na un negoshi cu ta bende piesa di auto pa cumpra un slang nobo. Tom su experencia ta ilustra e necesidad di ta prepara door di percura pa bo tin articulonan pa drecha cos den bo auto.

Segun cu bo ta core, sea alerta pa cualkier zonido of holo straño. Yvonne a ripara cu un holo straño tawata bin for di e motor di auto. Su casa a habri e hood di auto y a mira con antivries tawata spuit sali for di un buraco chikito parti ariba di e slang di radiator. Como cu nan a detecta e problema prome cu e auto a keinta di mas, Yvonne cu su casa por a core bai un garashi.

Kico bo mester haci si bo auto daña riba caretera? Prome, purba pone e auto mas leu cu ta posibel for di riba caya. Pasaheronan, specialmente mucha, mester keda den auto cu nan faha di siguridad mara. Si bo mester ta pafo di e auto, para mas leu cu ta posibel for di trafico. Sende e lusnan di emergencia cu ta sende paga (hazard). Laga e hood di auto hisa como un señal cu bo tin problema cu auto. Cuidadosamente, pone lus of otro señal di advertencia.

Si bo bateria di auto a baha, bo por dicidi di uza jumper cable pa start e auto cu yudansa di un otro vehiculo. Pero tene cuenta cu bateria di auto ta produci gas sumamente flamabel. Un chispa por sende e gas aki, produciendo un explosion cu por baña bo cu acido cu ta kima. Pesei, si abo of esun cu ta yuda bo no sa sigur con pa uza jumper cable, warda te ora boso haya yudansa.

Manera nos a mira, mantencion di auto ta un responsabilidad serio. Sea cu bo traha riba bo mes auto pa drech’e den caso di un emergencia of simplemente bo ta haci mantencion rutinario, semper corda cu ta masha importante pa bo ta conciente di siguridad!

[Nota]

[Comentario na pagina 15]

Hopi bes accidente ta tuma luga ora cu un persona ta purba uza un herment pa un cos cu e no a ser traha p’e

[Cuadro/Plachinan na pagina 13]

Articulonan pa Tene den Bo Auto

✔ Spare tire y jack

✔ Jumper cable

✔ Lus di emergencia of reflector

✔ Herment y goggles

✔ Flashlight

✔ Extra boter of bleki di likido (azeta, awa, antivries, azeta di break)

✔ Duct tape

✔ Spare fuse

✔ Cabuya pa tou (Nota: Den algun luga kisas ta solamente takelwagen tin mag di tou bo auto)

✔ Caha pa tene herment y boter of bleki na ordo y para

Podise bo ta desea di tene mas articulo di drecha cos den bo auto. Sinembargo, algun club di auto cu ta percura servicio di emergencia canto di caminda no ta dispuesto pa traha riba un auto cu daña si e doño mes a cuminsa drecha cierto cos. Si bo ta pertenece na un club di auto, busca pa sa ki tipo di reparacion ta ser permiti.