Hobennan Sa Puntra . . .

Con Mi Por Tin Exito Como Orado Publico?

“Segun mi, e hendenan tawata ripara delaster un di e foutnan cu mi a haci y e falta di confiansa cu mi tawatin. Mi no por a consentra riba mi speech. Mi a sinti cu nan tawata hari mi.”—Sandy.a

E SALA di scol ta chok chok. Bo ta tende nan anuncia bo nomber via loudspeaker, y diripiente tur hende su bista ta riba bo. E par di stapnan cu bo tin cu cana pa yega e stand di orado ta parce un kilometer. Bo mannan ta cuminsa soda, bo ta sinti bo pianan manera suak, y pa un of otro motibo bo boca ta seco seco. Anto prome cu bo por haci algo, un gota inmenso di sodo ta core na bo cara. Esta berguensa! Bo sa cu no ta un fusilamento bo ta bai enfrenta, pero ta asina bo ta sinti si!

Laga nos ta franco: E pensamento so cu nos tin cu papia dilanti di otro hende ta duna mayoria di nos miedo. (Yeremias 1:5, 6) Tin hende cu asta a considera nan miedo di papia dilanti publico mas piyo cu nan miedo di morto! Sin importa kico abo mes kisas ta pensa di esei, tin bon motibo pakico bo mester ta interesa den papia dilanti publico. Laga nos considera algun di e motibonan ei y tambe con bo por bira un orado exitoso.

Ora Cu Pidi Bo Papia Dilanti Publico

“Papia dilanti publico ta un habilidad cu tur hende tin mester.” Asina propaganda pa un les pa siña papia dilanti publico a bisa. Si, tardi of tempran, bo por haya bo dilanti un auditorio. Pa cuminsa, hopi scol ta promove papiamento dilanti publico. Un mucha mohe cu yama Tatiana ta corda: “Hopi biaha mi mester a papia dilanti mi compañeronan na scol.” Studiantenan hopi bes mester ta cla pa papia, for di spreekbeurt y analisis di buki cu nan a lesa, te na presentacionnan audiovisual y debatenan.

Ora cu despues di tempo bo caba scol y cuminsa traha, nan por pidi bo duna les na un grupo di colega, of presenta un proposicion na un cliente, of splica un raport financiero na un hunta di directiva. Eigenlijk, e habilidad di papia dilanti publico ta util den un variedad amplio di trabou, incluso den periodismo, management, relacionnan publico y benta.

Pero kico si bo scohe pa traha como obrero of oficinista? Wel, si bo por papia bon durante un entrevista pa trabou, esei kisas ta determina si bo ta haya e trabou of no. Na trabou mes, bo habilidad di expresa bo mes bon por ta un bentaha. Corrine a traha tres aña como waiter despues cu el a caba scol. El a bisa: “Si bo por papia bon, hende ta considera cu bo ta mas madura y cu bo por handle mas responsabilidad. Esei por asta nifica un miho trabou, mas salario, of por lo menos mas respet.”

Por ultimo, hobennan cristian hopi bes ta papia dilanti otro hende como parti di nan adoracion. (Hebreonan 10:23) Taneisha a comenta: “Ta importante pa mi por expresa mi mes cu claridad. Nos tin e privilegio di predica e bon nobo di e Reino di Dios.” (Mateo 24:14; 28:19, 20) Den congregacion y den nan sirbishi publico, hobennan cristian “no por laga di papia loke [nan] a mira y tende.”—Echonan 4:20; Hebreonan 13:15.

Pues anto, bo por beneficia den varios manera si bo haya bon habilidad di papia. Pero asina mes, toch bo por sinti bo nervioso ora bo pensa cu bo tin cu lanta para dilanti un auditorio. Tin algo cu bo por haci pa vence bo nervio? Si, tin.

Con pa Vence Bo Miedo

“Bo no tin nodi ta supersabi of perfecto pa bo tin exito”, segun dr. Morton C. Orman, un experto di stress y un orado publico profesional. “E proposito di papia dilanti un publico ta esaki: duna bo auditorio un cos di balor.” Cu otro palabra, consentra riba e mensahe, no riba bo mes of riba bo nervionan. Algun hende den prome siglo tawata haya cu apostel Pablo no tawata e orado di mas elocuente, pero como cu semper e tawatin algo balioso di bisa, toch e tawata efectivo. (2 Corintionan 11:6) Asina tambe, si bo presenta un cos importante cu realmente bo ta kere aden, bo nervionan lo baha mas lihe.

Ron Sathoff, cu tambe ta un orado renombra cu ta entrena otro orado, ta duna e sugerencia aki: No pensa riba bo speech como un presentacion publico. Trat’e manera un combersacion. Si, purba comunica cu bo auditorio como si fuera ta cu personanan individual bo ta papia—y no cu un grupo grandi di persona—manera lo bo a haci den un combersacion comun y coriente. Mustra berdadero “interes personal” den bo auditorio, y papia cu nan manera bo ta papia normalmente. (Filipensenan 2:3, 4) Mas bo manera di papia ta style di un combersacion, mas relaha lo bo ta.

Un otro motibo comun di nervio ta miedo di ser brongosa of di ser critica door di bo auditorio. Lenny Laskowski, un orado profesional cu ta entrena otro orado, ta recorda nos cu auditorionan ta inclina na scucha cada presentacion cu un punto di bista positivo. Laskowski a bisa: “Nan kier pa bo tin exito, no pa bo fracasa.” Pesei tene un actitud positivo. Si ta posibel, purba cuminda algun persona di bo auditorio ora nan yega. Purba mira nan como bo amigo, no bo enemigo.

Corda tambe cu no ta completamente malo pa sinti bo nervioso. Un experto a bisa: “Contrario na loke mayoria hende ta kere, ta bon pa bo y pa bo presentacion si bo ta sinti nervioso.” Dicon ta asina? Pasobra un grado di nervio ta indica cu bo ta humilde, y esei lo evita cu bo ta haya demasiado confiansa. (Proverbionan 11:2) Hopi atleta, musico y actor ta haya cu un poco energia nervioso de echo ta laga nan actua miho, y esei tambe por ta e caso serca orado publico.

Sugerencianan pa Logra Exito

Door di aplica e siguiente puntonan y otro ideanan, algun hoben cristian ya caba a haya un midi di experencia y exito como orado na scol, na trabou y den nan congregacion. Wak si un par di nan sugerencianan lo por yuda bo.

Jade: “Expresa e informacion cu bo mes palabranan. Combence bo mes di e beneficionan di loke bo tin di bisa. Si bo ta sinti cu bo discurso ta importante, bo auditorio tambe lo sinti asina.”

Rochelle: “Mi a nota cu ta util pa graba mi mes riba video. E ta laga bo realisa kico ta bo debilidadnan pero toch e ta probechoso. Tambe, purba scohe un topico cu bo gusta. Esei lo ta bisto den bo speech.”

Margrett: “Mi ta haya cu mi ta papia mas natural y mas den style di combersacion ora mi uza un boskeho of skema en bes di skirbi tur cos palabra pa palabra. Ademas, ora mi hala un rosea profundo prome cu mi cuminsa papia, esei ta trankilisa mi.”

Corrine: “No tene miedo di hari bo mes. Tur hende ta haci fout. Simplemente bo tin cu purba haci bo best.”

Claro cu mescos cu den tur otro actividad, manera deporte, arte of musica, no tin nada cu por remplasa experencia y hopi practica. Tatiana ta recomenda pa bo prepara bo speech hopi tempo di antemano ya asina bo tin suficiente tempo pa practica. Y no entrega. El a bisa: “Mas tanto biaha mi papia dilanti otro hende, menos nervioso mi ta bira.” Pero tin un fuente mas di yudansa cu bo no mester lubida riba dje, specialmente ora bo tin cu papia pa defende adoracion berdadero.

Yudansa for di e Gran Comunicador

Como hoben, David, e futuro rei di Israel, ya caba tawatin e reputacion cu “e sa con papia.” (1 Samuel 16:18, Beibel na papiamentu koriente) Con bin? Evidentemente, David den su hubentud, durante e tantisimo oranan cu el a pasa pafo den cunucu ta cuida carne, a desaroya mediante oracion un relacion intimo cu e Gran Comunicador, Yehova Dios. (Salmo 65:2) Anto e relacion aki, na su turno, a prepar’e pa papia na un manera cla, vigoroso y combencente, asta bou di circunstancianan dificil.—1 Samuel 17:34-37, 45-47.

Bo por tin sigur cu den transcurso di bo adoracion, Dios lo yuda abo tambe papia na un manera combencente, mescos cu el a yuda David, dunando bo “un lenga cu a wordo siña.” (Isaias 50:4; Mateo 10:18-20) Si, door di probecha awor di oportunidadnan pa mehora bo habilidad di papia, bo por bira un orado publico efectivo!

[Nota]

[Cuadro na pagina 18]

Entrena Como Orado

Den congregacion di Testigonan di Yehova rond mundo, tin un programa di instruccion semanal basa riba Bijbel cu yama Scol di Ministerio Teocratico. Studiantenan ta participa den sesionnan di klas, ta duna presentacion dilanti di e congregacion y ta ricibi yudansa personal pa yuda nan progresa. E programa ta efectivo? Laga Chris di 19 aña conta bo su experencia.

El a bisa: “Prome cu mi a join e scol, mi tawata sinti mi hopi incomodo den hende. Nunca mi a pensa cu lo mi por ta riba podium dilanti un auditorio. Pero algun persona den e congregacion a anima mi, bisando cu maske mi gaga so durante henter e parti, nan lo disfruta di dje, sabiendo cuanto esfuerso m’a haci pa ta ei dilanti. Anto, despues di cada presentacion cu mi duna, nan tawata elogia mi. Esei tawata un gran yudansa.”

Awe, despues di cinco aña den e scol, Chris ta preparando pa duna su prome discurso di 45 minuut. Abo ta probechando di e scol aki?

[Plachinan na pagina 16, 17]

Ser un orado habil por yuda bo den tur aspecto di bida