Prosperando Meimei di Dificultad

Manera Bijbel a profetisa, nos ta biba den “temponan trabahoso.” (2 Timoteo 3:1) Bida di famia turbulento, problema di salu y tension economico ta djis algun di e obstaculonan cu kisas ta aflihi bo. Podise tin biaha bo ta sinti cu bo no por soporta mas. No obstante, bo por prospera meimei di dificultad. Considera e siguiente ilustracion.

E violeta di Teide ta un mata cu ta crece na un haltura di casi 3.700 meter riba e isla di Tenerife, dilanti di costa di Nort Africa. Pico de Teide, un sero volcanico cu ta duna e violeta su nomber, ta e punta mas halto y prominente di e isla subtropical. Ta parce manera cu e parti ariba di e sero no tin ningun vegetacion. Pero den lente, sneu di winter cu ta dirti ta percura net suficiente awa pa rebiba e violetanan tenaz aki y nan ta dorna garganta di e volcan cu un krans di flor lila. Si, e flor aki por parce fragil y delicado, pero e ta logra sobrevivi y asta bona den e ambiente desola y hostil aki.

Mescos cu e violeta di Teide, abo tambe por persevera meimei di circunstancianan desfaborabel. Bijbel a yuda hopi Testigo di Yehova haci esei asta durante e periodonan di mas dificil. Por ehempel, esnan cu tawata encarsela den camponan di consentracion di Alemania Nazi a logra prospera. Segun e periodista Sueco Björn Hallström, “nan a ser trata mas malo cu cualkier otro grupo, pero, mediante nan creencia den Dios, nan a logra sobrevivi miho cu cualkier otro.”

Sea cual sea e situacion cu bo ta den, Bijbel por yuda bo prospera meimei di dificultad. Tuma contacto cu Testigonan di Yehova den bo comunidad, of skirbi nan na e adres menciona na pagina 5 di e revista aki pa bo haya un studio di Bijbel gratis na cas.