Enfrentando e Desafionan di un Teritorio Unico

YA PA varios decada Testigonan di Yehova ta predica riba e reserva di indjan Navaho, situa den partinan di Arizona, New Mexico y Utah, na Merca. Na idioma Navaho, e ta conoci como Diné Bikéyah (pais di Navaho). E mas cu 220.000 indjannan di e nacion ei, cu na nan lenga ta ser yama Diné (e pueblo), ta un di e tribunan mas grandi di indjan Norte Americano.

Durante e añanan ei varios congregacion di Testigonan di Yehova a keda forma rond di un nucleo di hende homber y mohe Navaho cu tawata interesa den Bijbel. Actualmente, tin cuater congregacion riba e reserva: na Tuba City, Kayenta, Keams Canyon y Chinle. (Wak e mapa akibou.) Te cu poco tempo pasa cada un tawatin nan mes Salon di Reino, cu excepcion di e congregacion na Chinle, cu tawatin cu huur local di klas pa nan reuni aden. Pero awor e situacion a cambia.

Un Salon di Reino pa un Teritorio Unico

Diasabra 7 di juni 2003, tawata fecha di e dedicacion di e Salon di Reino di Chinle. E discurso di dedicacion a keda presenta pa Gerrit Lösch, un miembro di e Cuerpo Gobernante di Testigonan di Yehova. Den su discurso el a describi e gran aumento cu ta tumando luga mundialmente den e cantidad di Salonnan di Reino. Y sinembargo, manera el a splica, ainda falta miles di salon mas pa sirbi e mas cu 94.600 congregacionnan. Tambe el a presenta na e 165 personanan presente 15 punto pakico nan mester aprecia nan Salon di Reino nobo y e beneficionan di asisti regularmente na reunionnan cristian. El a conclui cu un oracion di dedicacion, pidiendo Yehova su bendicion riba e uzo di e excelente luga di reunion aki.

E congregacion aki anteriormente tawata un grupo cu a asocia cu Congregacion Keams Canyon, un 100 kilometer den direccion suitwest. Awor Congregacion Chinle tin e asignacion di predica e bon nobo di e Reino di Dios den un teritorio cu ta abarca 11.000 kilometer cuadra! Hopi Navaho ta biba den cas-caravan of den loke nan ta yama hogan, cu ta casnan cu tin seis of ocho banda. Pa yega na luganan aisla, ta esencial pa bo tin un vehiculo four-wheel-drive (esta, cu tur cuater wiel ta gara), specialmente pa yega na e casnan plama den Canyon de Chelly (pronuncia d’Shé), un parti fasinante di e teritorio di e congregacion.

Canyon de Chelly—Sagrado pa Navaho

E plateau- of mesetanan halto di Arizona ta conoci pa nan paisahenan cu espacio inmenso, aparentemente sin final, y cu careteranan largo cu ta manera disparce na horizonte. Canyon de Chelly ta djis un par di kilometer for di e Salon di Reino, riba e mesun caretera. E kloof (canyon) ta lora y bira atrabes di 40 kilometer di baranca steil cu ta cuminsa cu un haltura di 9 meter y gradualmente ta alcansa 300 meter. E area, apunta como monumento nacional, tur aña ta haya bishita di miles di turista. E pueblo Navaho ta considera e kloof aki, hunto cu Canyon del Muerto, como tera sagrado. Algun famia ta biba aki, isola den nan hogan traha di palo y lodo. Sinembargo, nan tur ta haya bishita di Testigonan di Yehova, kendenan ta trece literatura biblico pa nan den nan propio idioma.

Pa drenta e kloof, bo mester ta compaña pa un guia Navaho autorisa. Algun bishitante ta pasa door di dje na pia, y otronan ta bai riba cabai; pero mayoria bishitante ta crusa e kloof den vehiculo four-wheel-drive. E tipo di vehiculonan aki ta necesario pasobra e caminda hopi bes ta crusa door di Chinle Wash, cu ta fondo di un riu cu ta yena cu awa segun temporada. Tambe e guianan sa con pa evita drijfzand cu de bes en cuando ta traga un cabai of un pickup. Pero kico ta haci Canyon de Chelly asina interesante?

E historia di e kloof ta skirbi riba muraya di e barancanan stijl, sea pinta of graba riba piedra. Arkeologonan ta kere cu e famoso habitacionnan den e barancanan steil, construi den cuebanan habri grandi, a ser traha entre aña 350 y 1300 di nos era. Podise esun di mas famoso ta Ruina di Cas Blanco, cu nan ta yama asina debi na e muraya blanco di un di e edificionan. El a ser bandona door di e pueblo Anasazi (nomber Navaho pa “enemigo bieu”) rond di aña 1300. Expertonan ta kere cu ta te den siglo 18 numa indjannan Navaho a drenta e region aki.

Si bo bishita Canyon de Chelly, lo bo core riba caretera Navaho Route 7. Einan, den un bocht di e caretera un poco prome cu e Monumento Nacional, paga tino y lo bo mira skirbi riba un muraya “Jiihōvah Yádahalne’í bi Kingdom Hall” y “Kingdom Hall of Jehovah’s Witnesses” (Salon di Reino di Testigonan di Yehova). Bo ta bonbini pa pasa haci un bishita.

[Mapanan na pagina 20]

(Pa e teksto den su formato kompleto, wak e publikashon)

COLORADO

NASHON NAVAHO

ARIZONA

MONUMENTO NACIONAL DI CANYON DE CHELLY

Chinle

Kayenta

Tuba City

NACION HOPI

Keams Canyon

NEW MEXICO

UTAH

[Plachi na pagina 21]

Arkeologonan ta bisa cu podise un diesdos famia Anasazi a biba den e cas den baranca aki

[Plachi na pagina 22]

Hogan

[Plachi na pagina 22]

Canyon del Muerto

[Plachi na pagina 22]

Spider Rock na Canyon de Chelly