Mata Ta un Fuente Balioso di Remedi

Expertonan ta calcula cu un cuart di tur remedi moderno cu hende ta depende di dje a origina—completo of en parte—como kimico cu bo ta haya den mata. Hopi bes hende cu ta promove varios remedi di yerba ta menciona e echo aki.

Mayoria investigacion cu hende ta haci riba matanan medicinal ta cu e meta pa separa e ingredientenan cu tin un efecto terapeutico. Un ehempel principal di un ingrediente asina ta aspirin, cu ta ser deriva for di salicina, un substancia cu bo ta haya den e casca di palo di wilg blanco.

Unabes cu separa e ingredientenan terapeutico cu bo ta haya den un mata, docter por duna pashent e ingrediente den un dosis adecua y mas precis. Un buki di referencia a declara: “Ta hopi mas facil pa tuma un pildo pa logra bon resultado cu come substancia natural. Por ehempel, ta hopi mas trabou pa tuma suficiente casca di wilg pa logra e beneficionan cu aspirin ta duna of pa tuma suficiente blachi di vingerhoedskruid (foxglove) pa logra e pleno efectonan di salba bida cu digitalis [un ingrediente cu ta ser uza pa trata problema di curason] por tin.”

Di otro banda, ora separa e ingrediente terapeutico di un mata medicinal esei por tin su desbentahanan. Un di nan ta cu bo por perde tur otro beneficio nutritivo y posiblemente medicinal cu otro substancianan den e mata tin. Ademas, algun organismo cu ta causa malesa a bira resistente pa e remedi cu ta uza pa combati nan.

Kinina, un substancia deriva for di casca di e kinaboom, ta un ehempel di e desbentahanan di separa e ingrediente terapeutico di un mata medicinal. Aunke kinina ta mata un porsentahe grandi di parasit cu ta causa malaria, e parasitnan cu e no ta mata ta bira mas y mas hopi segun cu otro parasit ta muri. Un buki di referencia a splica: “E resistencia ei a bira un precupacion grandi den medicina.”

[Plachinan na pagina 23]

Aspirin ta ser obtene for di e palo aki di wilg blanco

[Reconocemento]

USDA-NRCS PLANTS Database/Herman, D.E. et al. 1996. North Dakota tree handbook

[Plachinan na pagina 23]

Kinaboom, for di cua nan ta obtene kinina

[Reconocemento]

Cortesia di Satoru Yoshimoto