Un Open House Memorabel

DI UN ESCRITOR DI SPIERTA! NA MEXICO

DIA 15 di maart 2003, delegadonan for di mas cu 40 pais a reuni djis pafo di Ciudad di Mexico pa e programa di dedicacion di e edificionan resien construi cu bo por mira riba e potretnan riba e paginanan aki. E edificionan aki di residencia y imprenta ta parti di e expansion mas resien di e sucursal di Testigonan di Yehova na Mexico.

Na 1974, tempo cu tawatin rond di 65.000 Testigo na Mexico, nan a dedica e prome edificionan di e sucursal na e sitio aki. Segun cu e cantidad di Testigo di Yehova na Mexico tawata crece drasticamente, nan a dedica mas edificio nobo na 1985 y atrobe na 1989. E construccionnan mas resien, cu ta consisti di mas cu diesdos edificio nobo, ta inclui un drukkerij inmenso y tambe edificionan di residencia cu lo por acomoda te cu 1.300 hende.

Dos siman despues di e programa di dedicacion, nan a tene un open house pa e biciñanan rond di sucursal. Nan a manda invitacion por escrito na entre otro autoridadnan local y tambe na studiante- y docentenan di un universidad resien funda cu ta keda na otro banda di caya. Hopi hende na sucursal tawata curioso pa sa ta cuanto hende lo acepta e invitacion.

Un Reaccion Cu Ta Duna Satisfaccion

En total 272 persona a reacciona, incluso studiantenan y funcionarionan di estado y di e municipio. Bishitantenan a comenta riba e bunitesa y limpiesa di e luga y a expresa aprecio pa e hospitalidad cu a ser demostra na nan. Un persona a skirbi den e buki di huespet: “Esaki ta mi prome bishita na boso luga. E ta una beyesa! Mi tawata admira y respeta boso caba, pero awor mi ta haci esei mas tanto ainda.”

Un otro bishitante a remarca: “Nos tawatin un impresion robes di loke tawata tuma luga aki. Tawatin rumornan ta circula tocante boso. . . . Pero loke mi ta mira awor a duna mi confiansa. Gustosamente lo mi ricibi boso den mi cas pasobra mi ta haya cu loke boso ta haci ta bale la pena.”

Un di e docentenan di e universidad, kende su mama ta Testigo, a bin bishita e sucursal cu dos klas di studiante. El a bisa: “Mi tawata kier pa e hobennan sa kico Testigonan di Yehova ta haci rond mundo. Nan por siña algun cos door di bishita e luga aki.” Ki efecto e bishita tawatin riba e studiantenan?

Un di nan a skirbi: “Danki pa boso hospitalidad. Tawata un dia inolvidabel pa mi y mi coleganan di scol.” Un otro studiante a remarca cu hende cu no ta scucha e Testigonan ora nan bishita nan, no tin ningun idea ken nan ta realmente. El a conclui: “Nos mester ta tolerante y habri pa otro cos.” Un mucha homber a bisa: “Mi tawatin completamente un otro idea di boso, pero awor mi ta mira cu boso ta apoya otro. Boso ta keda mescos cu fruminga, asina ocupa boso ta.”

Cuater agente policial di e cuerpo local tawata entre e bishitantenan. Un di nan, un polis mohe, a remarca: “Esaki ta impresionante. Aki no tin descriminacion. Esun cu ta limpia, e hardinero, tur hende ta igual. . . . Esaki ta maraviyoso.”

Dos mucha homber biciña, di nuebe y dies aña, a bisa: “E luga aki ta nechi, y hopi grandi.” “Loke ami a gusta mas ta e mashinnan. Nan ta masha lihe mes. Mi a gusta specialmente e mashinnan cu ta corta papel.”

Un docter, specialista den lesionnan grave, hunto cu su esposa y nan yiu mohe cu ta un studiante di universidad, tawata entre e bishitantenan. Durante e tour e casa di e docter a haci hopi pregunta biblico. El a conta cu su interes a lanta ora cu e Testigonan tawata bishita su tata, kende ta miembro di un religion evangelico. Su tata tawata bira furioso, mientras cu e Testigonan tawata keda calmo. “Awor mi ta compronde dicon”, e señora a declara.

E docter cu su famia a bisa cu nan bishita a cambia nan opinion di Testigonan. Tumando nota di nan interes, José, nan guia, a invita nan na e Conmemoracion di e morto di Cristo y a ofrece nan un studio di Bijbel. Nan a reacciona positivo, bisando cu gustosamente nan lo bin sucursal pa e studio.

E siguiente siman nan a bin, y José cu su casa, Beatriz, a keda emociona di por a ricibi nan den nan cuarto. E famia tawatin asina hopi pregunta cu e prome studio a dura tres ora y mei! Nan a asisti na e Conmemoracion dia 16 di april—hunto cu tata di e docter su casa—si, esun cu tawata bira furioso ora cu e Testigonan bishit’e!

Un motibo special di alegria tawata ora a anuncia e cantidad di literatura biblico cu e bishitantenan a bai cas cu ne: 500 pida, specialmente Bijbel. Algun bishitante a bisa cu nunca prome nan no tawatin un Bijbel.

Un señora cu ta biba den bicindario a bisa Armando, kende tawata encarga cu e stand di literatura biblico: “Djawe padilanti, lo mi join boso na boso reunionnan, pasobra mi sa cu esaki ta e berdad.” Un par di siman despues, Armando a keda contento di mira e señora aki na Salon di Reino. Armando a conta: “E tawatin e buki cu el a haya durante e open house. Ora mi a cumind’e, el a bisa mi: ‘B’a wak, mi ta haciendo loke m’a bisa bo cu mi ta bai haci.’”

E tres dianan di e open house a pasa lihe. Pero nan tawata sumamente edificante. Scuchando e comentarionan tocante e facilidadnan di sucursal for di boca di hende cu a bishita e luga pa prome biaha, a yuda e miembronan di sucursal haya mas aprecio ainda pa nan privilegio di por sirbi den un di e sucursalnan di Testigonan di Yehova.

[Plachinan na pagina 24, 25]

1. Edificio di garashi, 2. edificio di servicio na famia di Betel, 3. edificio di departamentonan di mantencion, 4. residencianan, 5. drukkerij, 6. sala di auditorio, 7. edificio pa ricibi bishitante

[Plachinan na pagina 25]

Centenares di hende a reacciona riba e invitacion pa e open house, incluso studiante y polis local