Observando Mundo

Animalnan di Otro Region Ta Invadi Spaña

“Mas cu cuarenta especie di animal di otro region for di diferente skina di e planeta a invadi Spaña via tera, lama y aire, causando devastacion na e flora y fauna nativo”, segun e corant Spaño El País. E lista di invasor ta inclui e pisca grote meerval (giant catfish) for di Alemania, zeewier asesino for di Caribe, prikichi for di Argentina y nerts (mink) for di Norte America. Hopi di nan a ser hiba Spaña pa ser bendi como mascota di pais exotico of pa algun otro motibo comercial. Algun bestia a hui for di nan doño, otronan a ser poni den libertad ora nan a bira un peso of ora a resulta cu nan no ta rendable. Biologo Daniel Sol a bisa: “Awendia, despues di perdida di habitat, ta especienan invasor ta e causa principal cu e especienan nativo ta mengua.”

Antidoto Contra Veneno di Colebra for di Webo

“Cientificonan di India a descubri cu webo di galiña por bira un fuente di molecule pa trata mordi di colebra”, segun The Times of India. Galiñanan di mas o menos 12 siman ta ser inyecta “den musculo cu un dosis di veneno cu no ta mortal” y despues di dos of tres siman ta inyecta nan cu un dosis adicional. Despues di 21 siman, nan ta cuminsa pone webo cu ta contene anticurpa cu ta neutralisa veneno. Investigadonan ta spera cu e antidoto aki saca for di webo por remplasa esun obteni for di cabai, ya cu cabai tin cu “pasa door di testnan doloroso pa colecta antidoto contra veneno di colebra”, segun The Times. Cientificonan na Australia ya caba a trece dilanti cu nan tawatin exito cu e tecnologia nobo aki den pruebanan haci riba bestia. Si e antidoto resulta efectivo pa hende, lo e ta un gran bentaha pa India, caminda tur aña nan ta registra 300.000 caso di mordi di colebra. Di esakinan, 10 porshento di e victimanan ta muri.

E Habilidad di Bula di Barbulet

E corant The Independent di Londen a bisa: “Pa hopi aña cientificonan tawata purba compronde ta kico ta haci barbulet expertonan di mobilidad na velosidad abou: nan por keda bula un caminda y bula bai patras of di banda, aparentemente cu masha tiki esfuerso.” Awor investigadonan na Universidad di Oxford ta kere cu porfin nan a descubri e secreto di e insecto. Nan a uza un tunnel aerodinamico specialmente diseña, den cua nan a pomp un tiki huma pa indica e coriente di aire, pa studia con barbulet di e tipo admiral cora ta bula. Segun cu e insectonan tawata bula bai y bin riba algun flor artificial den e tunnel aerodinamico, tawatin camaranan cu ta saca hopi potret pa seconde y cu a graba e fluho di aire rond di nan halanan. E investigadonan a descubri cu “e bulamento di barbulet no ta bai pa loco y sin rumbo, sino ta e resultado di e control completo cu nan tin riba un variedad grandi di mecanismo aerodinamico.” Cientificonan ta spera di por uza e conocemento aki pa traha avionnan chikito cu un hanchura di 10 centimeter di un hala pa otro, dirigi pa control remoto. Si ekipa e avionnan aki cu un camara, nan lo por bula den luganan hopi preta y saca potret pa hende mira.

Insomnio na Italia

Durante aña 2002, mas cu 600 docter y mas cu 11.000 pashent a participa den e estudio mas extenso cu nan a yega di haci na Italia tocante insomnio (problema cu drumimento anochi). E estudio a revela cu mas cu 12 miyon Italiano ta sufri di insomnio, segun e corant La Stampa. Di e hendenan cu nan a studia, 65 porshento ta suf of yen di soño durante mainta y 80 porshento ta suf of yen di soño na un momento dado durante dia, y 46 porshento tin dificultad pa consentra na trabou. Segun e corant: “Esnan cu ta core auto tin hopi chens di causa daño, ya cu 22 porshento di accidente den trafico ta ser causa door di hende cu tawatin soño.” Tambe e estudio a mustra cu 67 porshento di hende cu ta sufri di insomnio nunca no a papia cu nan docter tocante e problema. Cordinado di e estudio, Mario Giovanni Terzano, a bisa cu “pa por lo menos 20 porshento di e hendenan cu ta sufri di insomnio, esei ta e malesa principal cu nan tin y pa cua aparentemente no tin un causa.” Sinembargo, un examen medico lo por revela cu tin un problema fisico conecta cu ne. Otro causanan di insomnio, segun Terzano, ta entre otro ansiedad (24 porshento), susesonan angustioso (23 porshento) y depresion (6 porshento).

Antilop Saiga Menasa cu Extincion

“Na 1993, tawatin mas cu un miyon antilop ta biba den e sabananan extenso di Rusia y Kazakhstan. Awe, a resta menos cu 30.000”, segun e revista New Scientist. E antilop a bira victima di “un epidemia di yagmento ilegal”, segun e informe. “Biologonan ta bisa cu esaki ta e reduccion di poblacion mas repentino y drastico di un mamifero grandi cu hamas nan a mira.” Con bin e yagmento ilegal a aumenta? Na principio di decada di 1990, conservacionistanan cu tawata precupa pa neushoorn cu tawata ser menasa cu extincion, a promove cacho di antilop saiga como un substituto pa cacho di neushoorn den medicina tradicional di China. Pero como cu e antilop ya a disparce for di China, hende a cuminsa yag riba e tounan den Asia central. Den cinco aña (1993-98), e cantidad di bestia a bira casi mita, y pa 2002 e poblacion a baha cu 97 porshento. E parti central di Kazakhstan a mira un perdida di 99 porshento. Ta 4.000 antilop saiga so a resta einan. Abigail Entwistle, un zoologo di e organisacion Flora y Fauna Internacional, a bisa: “Nos ta kere cu probablemente nos tin dos aña so pa scapa e especie.”

Mente, Emocion y Salu

Loke ta pasa den bo mente kisas tin un efecto hopi mas grandi riba bo curpa cu anteriormente expertonan a kere, segun un informe den e revista Polaco Wprost. E articulo a bisa: “Pensamento y emocion ta afecta tur organo vital y sistema di e curpa humano: sistema nervioso, di inmunidad, hormonal, circulatorio y reproductivo.” Pesei, segun Profesor Marek Kowalczyk di e Instituto Militar di Higiena y Epidemiologia na Varsovia, “hende cu ta hiba un bida yen di stress ta sufri dos biaha mas tanto di ferkout y grip cu otro hende.” Y el a agrega cu hende mohe deprimi, ta reduci nan chens di sali na estado cu 50 porshento. Tambe Wprost a informa cu maske stress kisas no ta causa cancer, e “por acelera e desaroyo di cancer inactivo.” Rabiamento tambe por perhudica salu, pasobra nan ta kere cu bou di hende agresivo y hostil tin mas caso di malesa di curason, y esei ta haci nan mas vulnerable pa atake di curason.

Benta Legal di Ivor

Den dies aña so, di 1979 pa 1989, e poblacion di olifanti na Africa a ser reduci na mita. Un motibo di esaki tawata e creciente demanda pa productonan traha di e ivor di nan dos djente grandinan. Un otro motibo tawata e aumento di arma automatico serca yagdonan ilegal. Como resultado, na 1989 e Tratado Encuanto Traficacion Internacional di Sortonan di Animal y Mata Menasa (CITES) a pone un prohibicion completo riba benta di ivor. Sinembargo, resientemente CITES a bai di acuerdo pa permiti Sur Africa, Botswana y Namibia tene pa un solo biaha e benta di un total di 60 ton di ivor, segun e revista African Wildlife. E ivor a ser confisca for di yagdonan ilegal of kita for di bestianan cu a muri un morto natural. Dos otro pais si no tawatin mag di bende nan ivor pasobra “nan no a presenta suficiente garantia cu nan lo preveni benta ilegal di ivor”, segun e articulo.