Un Cara Nobo pa Mailyn

SEGUN E RELATO DI MAILYN SU MAMA

Dicon Mailyn, mi dushi yiu mohe di 11 aña tawatin mester di un cara nobo? Laga mi splica bo.

Mailyn ta esun mas chikito di mi dos yiu mohenan. El a nace na Holguin, Cuba, dia 5 di augustus 1992. Ami cu su tata y su ruman mohe tawata masha contento cu su nacemento. Pero nos felicidad lo no a dura largo. Un par di dia despues cu el a nace, mi a haya sendepaga, y un luna despues, Mailyn a hay’e.

Na principio, su condicion no a parce di ta dje serio ei; pero el a bira piyo y mester a intern’e den hospital. Mailyn a haya bon atencion medico, pero su resistencia a baha asina tanto cu el a haya un infeccion. Mi a ripara cu un banda di su nanishi chikito a bira un cora straño. E docternan a identifica e causa como un tipo di bacteria cu rara bes bo sa mira pero masha agresivo.

Nan a dun’e antibiotica mesora, pero apesar di esei e bacteria den un par di dia a cuminsa destrui su cara. Pa ora cu e docternan a logra para e infeccion, Mailyn a perde su nanishi y lipnan casi completamente y parti di su carni di djente y cachete. Tambe e tawatin buraco banda di un di su wowonan.

Ora ami cu mi casa a wak e, nos a grita yora. Con un cos asina por a pasa cu nos yiuchi? Mailyn a keda den cuido intensivo pa varios dia, y docternan a pensa cu lo e no a sobrevivi. Mi casa tawata blo bisa mi: “Prepara bo pa lo piyo.” Sinembargo, ora mi tawata hinca mi man den e couveuse pa tene Mailyn su man chikito, e tawata tene mi man asina duro cu mi tawata sa cu lo e sobrevivi. Mi tawata bisa mi casa: “Nos yiu no ta bai muri. Pero den su condicion, ta ki sorto di bida Mailyn lo tin?” Tur mainta ora nos lanta, nos a pensa cu kisas tur esaki tawata simplemente un soño desagradabel.

Mientras cu nos tawata na hospital, nos yiu mohe Maydelis, cu tawatin seis aña e tempo ei, a keda serca mi mayornan. E tawata spera ansiosamente pa su ruman chikito bin cas bek. El a mira Mailyn sali cas manera un “popchi” bunita cu wowo blou grandi. Pero ora Maydelis a bolbe mira su ruman chikito, Mailyn su cara tawata monstruoso.

‘Dicon Mi Baby Tin Cu Sufri Asina Tanto?’

Despues di un luna y mei den hospital, Mailyn por a bai cas. Nos no a bai bek na nos cas den stad pasobra nos no tawata kier pa ningun hende mir’e. Nos a aisla nos mes den un cas chikito den cunucu, pega cu e hacienda di mi mayornan.

Na principio mi por a duna Mailyn lechi di pecho na cantidad chikito via e buraco den su cara caminda antes tawata su boca. E no por a chupa. Sinembargo, ora cu e heridanan a cuminsa cura, e buraco ei a sera casi completamente. Mi por a dun’e solamente cuminda likido na boter. Ora e tawatin un aña, nos a bai bek Holguin, caminda docternan a haci cuater operacion pa hancha e buraco.

Mi tawata puntra mi mes: ‘Dicon mi baby tin cu sufri asina tanto?’ Mi a busca e contesta den centronan spiritista y a resa na mi imagennan religioso. Pero nada no a duna mi consuelo. E comentarionan doloroso di algun famia y amigo a confundi mi asta mas. Algun a bisa: “Dios sa pakico e ta permiti e cosnan aki.” Otronan a bisa mi: “Sigur esaki ta un castigo di Dios.” Tambe mi tawata precupa hopi ta kico lo mi bisa Mailyn ora cu e bira mas grandi. Un biaha, tempo cu Mailyn tawata hopi chikito ainda, el a puntra su tata: “Dicon ami no tin nanishi mescos cu tur hende?” Su tata no por a contesta y a sali pafo bai yora. Ami a purba splic’e kico a pasa. Te ainda e ta corda cu mi tawata bis’e cu ta un bestia hopi chikito a come su nanishi cu su boca.

Un Base pa Speransa

Net ora cu mi tawata sinti mi totalmente frustra, mi a corda cu mi biciña tawata un Testigo di Yehova. Mi a puntr’e pa mustra mi den Bijbel dicon Dios a permiti mi yiuchi sufri asina tanto. Tambe mi a puntr’e: “Si e malesa aki realmente ta un castigo di Dios pa algo cu mi a haci, dicon ta Mailyn tin cu paga e castigo?”

Mi biciña a cuminsa studia Bijbel cu mi, uzando e buki Bo por biba pa semper den Paradijs riba tera.a Pocopoco, mi a cuminsa compronde cu nos no tin cu culpa Dios pa loke a sosode cu Mailyn y cu Dios realmente ta interesa den nos. (Santiago 1:13; 1 Pedro 5:7) Mi a cuminsa aprecia e speransa maraviyoso cu bou di e gobernacion di Dios su Reino celestial den man di Hesucristo, sufrimento lo ser elimina. (Mateo 6:9, 10; Revelacion 21:3, 4) E conocemento aki a fortalece mi y a motiva mi pa asisti na e reunionnan cristian di Testigonan di Yehova. Na prome instante, mi casa no a gusta mi interes spiritual nobo. Sinembargo, e no a stop mi di studia Bijbel, tanten cu esei a yuda mi soporta nos tragedia.

Yudansa for di Exterior

Ora cu Mailyn tawatin dos aña, un ciruhano plastico prominente di Mexico a tende di su caso y a ofrece pa trat’e gratis. Na 1994, el a haci e prome operacionnan. Ami cu Mailyn a keda Mexico casi un aña. Na principio nos no por a drenta den contacto cu Testigonan di Yehova, y pesei nos no por a asisti na reunionnan cristian. Esaki a debilita mi spiritualmente. Despues, un Testigo local a tuma contacto cu nos, y nos a cuminsa asocia atrobe mas tanto posibel cu e rumannan den fe. Ora mi a regresa Cuba, mi a reanuda mi studio di Bijbel y a recupera spiritualmente.

Mi casa na e tempo ei ainda no tawata interesa den Bijbel. Den un intento pa lanta su interes, mi a cuminsa pidie lesa cierto partinan pa mi for di publicacionnan basa riba Bijbel ya asina mi por a compronde nan miho. Cu tempo el a ser motiva pa acepta un studio di Bijbel, pasobra e tawata precupa cu e biahenan largo y frecuente pa Mexico, lo por a daña nos relacion familiar. El a pensa cu si nos ta comparti e mesun interesnan spiritual, esei lo a yuda nos soporta e periodonan di separacion mas miho. Y en berdad esei a yuda nos. Ami cu mi casa y mi yiu mohe mayo a batisa como Testigo di Yehova na 1997.

Durante nos prome estadianan na Mexico, Mailyn tawata bisa cu si e bestia hopi chikito no a come su cara, nos lo no mester a bai laga su tata cu su ruman mohe. Tawata masha doloroso cu e famia mester a biba leu for di otro pa periodonan largo asina. Sinembargo, mi ta corda specialmente un bishita cu nos a haci na e sucursal di Testigonan di Yehova na Mexico, yama Betel, y cu a anima nos masha hopi. Mailyn tawata blo bisa cu e no kier pa nan bolbe oper’e—pa di cinco biaha durante e estadia ei—pasobra e periodo di recuperacion tawata hopi doloroso. Pero algun Testigo cu tawata sirbi na e sucursal a bis’e cu si e mustra curashi y laga e docternan oper’e, nan lo tene un fiesta p’e ora e sali for di hospital. Asina el a bai di acuerdo pa opera.

Laga Mailyn describi con el a sinti: “Mi tawata masha emociona cu e idea di un fiesta na Betel. Pesei mi a mustra hopi curashi durante operacion. E fiesta tawata emocionante, cu masha hopi ruman homber y ruman mohe. Nan a duna mi hopi carchi, y te ainda mi tin nan. E animacion cu mi a haya a duna mi e forsa pa wanta e siguiente operacionnan.”

Progreso y Yudansa pa Persevera

Mailyn, cu awor tin 11 aña, a haci 20 operacion pa reconstrui su cara. Aunke nan a yud’e hopi, ainda e no por habri su boca completamente. Sinembargo, semper e tawatin un actitud optimista y di curashi. Tambe el a demostra hopi aprecio pa cosnan spiritual. For di ora cu e tawatin seis aña, el a inscribi den e Scol di Ministerio Teocratico na nos congregacion local, y el a batisa dia 27 di april 2003. Un tempo e tawata conduci asta tres studio. Un biaha, tempo cu nos tawata na Mexico, el a papia cu un cabayero cu a bai di acuerdo pa Mailyn studia cu ne. Mailyn a invit’e na Conmemoracion di e morto di Cristo y na otro reunionnan di congregacion, y el a asisti na nan cu hopi interes.

Ora cu Mailyn ta predica di cas pa cas, tin hende sa wak su cara y puntr’e si ta kima el a kima. Mailyn ta probecha di e oportunidad pa comparti cu nan su speransa biblico cu Yehova lo dun’e un cara nobo den e Paradijs benidero.—Lucas 23:43.

Mi no tin palabra pa describi e dolor cu Mailyn a sufri door di e operacionnan y door cu muchanan ta tent’e. Kico a yud’e persevera? Mailyn ta contesta cu un siguransa: “Yehova ta masha real pa mi. E ta duna mi e forsa y curashi pa persevera. Mi no kier haci mas operacion pasobra docternan no por haci hopi pa mi aworaki. Nunca nan lo no por haci mi cara manera e tawata ora cu mi a nace. Pero mi sa cu Yehova ta bai duna mi un cara nobo den e mundo nobo y lo mi ta bunita atrobe.”

[Nota]

[Comentario na pagina 26]

“Yehova ta bai duna mi un cara nobo den e mundo nobo”

[Comentario na pagina 27]

Pocopoco, mi a cuminsa compronde cu nos no tin cu culpa Dios