Midiendo Tera cu un Pida Palo

BO A yega di tende di Eratostenes, un matematico y astronomo Griego? Su nomber probablemente ta mas conoci serca astronomonan. Dicon e ta asina bon mira serca nan?

Eratostenes a nace rond di aña 276 prome cu nos era y a haya parti di su educacion na Atenas, Grecia. Sinembargo, el a pasa un gran parti di su bida na Alehandria, Egipto, cu e tempo ei tawata bou di mando di Grecia. Rond di aña 200 prome cu nos era, Eratostenes a cuminsa aberigua e tamaño di e tera door di uza un simpel palo. Kisas bo ta bisa: ‘Esei ta imposibel!’ Wel, con el a hacie?

Den e stad Sevene (yama awor Aswan), Eratostenes a observa cu 12 or di merdia riba e prome dia di zomer, solo tawata stret ariba. E tawata sa esaki pasobra ora rayo di solo yega den fondo di posnan hundo e no tawata tira sombra. Sinembargo, 12 or di merdia riba e mesun dia den e stad di Alehandria, cu tawata keda 5.000 stadiona panort di Sevene, si bo por a mira sombra. Esaki a duna Eratostenes un idea.

Eratostenes a uza un simpel palo recht cu el a pone para vertical. Ora cu 12 or di merdia solo tawata stret ariba, el a midi e angulo di e sombra cu e palo a tira na Alehandria. El a determina cu e angulo tawata 7,2 grado for di vertical.

Wel, Eratostenes tawata kere cu mundo ta rondo, y e tawata sa cu tin 360 grado den un circulo. Pesei el a dividi 360 door di e angulo di 7,2 cu el a midi. E resultado? E angulo tawata un 50 parti (0,02) di un circulo completo. Anto el a yega na e conclusion cu e distancia for di Sevene pa Alehandria—cu tawata 5.000 stadion—mester ta igual cu un 50 parti di e circunferencia of omtrek di mundo. Door di multiplica 50 cu 5.000, Eratostenes a yega na e cifra di 250.000 stadion como e omtrek di mundo.

Con serca e cifra ei tawata di calculacionnan actual? E cifra di 250.000 stadion ta igual na entre 40.000 pa 46.000 kilometer segun nos midinan actual. Astronomonan, uzando navenan espacial, a midi e omtrek di e tera di Polo Norte pa Polo Sur y a yega na 40.008 kilometer. Pues, mas cu 2.000 aña pasa, Eratostenes a yega asombrosamente serca di e cifra moderno. Su exactitud ta mas remarcabel ainda ora bo pensa cu e homber a uza solamente un pida palo y rasonamento geometrico! Awe astronomonan ta uza e metodo geometrico aki como base pa midi distancianan pafo di nos sistema solar.

Tin hende ta haya cu ta specialmente remarcabel cu Eratostenes tawata sa cu mundo ta rondo. Con cu bai bin, te cu un par di shen aña pasa, asta algun homber sabi den ciencia tawata kere cu tera ta plat. E Griegonan di antiguedad a deduci ki forma mundo tin a base di nan observacionnan cientifico. Sinembargo, rond di 500 aña prome cu Eratostenes, un profeta Hebreo a skirbi bou di inspiracion: “Ta E [Dios] ta sinta mas ariba di e circulo di tera.” (Isaias 40:22) Isaias no tawata un cientifico. Con e por a sa cu tera ta rondo? Inspiracion dibino a revela e berdad aki na dje.

[Nota]

[Plachi na pagina 1]

[Nota]

[[Diagram na pagina 16]

(Pa e teksto den su formato kompleto, wak e publikashon)

Rayo di solo

Sevene

7,2°

Alexandria

7,2°