E “Hoya di Lama”

Den tur oceano na mundo bo ta haya masha hopi diatomea. Nan ta zeewier microscopico cu ta crece den cocolishi di glas cu tin diseño masha bunita y complica. Ya pa hopi siglo nan tin cientificonan fasina, de echo, for di tempo cu nan a inventa microscop y hende por a mira nan bunita diseño y pint’e. Cu rason nan ta yama diatomea e hoya di lama.

Alfred Nobel, kende a inventa dinamit den decada di 1860, a uza e substancia siliciumdioxide (of silica) for di diatomea pa stabilisa nitroglicerina, y esei a haci posibel cu e por a traha bara portatil di dinamit. Awendia hende ta uza fossiel di diatomea (cocolishi di glas cu a bira duro den baranca) den hopi producto comercial, por ehempel, pa laga ferf di pinta caya briya anochi, pa purifica biña y pa filtra awa di pisina.

Pero hopi mas importante ta e echo cu e matanan hopi chikito aki cu ta consisti di un solo cel, ta responsabel pa un cuarta parti di e proceso di fotosintesis cu ta tuma luga riba nos planeta. E investigadonan Allen Milligan y Francois Morel, di Universidad di Princeton na Merca, a descubri cu e siliciumdioxide den e cocolishi di glas di e diatomea ta causa cambionan kimico den e awa cu tin den dje, locual ta crea un ambiente ideal pa fotosintesis. Cientificonan ta kere cu e motibo pakico e glas aki tin forma asina complica ta pasobra di e manera ei un superficie mas grandi paden di e cocolishi ta keda exponi na awa, locual ta haci fotosintesis mas eficiente. Con precis e cocolishinan hopi chikito pero bunita aki ta ser forma di silicon larga den awa di lama, ta un misterio ainda. Pero loke investigadonan si sa ta cu door di absorba kooldioxide y saca oxigeno, diatomea ta hunga un papel masha importante den sostene bida riba tera, un papel kisas asta mas importante cu mayoria mata riba tera.

Morel a cualifica diatomeanan “entre e organismonan mas exitoso riba tera.” Milligan a agrega cu sin nan hamber feros pa kooldioxide, “e keintamento mundial lo por ta mucho mas piyo.”

Ora diatomea muri, nan restonan di carbon ta sak bai den fondo di oceano y cu tempo ta bira fossiel. Tin cientifico ta kere cu ta ora cu diatomea bira fossiel den baranca, y bou di presion intenso, nan ta yuda produci e reservanan di petrolio na mundo. Sinembargo, tin creciente precupacion cu segun cu e temperatura di awa di lama ta bira mas cayente debi na e keintamento mundial, esei ta pone cu bacteria ta come e restonan di diatomea prome cu nan por sak bai den fondo, y carbon ta bai bek na superficie di awa. Pues, asta e “hoya di lama” hopi chikito aki ta parti di un sistema di sostene bida maraviyosamente diseña, cu awor lo por ta den peliger.

[Reconocemento pa Potret na pagina 17]

© Dr. Stanley Flegler/Visuals Unlimited