“Nan Amor A Touch Nos Curason”

RIBA diasabra 25 di april 2015, un temblor di un magnitud di 7,8 riba scala di Richter a sacudi Nepal. Nepal ta un pais montañoso cu ta keda panort di India. E temblor a tuma luga mas o menos 80 kilometer noordwest di e capital Kathmandu. Lastimamente mas cu 8.500 hende a muri. Esaki tabata e desaster natural cu a causa mas tanto morto den historia di Nepal. Ademas, e temblor a destrui mas cu mey miyon cas. Mayoria di e 2.200 testigonan di Jehova na Nepal tabata biba den e area caminda e temblor a tuma luga. Lamentablemente, un Testigo y su dos yiunan a perde nan bida.

Un Testigo cu yama Michelle a bisa: “E temblor a sosode net ora cu e congregacionnan den e areanan caminda e temblor a causa mas tanto daño tabatin nan reunionnan cristian. Si e temblor a tuma luga ora mayoria di Testigo tabata na cas, mas Testigo lo a perde nan bida.” Dicon esnan cu tabata na reunion a scapa? Wel, e diseño di e Salonnan di Reino a hunga un papel masha importante den esey.

“AWOR SI NOS TA COMPRONDE DICON”

E Salonnan di Reino moderno na Nepal ta diseña pa wanta temblor. Man Bahadur, kende ta traha den construccion di Salon di Reino, a bisa: “Hopi biaha hende a puntra nos ta dicon nos ta traha un fundeshi asina fuerte pa un edificio relativamente chikito. Awor si nos ta compronde dicon.” Despues di e temblor, Testigonan cu ta supervisa e trabou na Nepal a duna aprobacion pa Salonnan di Reino fungi como shelter. A pesar cu tabatin varios temblor leve despues di esun principal, testigonan di Jehova y nan bisiñanan tabata sinti nan mes sigur den e shelternan ey.

Di biaha e ancianonan cristian a cuminsa busca e miembronan di congregacion cu nan no por a haya. Un Testigo cu yama Babita a bisa: “E ancianonan a pone bienestar di e congregacion prome cu esun di nan mes. Nan amor a touch nos curason.” Un dia despues di e temblor, tres miembro di e comite cu ta supervisa e trabou di testigonan di Jehova na Nepal hunto cu e superintendentenan biahero, of sirbidornan di circuito, a cuminsa bishita e congregacionnan pa nan evalua kico ta e necesidadnan y pa sostene e ancianonan local.

Seis dia despues di e temblor, Gary Breaux, di e oficina principal di testigonan di Jehova cu ta keda na Merca, a bishita Nepal, acompaña pa su esposa Ruby. Ruman Reuben, un miembro di e comite cu nos a caba di menciona, a bisa: “Pa motibo di e confusion cu tabata reina na Kathmandu y e temblornan leve cu a sigui despues, nos no tabata sigur si Ruman Breaux lo por logra yega. Pero e tabata determina pa yega aki, y nos ta contento cu el a logra! Y e Testigonan local a aprecia su bishita masha hopi mes.”

“NOS A BIRA MAS PEGA CU NOS FAMIA SPIRITUAL”

Silas, kende ta traha den e oficina di testigonan di Jehova na Nepal, a bisa: “Asina cu telefon tabata traha atrobe, el a cuminsa ring pa baster. Testigonan di Jehova rond mundo tabata preocupa pa nos. Y maske algun di nan ta papia idiomanan cu nos no ta compronde, nos a sinti cu nan ta stima nos y ta cla pa duna nos un man.”

Despues di e temblor, pa varios dia, e Testigonan local tabata trece cuminda pa esnan cu tabata kedando na e Salon di Reino. Ademas, un poco despues cu a forma un Comite di Auxilio, articulonan di primera necesidad a cuminsa drenta Nepal, principalmente for di Bangladesh, India y Japon. Y despues di un par di dia, un team medico di Testigo di Europa a yega y a habri un centro medico na un di e Salonnan di Reino. Di biaha nan a pone man na obra; nan tabata samina e condicion fisico di e victimanan y tambe nan tabata yuda nan cu nan dolor emocional.

E palabranan di un señora cu yama Uttara ta duna nos un idea con hopi Testigo a sinti. Uttara a bisa: “E temblor tabata horibel y spantoso. Pero despues, nos a bira mas pega cu nos famia spiritual.” Si, e amor di e sirbidornan di Jehova no a fria pa motibo di e temblor. Al contrario, nan a haya mas amor pa Jehova y pa nan rumannan den fe.