Relacion cu Dios

E prome articulo di e revista aki a bisa cu hopi hende ta considera Bijbel como un buki di Dios. Nan ta ripara cu ora nan lesa Bijbel y ta aplica su consehonan, nan ta sinti nan mes mas cerca di Dios y nan ta haya sa kico ta e proposito di bida.

Bijbel ta bisa cu hende spiritual of cu ta interesa den nan relacion cu Dios ta balora Dios su punto di bista y ta biba di acuerdo cu su normanan. Di otro banda, hende cu no ta spiritual ta depende riba nan mes opinion y ta sigui nan mes deseo.—Judas 18, 19; Efesionan 5:1.

SPERANSA

PRINCIPIO DI BIJBEL: “Si bo desmaya [of, desanima] den e dia di angustia, bo forsa ta keda limita.”—Proverbionan 24:10.

LOKE ESAKI TA ENCERA: Desanimacion por kita nos forsa pa por deal cu problemanan di bida. Pero speransa por duna nos forsa pa sigui padilanti. Ora nos tin speransa, esey ta recorda nos cu e problemanan cu nos ta enfrenta ta temporal y cu algo bon por sali for di situacionnan dificil.

LOKE BO POR HACI: Purba di pensa riba e cosnan bon cu lo pasa den futuro. En bes di preocupa tocante kico por pasa of warda pa un circunstancia perfecto presenta, haci esfuerso pa logra bo metanan awor. Ta berdad cu semper algo inespera por sosode. (Eclesiastes 9:11, NW) Pero hopi biaha, cos por resulta mas mihor di loke nos a spera. Pa ilustra esey, Bijbel ta bisa: “Sembra bo simia mainta, y no keda sin haci nada atardi; pasobra bo no sa si sembramento di mainta of di atardi lo tin exito, of si nan tur dos lo ta bon.”—Eclesiastes 11:6.

BUSCA CONTESTA PA PREGUNTANAN IMPORTANTE DI BIDA

PRINCIPIO DI BIJBEL: “Duna mi comprondemento ... Bo palabra den su totalidad ta berdad.”—Salmo 119:144, 160.

LOKE ESAKI TA ENCERA: Bijbel tin contesta pa preguntanan cu casi tur hende sa haci. Por ehempel:

Di unda nos a bin?
Kico ta e proposito di bida?
Kico ta pasa cu nos ora nos muri?
Ta e bida aki so tin?

Miyones di hende rond mundo a haya contesta den Bijbel pa e preguntanan aki y pa hopi otro mas. Y awor nan ta hopi mas feliz.

LOKE BO POR HACI: Nos ta anima bo pa analisa kico Bijbel ta siña. Pidi un testigo di Jehova pa yuda bo compronde Bijbel. Bishita nos website, jw.org, of asisti na un di nos reunionnan. Entrada ta gratis y no ta pasa collect.

OTRO PRINCIPIONAN DI BIJBEL

Un hende muher ta wak e video Dicon Analisa Loke Bijbel Ta Bisa? riba jw.org — Wak e video *Dicon Analisa Loke Bijbel Ta Bisa?* riba jw.org. E ta disponibel na mas cu 880 idioma

RECONOCE CU NOS TIN MESTER DI DIOS.

“Feliz ta esnan cu ta consciente cu nan tin mester di Dios.”—MATEO 5:3, nota.

SIÑA MAS TOCANTE E DIOS DI BIJBEL.

“Busca Dios ... y realmente hay’e ... E no ta masha leu for di cada un di nos.”—ECHONAN 17:27.

LESA BIJBEL Y MEDITA RIBA DJE.

“Ma su delicia ta den e ley di SEÑOR, y den su ley e ta medita di dia y anochi ... Tur loke cu e haci ta prospera.”—SALMO 1:2, 3.