Hende A Traha un Toren grandi

HOPI aña a pasa. E yiunan di Noe a haya hopi yiu. Y nan yiunan a crece y nan a haya mas yiu. Pronto tabatin hopi hende riba Tera.

Un di nan tabata un bisanieto di Noe, yama Nimrod. E tabata un mal hende cu a yag y mata tanto bestia como hende. Ademas, Nimrod a haci su mes Rei pa e manda riba otro hende. Dios no a gusta Nimrod.

Tur e hendenan di e tempo ei tabata papia un idioma so. Nimrod kier a tene nan tur hunto pa e por domina nan. Pues, bo sa kico el a haci? El a manda e pueblo traha un stad y un toren grandi den dje. Wak nan traha bloki riba e plachi.

Jehova Dios no a gusta loke nan tabata traha. Dios tabata kier pa hende plama y biba tur caminda riba Tera. Pero e pueblo a bisa: ‘Ban! Laga nos traha un stad y un toren asina halto cu su top ta yega te den shelo. Anto nos lo bira famoso!’ Nan a desea honor pa nan mes y no pa Dios.

P’esei, Dios a haci hende bandona trahamento di e toren. Bo sa con Dios a haci esei? El a pone e hendenan cuminsa papia otro idioma diripiente en bes di uno so. E trahadonan no a compronde otro mas. P’esei nan stad a yega di ser yama Babel, of Babilonia, cu kiermen “Confusion.”

Awor hende a cuminsa bandona Babel. Grupo di hende cu a papia e mesun idioma a bai biba hunto na otro parti di Tera.