E Mundo Nobo Pacifico di Dios —Abo Por Biba den Dje

DIOS a pone Adam cu Eva den hofi di Eden. Maske nan a desobedece Dios y muri, Dios a percura pa nan yiunan si por biba pa semper den Paradijs, y nos tambe. Bijbel ta priminti cu “e hustonan lo hereda e tera, y lo biba den dje pa semper.”—Salmo 37:29.

Bijbel ta papia di “shelonan nobo” y “un tera nobo.” (Isaias 65:17; 2 Pedro 3:13) E “shelonan” cu tin awor ta e gobiernonan di hende cu tin awendia. Pero Hesucristo y e otronan cu ta bai reina cu ne den shelo lo bira un ‘shelo nobo’, esta, un gobierno nobo y husto di Dios cu lo trece pas. E gobierno aki ta bai goberna henter mundo. Esta dushi lo ta ora e dia ei yega, no!

Anto, kico e “tera nobo” ta?— E tera nobo lo ta e bon hendenan cu ta stima Yehova, pasobra tin biaha ora Bijbel ta papia di “tera”, e kiermen e hendenan cu ta biba riba tera, y no e tera mes. (Genesis 11:1; Salmo 66:4; 96:1) Pues, e hendenan cu ta forma e tera nobo ta bai biba aki riba mundo mes.

E tempo ei, e mundo di mal hende cu tin awor aki lo no t’ei mas. Corda cu e Dilubio di tempo di Noe a caba cu henter un mundo di mal hende. Y manera nos a siña caba, Armagedon lo destrui e mundo malo cu tin awor aki tambe. Awor, laga nos ban wak con bida lo ta den Dios su mundo nobo despues di Armagedon.

Abo kier biba pa semper den Paradijs den e mundo nobo pacifico di Dios?— Ningun docter no por haci nos biba pa semper. No ta existi ningun remedi cu por pone nos biba sin muri nunca. Ta un manera so tin pa nos biba pa semper: nos mester hala serca Dios. Y e Gran Maestro ta siña nos con pa haci esaki.

Laga nos coi nos Bijbel anto habrie na Huan capitulo 17, versiculo 3. Aki nos por lesa e siguiente palabranan di e Gran Maestro: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.”

Kiermen, kico Hesus a bisa cu nos mester haci pa nos biba pa semper?— Prome nos mester siña conoce nos Tata den shelo Yehova, y tambe su Yiu cu a duna su bida pa nos. Esei kiermen cu nos mester studia Bijbel. E buki aki, Siña for di e Gran Maestro, ta yudando nos haci esei.

Pero dicon nos tin cu siña tocante Yehova pa nos por biba pa semper?— Wel, mescos cu nos tin mester di cuminda tur dia, nos mester siña tocante Yehova tur dia tambe. Bijbel ta bisa: “Hende lo no biba di pan so, ma di tur palabra cu sali for di boca di Dios.”—Mateo 4:4.

Nos mester siña conoce Hesucristo e Yiu di Dios tambe, pasobra Dios a mand’e pa kita nos pica. Bijbel ta bisa: “No tin salbacion den ningun otro.” Y tambe Bijbel ta bisa: “Esun cu kere den e Yiu tin bida eterno.” (Echonan 4:12; Huan 3:36) Ma nos ta kere di berdad berdad den Hesus? Nos tin sigur cu sin dje nos no por biba pa semper?— Si nos ta kere den dje di berdad, nos lo sigui siña for di e Gran Maestro tur dia, y nos lo haci loke e ta bisa tambe.

Un bon manera pa nos siña for di e Gran Maestro ta door di lesa e buki aki di nobo cada bes, wak tur e plachinan y pensa riba nan. Wak si bo por contesta e preguntanan cu tin na e plachinan. Y lesa e buki cu bo mama of bo tata. Si bo mama cu bo tata no por, les’e cu otro hende grandi y cu otro mucha. Lo no ta hopi dushi si bo por yuda otro hende siña for di e Gran Maestro pa nan haya sa loke nan mester haci pa nan por biba pa semper den e mundo nobo di Dios?—

Bijbel ta bisa nos: “E mundo ta pasa bai.” Ma despues di esei Bijbel ta splica nos kico nos mester haci pa nos biba pa semper den e mundo nobo di Dios. E ta bisa: ‘Esun cu haci e boluntad di Dios ta keda pa semper.’ (1 Huan 2:17) Awel, ta kico nos mester haci pa nos biba pa semper den e mundo nobo di Dios?— Si, nos mester siña tocante Yehova y su Yiu stima Hesus. Pero esei no ta tur cos. Nos tin cu haci e cosnan cu nos siña tambe. Nos ta spera cu ora bo studia e buki aki, esei lo yuda bo haci tur e cosnan ei.