Na Unda E Mundo Aki Ta Bai?

Rond mundo, problemanan serio y susesonan spantoso a bira noticia di tur dia! Kico esaki ta nifica?

SIGURIDAD PERSONAL: Bomnan ta explota den plasa. Docente- y alumnonan tira na scol. Babynan secuestra manera mayornan bira nan lomba. Hombernan di edad y hende mohe atraca di dia cla.

E SITUACION RELIGIOSO: Iglesianan ta apoya partidonan den guera. Clero acusa di genocidio. Pastonan ta abusa sexualmente di hobennan; iglesia ta tapa cos. Asistencia na misa ta baha; misanan ta na benta.

MEDIOAMBIENTE: Hende ta caba cu selvanan pa haya luga pa traha proyectonan comercial. Pobernan ta rosa mondi pa haya combustibel. Awa den tera ta contamina, e no ta safe pa bebe. Desperdicio industrial y algun metodonan moderno ta ruina piscamento. Aire sofocante debi na polucion.

E PAN DI CADA DIA: Segun informe, entrada pa cabes na paisnan Africano cu ta keda pasuit di Sahara ta rond di 480 dollar pa aña. Golosidad di directornan di empresa ta pone negoshinan bai failliet, lagando miles di hende sin trabou. Fraude ta pone inversionistanan perde e placa cu nan a spar henter nan bida.

SCARSEDAD DI CUMINDA: Rond di 800.000.000 hende na mundo ta bai drumi regularmente cu hamber.

GUERA: Mas cu 100.000.000 hende a perde nan bida door di guera den siglo 20. Tin suficiente arma nuclear na stock cu por destrui henter humanidad varios biaha. Gueranan civil. Terorismo a plama rond mundo.

PESTILENCIA Y OTRO MALESA: E grip Spaño (malesa di kabouter), cu a cuminsa na 1918, a mata 21.000.000 hende. Awor AIDS a bira “e epidemia mas extenso y destructivo den historia humano.” Cancer y malesa di curason ta causa tristesa rond mundo.

Wak e noticianan como un totalidad. E susesonan aki ta casonan isola? Of nan ta susesonan cu ta forma parti di un patronchi mundial cu tin berdadero nificacion?

[Cuadro/Plachi na pagina 5]

Dios Ta Realmente Interesa den Nos?

Angustia pa susesonan spantoso of pa motibo di tragedia personal, hopi hende ta puntra nan mes dicon Dios no ta interveni pa evita e tipo di cosnan ei.

Dios ta interesa den nos. E ta percura guia confiabel y berdadero alivio awor. (Mateo 11:28-30; 2 Timoteo 3:16, 17) El a haci areglo pa pone un fin permanente na violencia, malesa y morto. E percuracionnan cu el a haci ta duna prueba cu e ta interesa, no solamente den hende di un nacion sino den hende di tur nacion, tribu y lenga.—Echonan 10:34, 35.

Cuanto nos ta interesa den Dios? Abo sa ken ta e Creador di shelo y tera? Con yam’e? Kico ta su proposito? E ta contesta e preguntanan aki den Bijbel. Einan e ta conta nos kico ta e pasonan cu e ta tumando pa pone un fin na violencia y tambe na malesa y morto. Pa nos por beneficia, kico nos mester haci? Nos tin cu siña tocante Dios y tocante su proposito. Con nos por spera di beneficia di su percuracionnan a menos cu nos mustra fe den dje? (Huan 3:16; Hebreonan 11:6) Tambe ta necesario pa nos obedece su rekisitonan. (1 Huan 5:3) Abo ta interesa suficientemente den Dios pa haci esei?

Pa nos por compronde dicon Dios ta permiti e situacion actual, nos tin cu compronde un cuestion importante. Bijbel ta splic’e. Na pagina 15 di e publicacion aki, bo por haya sa kico e cuestion aki ta.