“Nan No A Haci Caso”

IGNORA spiertamento por resulta den desaster.

E stad Darwin, Australia, tawata den pleno preparacion pa dianan di fiesta na 1974 ora cu sirenanan a duna spiertamento cu tin un ciclon na caminda. Pero pa casi 30 aña ningun ciclon no a causa daño na Darwin. Dicon esei lo a sosode net awor? Mayoria habitante no a considera e peliger como algo realmente serio sino te ora cu bientonan feros a cuminsa ranca dak y muraya di cas bai cu ne caminda nan tawata tur gekrimp den otro. Pa su siguiente mainta, e stad tawata un ruina.

Na november 1985, un volcan na Colombia a explota. Sneu y ijs cu a dirti a causa un avalancha di lodo cu a dera mas cu 20.000 habitante di e stad Armero. Acaso no tawatin spiertamento di antemano? Wel, e sero tawatin lunanan ta sagudi. Sinembargo, como cu e hendenan di Armero a custumbra di biba canto di un volcan, mayoria di nan no a precupa. Autoridadnan a ricibi spiertamento cu pronto un desaster lo tuma luga, pero nan no a haci casi nada pa spierta e poblacion. Mas bien nan tawata haci anuncio na radio pa calma e pueblo. Nan a uza e loudspeakernan na misa pa urgi hende pa keda trankil. Durante anochi, tawatin dos explosion espectacular. Abo lo a bandona bo pertenencianan y hui? Masha poco hende a purba haci esei, te cu tawata demasiado laat.

Hopi bes geologonan ta pronostica cu basta exactitud unda temblornan lo tuma luga. Pero masha poco bes nan por pronostica ki ora precis lo e tuma luga. Na 1999, temblornan rond mundo a costa bida di 20.000 hende. Hopi di esnan cu a muri a pensa cu esei lo no a sosode nunca cu nan.

Con Abo Ta Reacciona Riba Spiertamentonan Cu Ta Bin for di Dios Mes?

Hopi tempo di antemano Bijbel a describi na un manera bibo e susesonan cu lo a identifica e ultimo dianan. En conexion cu esei, Bijbel ta urgi nos pa considera “e dianan di Noe.” “Den e dianan ei prome cu e dilubio”, hende tawata ocupa cu e actividadnan custumbra di bida diario, aunke sin duda nan tawata precupa pa e violencia cu a reina. Pa loke ta e spiertamento cu Dios a duna mediante su sirbido Noe, “nan no a haci caso te cu e dilubio a bini y a bari nan tur.” (Mateo 24:37-39, NW) Abo lo a haci caso di e spiertamento? Bo ta haci caso di dje awor?

Kico si bo tawata biba den Sodoma, serca di Lama Morto, den e dianan di e homber Lot, un subrino di Abraham? E area di cunucu pafo di e stad tawata manera un paradijs. E stad tawata gosa di prosperidad. E hendenan no tawatin ningun precupacion. Den e dianan di Lot, “nan tawata come, nan tawata bebe, nan tawata cumpra, nan tawata bende, nan tawata planta, nan tawata traha cas.” E sosiedad den cua nan a biba tawata tambe sumamente inmoral. Abo lo a tuma na pecho e spiertamento cu Lot a duna contra practicanan malbado? Abo lo a scucha ora el a bisa cu Dios ta determina pa destrui e stad di Sodoma? Of lo bo a considera e asunto manera un chansa, manera Lot su futuro yernonan a mir’e? Of kisas lo bo a cuminsa hui pero despues bira bek, manera e esposa di Lot a haci? Aunke otro hende no a tuma e spiertamento na serio, riba e dia cu Lot a sali for di Sodoma “a yobe candela y suafel for di shelo y a destrui nan tur.”—Lucas 17:28, 29.

Mayoria di hende den nos tempo no ta haci caso. Pero e ehempelnan aki a keda conserva den e Palabra di Dios como un spiertamento pa nos, pa anima nos pa KEDA VIGILA!

[Cuadro/Plachi na pagina 22]

Realmente Tawatin un Dilubio Mundial?

Hopi critico ta bisa cu No. Pero Bijbel ta bisa cu Si.

Hesucristo mes a papia tocante dje. E tawata na bida tempo cu e Dilubio a tuma luga, y for di shelo el a mir’e sosode.

[Cuadro/Plachi na pagina 23]

Sodoma y Gomora di Berdad A Ser Destrui?

Arkeologia ta duna prueba di e suseso aki.

Historia di mundo ta mencion’e.

Hesucristo a confirma e suseso, y 14 buki di Bijbel ta referi na loke a sosode.