“E Caminda, y e Berdad, y e Bida”

1, 2. Dicon lo ta imposibel pa nos yega cerca Jehova riba nos mes, y kico Hesucristo a haci pa nos relaciona cu esaki?

BO A yega di perde caminda? Kisas bo ta corda un biaha cu bo tabata bai bishita un amigo of famia y bo no por a haya e adres. Segun cu bo tabata bai riba un caminda desconoci, bo a para y puntra un hende con pa yega? Imagina bo con lo bo a sinti si, en bes di djis bisa bo cua caminda pa sigui, un persona bondadoso a bisa: “Djis sigui mi. Lo mi hiba bo einan.” Esta un alivio lo bo a sinti!

² Den un sentido, Hesucristo ta haci algo similar pa nos. Riba nos mes, lo ta imposibel pa yega cerca Dios. Debi na imperfeccion y pica hereda, mundo di humanidad a dual y ta “exclui di e bida di Dios.” (Efesionan 4:17, 18) Nos tin mester di yudansa pa haya e caminda pa yega cerca Dios. Hesus, nos bondadoso Gran Ehempel, no ta djis duna conseho y instruccion; e ta haci mas. Manera nos a mira den Capitulo 1, Hesus ta invita nos, bisando: “Bin, sigui mi.” (Marco 10:21) Sinembargo, e ta duna nos motibo combencente tambe pa acepta e invitacion ei. Na un ocasion Hesus a bisa: “Ami ta e caminda, y e berdad, y e bida; ni un hende no ta bin cerca e Tata, sino pa medio di mi.” (Juan 14:6) Laga nos analisa algun motibo dicon ta pa medio di e Yiu so nos por yega cerca e Tata. Anto cu e motibonan ei na mente, nos lo considera con Hesus en berdad ta “e caminda, y e berdad, y e bida.”

Un Papel Hopi Importante den e Proposito di Jehova

3. Dicon nos mester pasa via Hesus pa yega cerca Dios?

³ Na prome luga, pa yega cerca Dios nos mester pasa via Hesus pasobra Jehova a haya cu ta bon pa duna su Yiu e papel sumamente importante ei.a E Tata a hacie e personahe central den e realisacion di tur Su propositonan. (2 Corintionan 1:20; Colosensenan 1:18-20) Pa por compronde e papel sumamente importante cu e Yiu tin, nos mester considera loke a pasa den hofi di Eden, caminda e prome pareha humano a join Satanas den su rebelion contra Jehova.—Genesis 2:16, 17; 3:1-6.

4. E rebelion den Eden a lanta cua cuestion, y kico Jehova a dicidi di haci pa resolve e cuestion ei?

⁴ E rebelion den Eden a lanta un cuestion di importancia universal: Jehova Dios ta goberna su criaturanan na e manera corecto? Pa resolve e cuestion sumamente importante aki, Jehova a dicidi cu un yiu spiritual perfecto mester a baha na Tera. No por tabatin un mision mas importante, esta, e yiu lo mester a entrega su bida pa vindica Jehova su soberania y fungi como un rescate pa salba humanidad. Kedando fiel te na morto, e yiu scohi lo a haci posibel pa resolve tur e problemanan cu Satanas su rebelion a crea. (Hebreonan 2:14, 15; 1 Juan 3:8) Pero Jehova tabatin miles di miyones di yiu spiritual perfecto. (Daniel 7:9, 10) Cua di nan el a scohe pa cumpli cu e asignacion sumamente importante aki? Jehova a scohe su “Yiu unigenito”, esun cu despues a bira conoci como Hesucristo.—Juan 3:16.

5, 6. Con Jehova a demostra cu e tabatin confiansa den su Yiu, y riba kico e confiansa aki tabata basa?

⁵ E escohencia cu Jehova a haci mester sorprende nos? Definitivamente cu no! E Tata tabatin tur confiansa den su Yiu unigenito. Siglonan prome cu yegada di su Yiu riba Tera, Jehova a profetisa cu e Yiu aki lo keda fiel a pesar cu lo e pasa den tur sorto di sufrimento. (Isaias 53:3-7, 10-12; Echonan 8:32-35) Considera kico e echo cu Jehova a profetisa tur esei a indica. E Yiu tabatin boluntad liber y por a scohe su propio rumbo, mescos cu tur otro criatura inteligente. Sinembargo, Jehova tabatin asina tanto confiansa den dje cu el a profetisa cu e Yiu lo a keda fiel na dje. Riba kico e confiansa aki tabata basa? Den un solo palabra: conocemento. Jehova conoce su Yiu intimamente y e sa cuanto su Yiu kier agrad’e. (Juan 8:29; 14:31) E Yiu stima su Tata, y Jehova na su turno tambe ta stima su Yiu. (Juan 3:35) E amor cu Tata y Yiu tin pa otro ta forma entre nan un laso di union y confiansa cu ta inkebrantabel.—Colosensenan 3:14.

⁶ En bista di e papel importante di e Yiu, e confiansa cu e Tata tin den dje y e amor cu ta uni e Tata cu e Yiu, no ta nada straño cu ta pa medio di Hesus so nos por yega cerca Dios. Pero tin un otro motibo mas pakico ta e Yiu so por hiba nos na e Tata.

Ta e Yiu So Conoce e Tata Plenamente

7, 8. Dicon Hesus por a bisa corectamente cu ningun hende no conoce e Tata plenamente “sino e Yiu so”?

⁷ Pa nos por haya acceso na Jehova tin cierto rekisitonan cu nos mester cumpli cu ne. (Salmo 15:1-5) Ken por sa mas mihor cu e Yiu kico ta necesario pa cumpli cu e normanan di Dios y haya Su aprobacion? Hesus a bisa: “Tur cos a wordo entrega na mi dor di mi Tata; y ningun hende no conoce e Yiu [“plenamente”, NW], sino e Tata so; ni ningun hende no conoce e Tata [“plenamente”, NW], sino e Yiu so, y esun na kende e Yiu kier revel’e.” (Mateo 11:27) Laga nos wak dicon Hesus por a bisa, corectamente y sin exagera, cu ningun hende no conoce e Tata plenamente “sino e Yiu so.”

⁸ Como “e primogenito di henter creacion”, e Yiu tin un intimidad unico cu Jehova. (Colosensenan 1:15) Imagina bo e relacion intimo cu a desaroya entre Tata cu Yiu durante e miyones y miyones di aña cu nan dos so tabata existi, for di principio di creacion te ora cu a crea e otro criaturanan spiritual. (Juan 1:3; Colosensenan 1:16, 17) Djis pensa riba e oportunidad precioso cu e Yiu tabatin na lado di su Tata, familiarisando su mes cu e pensamentonan di su Tata y siñando Su boluntad, normanan y manera di actua. De echo, no ta un exageracion pa bisa cu Hesus conoce su Tata mas mihor cu cualkier otro persona. E intimidad aki sigur a haci posibel cu Hesus por a revela e personalidad di su Tata na un manera unico. Ningun otro persona lo por a hacie mescos.

9, 10. (a) Den ki maneranan Hesus a revela e personalidad di su Tata? (b) Pa nos por tin Jehova su aprobacion, kico nos tin cu haci?

⁹ E siñansanan di Hesus a demostra cu e tabata bon na haltura di e manera cu Jehova ta pensa y sinti y kico Jehova ta rekeri di Su adoradonan.b Pero Hesus a revela con su Tata ta den un otro manera mas cu ta masha profundo. El a bisa: “Esun cu a mira mi a mira e Tata.” (Juan 14:9) Hesus a imita su Tata perfectamente den tur loke el a bisa y haci. P’esei ora nos ta lesa den Bijbel tocante Hesus—e palabranan potente y agradabel cu el a uza den su siñansa, e compasion cu a motiv’e pa cura otro hende y e empatia cu a pon’e yora—ta facil pa nos imagina cu Jehova lo a bisa y haci precies mescos. (Mateo 7:28, 29; Marco 1:40-42; Juan 11:32-36) E manera di actua y e boluntad di e Tata ta ser revela perfectamente den e palabranan y accionnan di e Yiu. (Juan 5:19; 8:28; 12:49, 50) Pues, pa nos por tin Jehova su aprobacion, nos mester haci caso di e siñansanan di Hesus y sigui su ehempel.—Juan 14:23.

¹⁰ Como cu Hesus conoce Jehova intimamente y ta imit’e perfectamente, no ta un sorpresa cu Jehova a dicidi cu ta e Yiu ta e medio pa yega cerca e Tata. Awor cu nos tin e base pa compronde dicon nos por yega cerca Jehova solamente pa medio di Hesus, laga nos considera e nificacion di e palabranan di Hesus: “Ami ta e caminda, y e berdad, y e bida; ni un hende no ta bin cerca e Tata, sino pa medio di mi.”—Juan 14:6.

“Ami Ta e Caminda”

11. (a) Dicon ta pa medio di Hesus so nos por drenta den un relacion aproba cu Dios? (b) Con e palabranan na Juan 14:6 ta enfatisa Hesus su posicion unico? (Wak nota na pia di pagina.)

¹¹ Nos a siña caba cu hende no por yega cerca Dios si no ta pa medio di Hesus. Ban wak kico specificamente esaki ta nifica pa nos. Hesus ta “e caminda” den e sentido cu ta pa medio di dje so nos por drenta den un relacion aproba cu Dios. Dicon ta asina? Hesus a keda fiel te na morto y asina el a duna su bida como un sacrificio di rescate. (Mateo 20:28) Sin e provision di rescate aki, lo tabata imposibel pa nos tin acceso na Dios. Pica ta crea un barera entre hende y Dios pasobra Jehova ta santo, y p’esei nunca e no por aproba pica. (Isaias 6:3; 59:2) Pero e sacrificio di Hesus a elimina e barera; e sacrificio ei a provee loke tabata necesario pa expia, es decir, pa cubri pica. (Hebreonan 10:12; 1 Juan 1:7) Si nos acepta loke Dios a provee pa medio di Cristo y pone fe den esei, nos por haya Jehova su fabor. Simplemente no tin un otro manera pa nos “reconcilia cu Dios.”c—Romanonan 5:6-11.

12. Den ki otro sentido mas Hesus ta “e caminda”?

¹² Hesus ta “e caminda” pa loke ta trata oracion. Pa medio di Hesus so nos por acudi na Jehova den oracion cu e siguransa cu nos peticionnan sincero lo ser scucha faborablemente. (1 Juan 5:13, 14) Hesus mes a bisa: “Kico cu boso pidi e Tata, e lo duna boso den mi nomber . . . Pidi, y boso lo ricibi, pa boso goso por ta completo.” (Juan 16:23, 24) P’esei ta na su luga cu den nomber di Hesus, nos por acerca Jehova den oracion y yam’e “nos Tata.” (Mateo 6:9) Hesus ta “e caminda” den un otro sentido mas—pa medio di su ehempel. Manera a keda menciona caba, Hesus a imita su Tata perfectamente. Pues Hesus su ehempel ta mustra nos con pa hiba nos bida di e manera cu ta agrada Jehova. Pa yega cerca Jehova, anto, nos tin cu cana den e pasonan di Hesus.—1 Pedro 2:21.

“Ami Ta . . . e Berdad”

13, 14. (a) Con Hesus a papia e berdad? (b) Pa Hesus por ta “e berdad”, kico e tabatin cu haci, y dicon?

¹³ Hesus semper a papia e berdad tocante e palabra profetico di su Tata. (Juan 8:40, 45, 46) Hamas a haya mentira den Hesus su boca. (1 Pedro 2:22) Asta su opositornan a reconoce cu el a siña “e caminda di Dios den berdad.” (Marco 12:13, 14) Sinembargo, ora Hesus a bisa cu “ami ta . . . e berdad”, e no tabata referi simplemente na e echo cu el a haci e berdad conoci ora cu el a papia, predica y siña hende. Esei a ensera hopi mas cos, mas cu papia so.

¹⁴ Corda cu siglonan di antemano, Jehova a inspira escritornan biblico pa registra hopi profesia tocante e Mesias of Cristo. E profesianan aki a papia di detayenan di su bida, ministerio y morto. Ademas, e Lei di Moises a contene sombra, of patronchinan profetico, cu a señala na e Mesias. (Hebreonan 10:1) Acaso Hesus lo a demostra di ta fiel te na morto, y asina cumpli cu tur loke a ser profetisa tocante dje? Ta e ora ei numa Jehova lo a ser vindica como e Dios di berdadero profesia. E responsabilidad inmenso ei tabata riba Hesus su lomba. Na e manera cu Hesus a biba—tur loke el a papia y tur loke el a haci—el a duna prueba cu e patronchinan profetico ei tabata berdad. (2 Corintionan 1:20) Pues, Hesus tabata “e berdad.” Ta como si fuera e berdad di Jehova su palabra profetico a bira realidad cu e yegada di Hesus.—Juan 1:17; Colosensenan 2:16, 17.

“Ami Ta . . . e Bida”

15. Kico kere den e Yiu ta nifica, y na kico esei por hiba?

¹⁵ Hesus ta “e bida”, pasobra ta pa medio di dje so nos por haya bida, esta, e “bida berdadero.” (1 Timoteo 6:19) Bijbel ta bisa: “Esun cu kere den e Yiu tin bida eterno; ma esun cu no obedece e Yiu lo no mira bida, ma e furia di Dios ta keda riba dje.” (Juan 3:36) Kico ta nifica kere den e Yiu di Dios? Esei ta nifica cu nos tin e conviccion cu nos no por haya bida sin dje. Es mas, e ta nifica cu nos ta demostra nos fe pa medio di nos obranan, cu nos ta keda siña for di Hesus y cu nos ta haci nos best pa sigui su siñansanan y ehempel. (Santiago 2:26) Pues, kere den e Yiu di Dios ta hiba na bida eterno, esta, bida spiritual inmortal den shelo pa un “tou chikito” di cristiannan ungi pa spirito santo y bida humano perfecto den un paradijs riba Tera pa “un multitud grandi” di ‘otro carne.’—Lucas 12:32; 23:43; Revelacion 7:9-17; Juan 10:16.

16, 17. (a) Con Hesus lo resulta di ta “e bida” asta pa hende cu a muri? (b) Ki confiansa nos por tin?

¹⁶ Kico di e hendenan cu a muri caba? Hesus ta “e bida” pa nan tambe. Poco prome cu Hesus a lanta su amigo Lazaro for di morto, el a bisa Marta, ruman muher di Lazaro: “Ami ta e resureccion y e bida; esun cu kere den mi lo biba, maske e muri.” (Juan 11:25) Jehova a confia su Yiu cu “e yabinan di morto y di Hades”, dunand’e poder pa resusita hende. (Revelacion 1:17, 18) Cu e yabinan ei, Hesus glorifica lo habri e portanan di Hades y asina libra tur e hendenan preso den e graf comun di humanidad.—Juan 5:28, 29.

¹⁷ “Ami ta e caminda, y e berdad, y e bida.” Cu e declaracion simpel aki, Hesus a resumi e proposito di su bida y ministerio riba Tera. E palabranan ei ta yen di nificacion pa nos awe. Corda cu despues di e declaracion ei Hesus a sigui bisa: “Ni un hende no ta bin cerca e Tata, sino pa medio di mi.” (Juan 14:6) Hesus su palabranan ta mes relevante awe cu nan tabata tempo cu el a expresa nan. P’esei nos por tin e pleno confiansa cu si nos sigui Hesus, nunca nos lo no perde caminda. Ta Hesus so lo mustra nos e caminda pa “bin cerca e Tata.”

Con Lo Bo Reacciona?

18. Kico ser un berdadero siguido di Hesus ta ensera?

¹⁸ En bista di e papel sumamente importante cu Hesus tin y su conocemento intimo di e Tata, nos tin bon motibo pa sigui e Yiu. Manera nos a mira den e capitulo anterior, ser un berdadero siguido di Hesus ta ensera accion, no simplemente palabra of sintimento. Sigui Cristo ta ensera hiba nos bida segun su siñansa y ehempel. (Juan 13:15) E buki di estudio aki cu bo ta lesando por yuda bo den esaki.

19, 20. Kico e buki di estudio aki ta contene cu por yuda bo den bo esfuerso pa sigui Cristo?

¹⁹ Den e capitulonan cu ta bai sigui, nos lo studia Hesus su bida y ministerio cuidadosamente. E capitulonan aki ta parti den tres seccion. Den e prome seccion nos lo haya un bista general di su cualidadnan y manera di actua. Den e di dos, nos lo analisa su ehempel celoso di predica y siña hende. Den e di tres, nos lo considera con el a manifesta amor. Cuminsando cu Capitulo 3, tin un cuadro di siñansa titula “Con Bo Por Sigui Hesus?” E textonan biblico y e preguntanan den e cuadro aki ta special pa yuda nos medita riba e manera cu nos por imita Hesus cu echo y palabra.

²⁰ Cu Jehova Dios su yudansa, bo no tin nodi sigui dual, exclui di tin un bon relacion cu ne debi na pica hereda. Haciendo un sacrificio grandi, Jehova amorosamente a manda su Yiu pa mustra nos e caminda pa yega den un relacion aproba cu Dios. (1 Juan 4:9, 10) Nos ta spera cu lo bo ser conmovi, si impulsa, pa reacciona riba e gran amor ei dor di acepta y actua riba Hesus su invitacion: “Sigui mi.”—Juan 1:43.