“Mi Ta Stima e Tata”

1, 2. Kico apostel Juan a revela tocante e ultimo anochi cu e apostelnan a pasa hunto cu Hesus?

SEGUN cu un homber di edad tabata dop su pen den inkt, e tabata corda riba e cantidad di cosnan cu el a pasa aden. Su nomber tabata Juan, y e tabata e ultimo apostel di Hesucristo cu a keda na bida. Awor cu e tabatin mas o menos 100 aña, el a reflexiona riba loke a pasa un anochi masha memorabel un 70 aña prome, e ultimo anochi cu e y e otro apostelnan a pasa hunto cu Hesus prome cu Su morto. Bou di guia di e spirito santo di Dios, Juan a logra corda y skirbi e sucesonan detayadamente.

² E anochi ei, Hesus a declara bon cla cu pronto autoridadnan lo a laga mat’e. Ta Juan so a revela loke Hesus a bisa tocante e motibo pakico lo el a somete su mes na e morto teribel ei: “Pa mundo por sa cu mi ta stima e Tata, y manera e Tata a ordena mi, asina mi ta haci. Lanta, laga nos bai for di akinan.”—Juan 14:31.

3. Con Hesus a demostra cu el a stima su Tata?

³ “Mi ta stima e Tata.” No tabatin nada mas importante pa Hesus cu esei. No ta asina cu e tabata ripiti e declaracion ei constantemente. De echo, Juan 14:31 ta e unico caminda den Bijbel cu nos ta haya cu Hesus a expresa su amor pa su Tata asina abiertamente. Sinembargo, Hesus su manera di biba a mustra cu e palabranan ei tabata berdad. Su amor pa Jehova tabata bisto tur dia. Hesus su curashi, su obediencia y su perseverancia, tur tabata prueba di su amor pa Dios. Henter su ministerio tabata motiva pa amor.

4, 5. Bijbel ta promove ki clase di amor, y kico nos por bisa di Hesus su amor pa Jehova?

⁴ Awendia, algun persona kisas ta pensa cu hende cu ta mustra amor ta suak. Kisas nan ta pensa riba poemanan di amor y canticanan sentimental, podise asta di e euforia cu tin biaha ta ser conecta cu amor romantico. Bijbel ta papia di amor romantico, pero na un manera mas digno di loke ta comun awe. (Proverbionan 5:15-21) Sinembargo, e Palabra di Dios ta duna hopi mas atencion na un otro clase di amor. E amor aki no ta simplemente pasion of un emocion pasahero; tampoco e no ta un manera seco y filosofico di trata cu relacionnan humano. E clase di amor ei ta ensera tanto e curason como e mente. E ta sali for di loke e persona ta di paden, e ta ser dirigi pa principionan eleva y ta na harmonia cu nan, y ta ser expresa den echonan positivo. Definitivamente e no ta un amor superficial. E Palabra di Dios ta bisa: “Amor nunca no ta faya.”—1 Corintionan 13:8.

⁵ Di tur e hendenan cu a yega di biba, Hesus tabata esun cu a stima Jehova mas tanto. Ningun hende no a cumpli mihor cu Hesus cu e palabranan cu e mes a cita como Dios su mandamento di mas grandi: “Stima [Jehova] bo Dios cu henter bo curason, y cu henter bo alma, y cu henter bo mente, y cu tur bo forsa.” (Marco 12:30) Con Hesus a desaroya un amor asina? Con el a percura pa su amor pa Dios keda fuerte durante e tempo cu e tabata riba Tera? Anto con nos por imit’e?

E Laso di Amor di Mas Bieu y di Mas Fuerte

6, 7. Con nos por sa cu Proverbionan 8:22-31 ta describi e Yiu di Dios y no simplemente e cualidad di sabiduria?

⁶ Bo a yega di traha riba un proyecto cu un amigo y a constata cu debi na esei boso dos a bira mihor amigo, mas pega cu otro? E experencia agradabel ei por yuda bo compronde e amor cu a desaroya entre Jehova y su Yiu unigenito. Nos a referi varios biaha na Proverbionan 8:30, pero laga nos analisa e versiculo ei awor den su contexto. Den versiculo 22 te cu 31, nos ta haya un descripcion inspira pa Dios di sabiduria personifica. Con nos por sa cu e palabranan aki ta referi na e Yiu di Dios?

⁷ Den versiculo 22, sabiduria ta bisa: “[Jehova] a crea mi na principio di su caminda, prome cu su obranan di prome aya.” Mester ta trata aki di algo cu ta mas aya di sabiduria, pasobra sabiduria no ta un cos cu a ser “crea.” E no tabatin un principio pasobra semper Jehova a existi y semper e tabata sabi. (Salmo 90:2) Sinembargo, e Yiu di Dios si a ser crea; e tabata “e primogenito di henter creacion”, e prome di tur e obranan di Jehova. (Colosensenan 1:15) Manera Proverbionan a describi, e Yiu a existi prome cu Tera y shelo. Anto como e Palabra, es decir, e Vocero di Dios, e tabata e expresion perfecto di e sabiduria di Jehova.—Juan 1:1.

8. Kico e Yiu a haci durante tur e tempo prome cu el a bin na Tera, y kico nos lo por pensa riba dje ora nos ta admira creacion?

⁸ Kico e Yiu a haci durante e miles di miyones di añanan cu el a biba prome cu el a bin na Tera? Versiculo 30 ta bisa nos cu e tabata na Dios su lado como “un trahado experto.” Kico esei ta nifica? Colosensenan 1:16 ta splica: “Pa medio di dje tur cos a wordo crea, tanto den e shelonan como riba Tera, . . . tur cos a wordo crea pa medio di dje y p’e.” Pues Jehova, e Creador, a uza su Yiu, e Trahador Experto, pa crea tur otro cos; for di e criaturanan spiritual den shelo te na e inmenso universo material, incluso planeta Tera cu su variedad maraviyoso di mata y bestia, y e culminacion di e creacion terenal: hende. Den algun aspecto nos lo por compara e cooperacion aki entre Tata y Yiu cu e cooperacion cu tin entre un arkitecto y un contratista. E contratista ta specialisa den construi e diseñonan ingenioso di e arkitecto precies manera nan ta. Pues, ora un cierto faseta di creacion ta yena nos cu respet y admiracion, nos ta dunando credito de echo na e Gran Arkitecto. (Salmo 19:1) Sinembargo, nos lo por corda tambe riba e felis colaboracion di hopi tempo cu tin entre e Creador y su “trahado experto.”

9, 10. (a) Kico a haci e laso entre Jehova y su Yiu mas fuerte? (b) Kico por haci e laso cu bo tin cu bo Tata celestial mas fuerte?

⁹ Ora cu dos hende imperfecto ta traha den estrecho colaboracion, nan de bes en cuando sa tin problema pa bai bon cu otro. Esei ni un momento so no tabata e caso cu Jehova y su Yiu! E Yiu a traha pa masha hopi siglo cu su Tata y tabata “regocihando semper su dilanti.” (Proverbionan 8:30) Si, el a disfruta di e compania di su Tata, y e sintimento tabata mutuo. Di mes, e Yiu a bira mas y mas manera su Tata, y a siña imita e cualidadnan di Dios. Nada straño anto cu e laso entre Tata y Yiu a bira asina fuerte! Corectamente nos por yama esei e laso di mas bieu y di mas fuerte den henter universo.

¹⁰ Pero kico esei por nifica pa nos? Kisas bo ta sinti cu abo nunca lo por cultiva un laso asina cu Jehova. Ta berdad cu ningun di nos no tin e puesto eleva di e Yiu. Sinembargo, nos tin un oportunidad extraordinario. Corda cu Hesus a hala mas cerca di su Tata dor di traha hunto cu ne. Amorosamente Jehova ta ofrece nos e oportunidad pa ta su “colaboradonan.” (1 Corintionan 3:9) Segun cu nos ta sigui e ehempel di Hesus den e ministerio, nos mester corda semper cu nos ta colaborado di Dios. Pues asina e laso di amor cu ta uni nos cu Jehova ta bira mas y mas fuerte. Tin un privilegio mas grandi cu esei?

Con Hesus A Percura pa Su Amor pa Jehova Keda Fuerte

11-13. (a) Dicon ta bon pa nos mira amor como un cos bibo, y con Hesus, tempo cu e tabata mucha, a percura pa su amor pa Jehova keda fuerte? (b) Con e Yiu di Dios a mustra su interes pa siña for di Jehova, tanto prome cu el a bin na Tera como despues como hende?

¹¹ Den hopi manera ta bon pa nos mira e amor den nos curason como un cos bibo. Mescos cu un bunita mata den cura, amor mester haya nutricion y cuido pa e por crece y bona. Si neglish’e y keda sin dun’e nutricion, e ta bira suak y muri. Hesus no a considera su amor pa Jehova como algo comun y coriente. El a percura pa su amor keda fuerte y sigui crece durante henter su estadia riba Tera. Laga nos wak con.

¹² Pensa un biaha mas riba e incidente caminda Hesus, tempo cu e tabata mucha, a papia francamente den e tempel na Jerusalem. Corda e palabranan cu el a bisa su mayornan cu tabata tur precupa: “Pakico boso tabata busca mi? Boso no tabata sa cu mi mester tabata den e cas di mi Tata?” (Lucas 2:49) Como mucha, Hesus evidentemente no tabatin ningun recuerdo ainda di su existencia prehumano. Toch su amor pa su Tata, Jehova, tabata intenso. E tabata sa cu e manera natural pa expresa e amor ei ta den adoracion. P’esei ningun otro luga na mundo no a atrae Hesus manera e cas di adoracion puro di su Tata. El a anhela pa ta einan y no kier a bai. Ademas, e no tabata djis un observado. E tabata ansioso pa siña tocante Jehova y pa expresa loke e tabata sa. E sintimentonan ei no a cuminsa tempo cu e tabatin 12 aña, ni nan no a caba na e edad ei.

¹³ E Yiu ansiosamente a siña for di su Tata tempo cu e tabata den shelo prome cu el a bira hende. Un profesia cu tin na Isaias 50:4-6 ta revela cu Jehova a siña su Yiu specificamente ki papel lo el a bin cumpli cu ne como e Mesias. Aunke e educacion ei a ensera tambe detayenan tocante algun di e dificultadnan cu e Yiu lo a pasa aden como e Ungi di Jehova, el a siña cu smak. Mas despues, ora Hesus a bin na Tera y a bira adulto, el a keda cu e actitud ansioso pa bai na cas di su Tata y participa den e adoracion y e siñamento cu Jehova tabata kier pa ser duna na su cas. P’esei Bijbel ta informa nos cu Hesus tabata asisti fielmente na e tempel y na sinagoga. (Lucas 4:16; 19:47) Si nos kier pa nos amor pa Jehova keda bibo y sigui crece, nos mester asisti diligentemente na e reunionnan cristian, caminda nos ta adora Jehova y aumenta nos conocemento y aprecio p’e.

14, 15. (a) Dicon Hesus a busca pa ta su so? (b) Con e oracionnan cu Hesus a dirigi na su Tata ta revela intimidad y respet?

¹⁴ Un otro manera mas cu Hesus a percura pa su amor pa Jehova keda fuerte tabata pa medio di oracion cu regularidad. Aunke Hesus tabata un homber amigabel y social, ta bon pa tuma nota cu na cierto momentonan el a prefera di tabata su so. Por ehempel, Lucas 5:16 ta bisa: “Hopi biaha e tabata retira su mes den desierto pa haci oracion.” Asina tambe Mateo 14:23 ta declara: “Despues cu el a manda e multitudnan bai, e so a subi bai riba sero pa haci oracion. Y ora nochi a sera, e tabata su so ayanan.” Hesus a busca pa ta su so na e ocasionnan aki y na mas ocasion, no pasobra e tabata un ermitaño of no a gusta compania di otro hende, sino pasobra e tabata kier ta su so cu Jehova, pa papia libremente cu su Tata den oracion.

¹⁵ Ora Hesus tabata haci oracion, el a uza tin biaha e expresion “Abba! Tata!” (Marco 14:36) Den tempo di Hesus, “Abba” tabata un palabra di cariño pa “tata” cu a indica intimidad, un palabra uza den famia. Hopi biaha e tabata un di e prome palabranan cu un mucha a siña. Pero a la bes e tabata un palabra di respet. Aunke e palabra ei a revela e relacion intimo di e Yiu papiando cu su Tata stima, el a indica tambe respet profundo pa Jehova su autoridad como tata. Nos ta haya e combinacion ei di intimidad y respet den tur e oracionnan di Hesus cu tin den Bijbel. Por ehempel, na Juan capitulo 17, apostel Juan a skirbi e oracion largo y sincero cu Hesus a haci su ultimo anochi. Ta realmente conmovedor pa nos studia e oracion ei y ta masha importante pa nos imit’e, naturalmente no dor di ripiti e palabranan di Hesus, sino dor di haya maneranan pa papia di curason cu nos Tata celestial mas tanto posibel. Haciendo esei nos amor p’e lo keda bibo y fuerte.

16, 17. (a) Cu ki palabranan Hesus a expresa su amor pa su Tata? (b) Con Hesus a revela e generosidad di su Tata?

¹⁶ Manera nos a menciona caba, Hesus no a bisa bes tras bes: “Mi ta stima e Tata.” Sinembargo, hopi biaha el a expresa su amor pa su Tata cu otro palabra. Con asina? Hesus mes a bisa: “Mi ta alaba bo publicamente, o Tata, Señor di shelo y Tera.” (Mateo 11:25, NW) Ora nos a studia e Seccion 2 di e buki aki, nos a mira cu Hesus tabata gusta alaba su Tata dor di yuda hende conoce Jehova. Por ehempel, el a compara Jehova cu un tata cu tabata asina ansioso pa pordona su yiu homber rebelde cu e tabata warda pa e yoncuman arepenti bin bek. E tata a mira e yiu djaleu y a core bai contr’e y a bras’e. (Lucas 15:20) Ken por lesa e relato ei sin sinti su mes conmovi pa e manera cu Hesus a presenta Jehova su amor y pordon?

¹⁷ Hopi biaha Hesus a alaba su Tata pa Su generosidad. Hesus a uza e ehempel di mayornan imperfecto pa mustra con sigur nos por ta cu nos Tata celestial lo duna nos tur e spirito santo cu nos tin mester. (Lucas 11:13) Hesus a papia tambe tocante e speransa cu e Tata ta ofrece asina generosamente. Cu anhelo Hesus a describi su propio speransa di bolbe bek na lado di su Tata den shelo. (Juan 14:28; 17:5) El a conta su siguidonan di e speransa cu Jehova ta extende na Cristo su “tou chikito”, esta, e speransa di biba den shelo y di participa den e gobernacion di e Rei Mesianico. (Lucas 12:32; Juan 14:2) Anto el a consola un malechor cu tabata muriendo cu e speransa di bida den Paradijs. (Lucas 23:43) Segun cu Hesus a papia di e gran generosidad di su Tata den e maneranan aki esei siguramente a yud’e keda cu un amor fuerte pa Jehova. Hopi siguido di Cristo a ripara cu e cos cu mas ta fortalece nan amor pa Jehova of nan fe den dje ta di papia tocante Jehova y e speransa cu e ta extende na hende cu ta stim’e.

Abo Lo Imita Hesus Su Amor pa Jehova?

18. Cua ta e manera di mas importante den cua nos tin cu sigui Hesus, y dicon?

¹⁸ Di tur e maneranan cu nos tin cu sigui Hesus, ningun no ta mas importante cu esaki: Nos tin cu stima Jehova cu henter nos curason, alma, mente y forsa. (Lucas 10:27) Nos no por midi nos amor pa Jehova simplemente na con intenso nos sintimentonan ta; nos tin cu considera tambe te na ki grado nos ta demostra nos amor den accion. Hesus no a keda contento cu djis sinti amor pa su Tata ni e no a djis bisa: “Mi ta stima e Tata.” E di: “Pa mundo por sa cu mi ta stima e Tata, y manera e Tata a ordena mi, asina mi ta haci.” (Juan 14:31) Satanas a pretende cu ningun hende lo sirbi Jehova motiva pa amor sin egoismo. (Job 2:4, 5) Pa por a duna e mihor contesta posibel riba e calumnia malicioso di Satanas, Hesus a actua cu curashi y a mustra mundo cuanto el a stima su Tata. El a obedece su Tata te na e punto di entrega su bida. Abo lo sigui Hesus? Lo bo mustra mundo cu di berdad bo ta stima Jehova Dios?

19, 20. (a) Pa ki motibonan importante nos kier asisti cu regularidad na e reunionnan cristian? (b) Con nos por mira nos estudio personal, meditacion y oracion?

¹⁹ Nos tin un necesidad spiritual profundo pa demostra tal amor. P’esei Jehova a haci areglo pa nos ador’e na un manera cu nos ta nutri y fortalece nos amor pa nos Tata. Ora bo ta asisti na reunionnan cristian, purba corda cu bo ta einan pa adora bo Dios. Algun faseta di e adoracion ei ta entre otro haci oracion sincero hunto, canta canticanan di alabansa, scucha cu atencion y participa ki ora cu ta posibel. Reunionnan asina ta duna bo tambe e oportunidad pa anima e otro rumannan cristian. (Hebreonan 10:24, 25) Si nos ta adora Jehova cu regularidad na reunionnan cristian, esei lo yuda nos amor pa Dios bira mas y mas fuerte.

²⁰ Nos amor pa Dios lo bira mas fuerte tambe pa medio di estudio personal, meditacion y oracion. Mira e cosnan aki como oportunidadnan pa bo ta bo so cu Jehova. Segun cu bo ta studia Dios su Palabra skirbi y ta medita riba dje, Jehova ta transmitiendo su pensamentonan na bo. Segun cu bo ta haci oracion, bo ta habriendo bo curason na dje. Corda cu oracion ta ensera mas cu djis pidi Dios cos. Oracion ta tambe un oportunidad pa gradici Jehova pa e bendicionnan cu bo a ricibi y pa alab’e pa su obranan maraviyoso. (Salmo 146:1) Es mas, e mihor manera pa gradici Jehova y pa mustr’e cu bo ta stim’e ta di alab’e publicamente cu goso y cu entusiasmo.

21. Con importante amor pa Jehova ta, y kico nos lo considera den e capitulonan cu ta sigui?

²¹ Amor pa Dios ta e factor principal cu por yuda bo alcansa felicidad eterno. Esei ta tur loke Adam cu Eva tabatin mester pa nan por tabata exitoso, y ta net e cos cu nan no a cultiva. Amor pa Dios ta e cos di mas importante cu bo tin mester pa surpasa cualkier prueba di fe, rechasa cualkier tentacion y wanta cualkier dificultad. Esei ta e factor di mas importante di ser un siguido di Hesus. Claro cu amor pa Dios ta conecta cu amor pa nos prohimo. (1 Juan 4:20) Den e capitulonan cu ta sigui, nos lo analisa con Hesus a demostra su amor pa hende. Den e siguiente capitulo, nos lo considera dicon asina tanto hende a haya Hesus acercabel.