“Bai y Haci . . . Discipel”

1-3. (a) Kico un cunukero ta haci ora e cosecha ta mucho hopi pa e so recoh’e? (b) Ki reto Hesus a confronta den lente di aña 33, y con el a soluciona e situacion?

PENSA riba e reto cu un cunukero ta confronta den e siguiente senario. Algun luna prome e cunukero a ara su tereno y sembra simiña. Cu hopi interes el a wak e prome blachinan cuminsa sali, y cu satisfaccion a mira e matanan crece bira grandi. Tempo di cosecha a yega, y awor lo e ser recompensa pa tur su trabou duro. Pero e tin un dilema: E cosecha ta mucho hopi pa e so recoh’e. Pa resolve e problema aki, e ta tuma e decision sabi di contrata algun trahado y ta manda nan bai cosecha den su cunucu. E cos ta cu e tempo pa recohe su cosecha precioso ta limita.

² Den lente di aña 33 di nos era, Hesus resusita a confronta un reto similar. Durante su ministerio terenal, el a sembra simiñanan di e berdad. Awor tabatin un cosecha abundante pa recohe. Hopi hende cu a reacciona faborablemente mester a ser recohi pa bira discipel. (Juan 4:35-38) Con Hesus a resolve e problema aki? Riba un sero na Galilea, poco prome cu el a subi na shelo, el a duna su discipelnan un encargo cu lo a resulta den mas trahado, bisando: “Bai y haci tur e nacionnan discipel di mi, y batisa nan . . . y siña nan pa cumpli cu tur loke mi a ordena boso.”—Mateo 28:19, 20.

³ E encargo ei ta un aspecto fundamental di loke ta nifica ser un berdadero siguido di Cristo. P’esei laga nos analisa tres pregunta. Dicon Hesus a duna e encargo pa haya mas trahado? Con el a entrena su discipelnan pa haci esaki? Con nos ta envolvi den e encargo aki?

Pakico Tabatin Mester di Mas Trahado

4, 5. Dicon Hesus lo no por a caba cu e trabou cu el a cuminsa cu ne, y ken lo tabatin cu sigui cu e trabou despues cu el a bai shelo bek?

⁴ Ora Hesus a cuminsa cu su ministerio na aña 29, e tabata sa cu el a inicia un trabou cu riba su mes lo e no a caba cu ne. E area cu lo e por a abarca y e cantidad di hende cu lo e por a alcansa cu e mensahe di Reino, den e tempo cortico cu a rest’e riba Tera, tabata limita. Ta berdad cu el a limita su predicacion principalmente na hende Hudiu y proselito, “e carnenan perdi di e cas di Israel.” (Mateo 15:24) Sinembargo, e “carnenan perdi” ei tabata plama den henter Israel, un pais cu a abarca miles di kilometer cuadra. Ademas, cu tempo lo mester a hiba e bon nobo na e resto di e campo mundial.—Mateo 13:38; 24:14.

⁵ Hesus a reconoce cu despues di su morto lo a keda hopi trabou pa haci. El a bisa su 11 fiel apostelnan: “Di berdad, di berdad, mi ta bisa boso, esun cu kere den mi, e obranan cu mi ta haci e tambe lo haci; y obranan mas grandi cu esakinan e lo haci, pasobra mi ta bai cerca e Tata.” (Juan 14:12) Siendo cu e Yiu lo a bai shelo bek, ta su siguidonan—no solamente e apostelnan sino tambe tur futuro discipel—lo tabatin cu continua cu e trabou di predica y siña hende. (Juan 17:20) Hesus a reconoce humildemente cu nan obranan lo ta “mas grandi” cu esnan di dje. Con asina? Den tres manera.

6, 7. (a) Den ki maneranan e obranan cu e siguidonan di Hesus lo a haci lo ta mas grandi cu esnan di dje? (b) Con nos por demostra cu Hesus no a kiboca su mes ora cu el a pone su confiansa den su siguidonan?

⁶ Di prome, e siguidonan di Hesus lo a cubri mas teritorio. Awe, nan predicacion a yega den tur skina di e Tera, hopi mas leu cu e fronteranan di e pais caminda Hesus mes a predica. Di dos, nan lo a alcansa mas hende. E grupo chikito di discipel cu Hesus a laga atras, rapidamente a crece bira miles di persona. (Echonan 2:41; 4:4) Awor nan ta miyones, anto cientos di miles di hende nobo ta batisa tur aña. Di tres, nan lo a predica pa un tempo mas largo; te cu awe nan ta predica, casi 2.000 aña despues cu Hesus su ministerio di tres aña y mei a termina.

⁷ En realidad, Hesus a expresa confiansa den su siguidonan ora cu el a bisa cu nan lo haci “obranan mas grandi cu esakinan.” El a laga den nan man un obra cu tabata di sumo importancia p’e, e trabou di predica y siña hende e bon nobo di “e reino di Dios.” (Lucas 4:43) Hesus tabata combenci cu nan lo a cumpli cu e asignacion fielmente. Kico esaki ta nifica pa nos awe? Cu ora nos ta dedica nos mes na e ministerio cu celo y cu henter nos curason, nos ta demostra cu Hesus no a kiboca su mes ora cu el a pone su confiansa den su siguidonan. Esaki no ta un privilegio remarcabel?—Lucas 13:24.

Entrena pa Duna Testimonio

8, 9. Ki ehempel Hesus a pone den e ministerio, y con nos por imita su ehempel den nos ministerio?

⁸ Hesus a duna su discipelnan e mihor entrenamento cu tabatin pa e ministerio. Mas cu tur cos, el a pone un ehempel perfecto pa nan. (Lucas 6:40) Den e capitulo anterior, nos a considera su actitud relaciona cu e ministerio. Pensa un rato riba e discipelnan cu a biaha hunto cu Hesus durante su giranan di predicacion. Nan a observa cu e tabata predica unda cu tabatin hende: canto di awa y na bahada di sero, den stad y na plasa, y den casnan priva. (Mateo 5:1, 2; Lucas 5:1-3; 8:1; 19:5, 6) Nan a mira cu e tabata un persona trahado, cu a lanta mainta tempran y a sirbi te anochi lat. E ministerio no tabata djis un hobi cu e tabata ocupa su mes cu ne den su tempo liber! (Lucas 21:37, 38; Juan 5:17) Sin duda nan a ripara cu ta amor profundo pa hende a motiva Hesus. Kisas nan a mira den su cara e compasion cu el a sinti den su curason. (Marco 6:34) Ki efecto bo ta kere e ehempel di Hesus tabatin riba su discipelnan? Con lo el a influencia abo?

⁹ Como siguido di Cristo, nos ta imita su ehempel den nos ministerio. P’esei nos ta probecha di tur oportunidad pa duna “testimonio cabal.” (Echonan 10:42, NW) Mescos cu Hesus, nos ta bishita hende na nan cas. (Echonan 5:42) Si ta necesario, nos ta ahusta nos programa pa bishita nan ora cu nos tin mas chens di haya nan na cas. Ademas, nos ta busca hende na luganan publico y ta predica na nan discretamente; sea ta riba caya, den parke, den tienda y na nos trabou. Nos ta sigui “traha duro y ta haci esfuerso” den e ministerio, pasobra nos ta tuma e trabou aki na serio. (1 Timoteo 4:10, NW) Amor profundo y sincero pa otro hende ta motiva nos pa sigui busca oportunidad pa predica tur caminda y tur momento cu nos por haya hende.—1 Tesalonicensenan 2:8.

10-12. Ki lesnan importante Hesus a siña su discipelnan prome cu el a manda nan bai predica?

¹⁰ Un otro manera cu Hesus a entrena su discipelnan tabata dor di duna nan instruccionnan detaya. Prome cu el a manda e 12 apostelnan y despues e 70 discipelnan bai predica, el a tene loke nos por yama sesionnan di entrenamento. (Mateo 10:1-15; Lucas 10:1-12) E entrenamento a duna bon resultado, pasobra Lucas 10:17 ta informa: “E setentanan a bolbe cu goso.” Laga nos considera dos les importante cu Hesus a siña nan, pero nos tin cu corda cu mester compronde su palabranan den lus di e custumbernan Hudiu den tempo biblico.

¹¹ Hesus a siña su discipelnan pa confia den Jehova. El a bisa nan: “No busca oro, ni plata, ni koper pa hiba den boso faha; ni saco pa biaha cu ne, ni dos tunica, ni sandalia, ni garoti; pasobra e trahado ta digno di su mantencion.” (Mateo 10:9, 10) E tempo ei biaheronan tabatin e custumber di cana cu un faha cu a fungi como cartera, un saco y un extra par di sandalia.a Ora Hesus a instrui su discipelnan pa no worry tocante e cosnan ei, de echo e tabata bisando: “Pone boso pleno confiansa den Jehova, pasobra lo e percura pa boso necesidadnan.” Jehova lo a percura pa nan dor di motiva e hendenan cu a acepta e bon nobo pa mustra hospitalidad na nan, locual tabata un custumber den Israel.—Lucas 22:35.

¹² Hesus a siña su discipelnan tambe pa evita distraicionnan innecesario. E di: “No saluda ningun hende na caminda.” (Lucas 10:4) Acaso Hesus tabata kier pa nan trata hende na un manera friu of seco? Claro cu no. Den tempo biblico, saluda un hende a ensera mas cu djis bisa ‘con ta bai.’ Saludonan di custumber a ensera varios formalidad y combersacionnan masha largo. Un comentarista biblico a declara: “Hende di Oriente no tabata cuminda otro cu djis buig cabes of duna man, manera cerca nos, sino mas bien [a] efectua hopi brasamento y buigmento, y asta tiramento di curpa plat abou riba suela. Tur esaki a rekeri hopi tempo.” P’esei ora Hesus a bisa su discipelnan pa no participa den e manera di saluda di custumber, de echo e tabata bisando: “Uza boso tempo mas eficasmente posibel, pasobra e mensahe cu boso ta hiba ta urgente.”b

13. Den ki maneranan nos por demostra cu nos ta tuma na pecho e instruccionnan cu Hesus a duna su discipelnan di prome siglo?

¹³ Nos ta tuma na pecho e instruccionnan cu Hesus a duna su discipelnan di prome siglo. Ora nos ta efectua nos ministerio, nos ta pone nos pleno confiansa den Jehova. (Proverbionan 3:5, 6) Nos sa cu nunca nos lo falta e necesidadnan di bida si nos sigui “busca prome e reino di Dios.” (Mateo 6:33) Predicadonan di Reino di tempo completo na tur parti di mundo por confirma cu asta durante tempo dificil, Jehova su man nunca ta cortico. (Salmo 37:25) Nos ta reconoce tambe cu ta necesario pa evita cosnan cu por kita nos atencion for di e ministerio. Si nos no tene cuidou, e sistema di cosnan aki por desvia nos facilmente. (Lucas 21:34-36) Sinembargo, awor no ta tempo pa ser distrai. Bida di hende ta den wega, p’esei nos mensahe ta urgente. (Romanonan 10:13-15) Si nos mantene un sentido di urgencia den nos curason, esei lo yuda nos pa no laga e distraicionnan di e mundo aki absorba e tempo y energia cu nos lo por a uza mihor den e ministerio. Corda, e tempo cu a resta ta cortico y e cosecha ta grandi.—Mateo 9:37, 38.

Un Trabou Cu Ta Envolve Nos Tur

14. Kico ta indica cu e encargo cu tin na Mateo 28:18-20 ta aplica na tur siguido di Cristo? (Wak tambe e nota na pia di pagina.)

¹⁴ Cu e palabranan “Bai y haci . . . discipel”, Hesus resusita a pone un responsabilidad pisa riba su siguidonan. No ta e discipelnan so cu tabata presente e dia ei riba sero di Galilea e tabatin na mente.c E trabou cu el a encarga nan a ensera yega na hende di “tur e nacionnan”, y e trabou ta sigui “te na fin di mundo.” Ta bisto anto cu e encargo aki ta aplica na tur siguido di Cristo, incluso nos awe. Laga nos analisa e palabranan di Hesus na Mateo 28:18-20.

15. Dicon ta sabi pa nos obedece Hesus su mandamento pa haci discipel?

¹⁵ Prome cu el a duna e encargo, Hesus a bisa: “Tur autoridad a wordo duna na mi den shelo y riba Tera.” (Versiculo 18) Di berdad Hesus tin un autoridad asina grandi? Si! E ta e arcangel cu ta na cabes di miles y miles di angel. (1 Tesalonicensenan 4:16; Revelacion 12:7) Como ‘cabes di e congregacion’, e tin autoridad riba su siguidonan riba Tera. (Efesionan 5:23) For di aña 1914, e ta goberna como Rei Mesianico den shelo. (Revelacion 11:15) Su autoridad ta yega asta te den graf, pasobra e tin e poder pa resusita e mortonan. (Juan 5:26-28) E echo cu Hesus a declara prome con extenso su autoridad ta, ta indica cu e palabranan cu a sigui no ta un sugerencia sino un mandamento. Ta sabi di nos parti pa obedec’e, pasobra no ta el a tuma e autoridad ei riba su mes sino ta Dios a dun’ele.—1 Corintionan 15:27.

16. Ora Hesus a bisa nos pa “bai”, ta kico el a manda nos haci, y con nos ta cumpli cu e aspecto aki di e encargo?

¹⁶ Despues Hesus a describi e encargo, cu ta cuminsa cu un solo palabra: “Bai.” (Versiculo 19) Pues el a manda nos tuma e iniciativa pa hiba e mensahe di Reino na otro hende. Pa nos cumpli cu e aspecto aki di nos encargo, nos por uza varios metodo. Un di nan ta e predicacion di cas pa cas; esei ta un manera masha efectivo pa haci contacto personal cu hende. (Echonan 20:20) Tambe nos ta busca oportunidad pa duna testimonio informalmente; nos ta ansioso pa cuminsa un combersacion tocante e bon nobo na unda cu ta apropia durante nos bida diario. Nos metodonan specifico di predica por varia, ya cu nos ta adapta nan na e necesidad- y circunstancianan local. Pero un cos si ta keda mescos: Nos ta “bai” y busca hende cu ta digno di e mensahe.—Mateo 10:11.

17. Con nos ta ‘haci discipel’?

¹⁷ Siguientemente Hesus a splica e meta di e encargo, esta, pa ‘haci discipel.’ (Versiculo 19) Con nos ta ‘haci discipel’? Basicamente, un discipel ta un persona cu ta den e proceso di siña, cu ta hayando siñansa. Sinembargo, haci discipel no ta djis un asunto di duna conocemento na otro hende. Ora nos ta studia Bijbel cu personanan interesa, nos meta ta pa yuda nan bira siguido di Cristo. Ki ora cu ta posibel, nos ta enfatisa e ehempel di Hesus di manera cu nos studiantenan ta siña wak riba dje como nan Maestro y Modelo, bibando manera el a biba y haciendo e trabou cu el a haci.—Juan 13:15.

18. Dicon bautismo ta e logro di mas importante den bida di un discipel?

¹⁸ Un parti masha importante di e encargo ta ser expresa den e palabranan: “Batisa nan den nomber di e Tata y di e Yiu y di e spirito santo.” (Versiculo 19) Bautismo ta e logro di mas importante den bida di un discipel, pasobra e ta un simbolo apropia di e dedicacion di henter su curason cu el a haci na Dios. Pues, e ta esencial pa salbacion. (1 Pedro 3:21) Si, e discipel batisa cu ta sigui haci su best pa sirbi Jehova, por anticipa bendicionnan eterno den e mundo nobo cu ta na caminda. Abo a yega di yuda un hende bira un discipel batisa di Cristo? Den e ministerio cristian, no tin un motibo mas grandi di goso cu esei.—3 Juan 4.

19. Kico nos ta siña hende nobo, y dicon kisas nos lo tin cu sigui siña nan despues cu nan batisa?

¹⁹ Hesus a splica e siguiente parti di su encargo, bisando: “Siña nan pa cumpli cu tur loke mi a ordena boso.” (Versiculo 20) Nos ta siña hende nobo obedece e mandamentonan di Hesus, entre otro, e mandamentonan pa stima Dios, stima prohimo y haci discipel. (Mateo 22:37-39) Progresivamente nos ta siña nan con pa splica berdadnan biblico y defende nan fe cu ta creciendo. Ora nan ta cualifica pa participa den e predicacion publico, nos ta traha hunto cu nan, y ta siña nan mediante palabra y ehempel con nan por haci e trabou aki na un manera productivo. No ta tur biaha nos ta caba di siña discipelnan nobo prome cu nan batisa. Personanan recien batisa kisas tin mester di mas instruccion pa yuda nan trata cu e retonan cu hende cu ta sigui Cristo ta haya nan cu ne.—Lucas 9:23, 24.

“Mi Ta cu Boso Semper”

20, 21. (a) Dicon nos no tin nodi tene miedo segun cu nos ta cumpli cu e encargo cu Hesus a duna? (b) Dicon awor no ta tempo pa nos bai pocopoco, y kico lo mester ta nos determinacion?

²⁰ E ultimo palabranan di Hesus su encargo ta masha trankilisante: “Mira, mi ta cu boso semper, te na fin di mundo.” (Mateo 28:20) Hesus a reconoce cu e asignacion aki ta uno di peso. E tabata sa tambe cu ora nos ta cumpli cu ne esei tin biaha ta provoca reaccionnan agresivo di parti di opositornan. (Lucas 21:12) Sinembargo, nos no tin nodi tene miedo. Nos Lider no ta spera di nos pa nos cumpli cu e asignacion aki sin yudansa of nos so. No ta un consuelo pa sa cu Esun cu tin “tur autoridad . . . den shelo y riba Tera” ta cu nos pa sostene nos segun cu nos ta cumpli cu e encargo aki?

²¹ Hesus a sigura su discipelnan cu lo e ta cu nan den e ministerio atrabes di siglonan te “na fin di mundo.” Tanten cu e fin no bin, nos tin cu sigui cumpli cu e encargo di Hesus. Awor no ta tempo pa bai pocopoco. Tin un cosecha spiritual abundante ta tumando luga! Personanan cu ta reaccionando faborablemente ta ser recohi na gran cantidad. Como siguido di Cristo, laga nos ta determina pa cumpli cu e encargo importante cu Hesus a confia na nos. Laga nos ta determina pa duna di nos tempo, energia y recursonan pa cumpli cu e mandamento di Cristo: “Bai y haci . . . discipel.”