“Hesus . . . A Stima Nan te na Fin”

1, 2. Con Hesus a pasa su ultimo anochi cu su apostelnan, y dicon e momentonan final aki tabata precioso p’e?

ORA Hesus a reuni cu su apostelnan den un sala ariba di un cas na Jerusalem, e tabata sa cu esaki lo tabata su ultimo anochi hunto cu nan. E momento pa bolbe cerca su Tata tabata yegando. Den apenas algun ora, nan lo a aresta Hesus y pone su fe na prueba manera nunca prome. Sinembargo, ni sikiera su morto inminente no a kita su atencion for di e necesidadnan di e apostelnan.

² Hesus a bisa e apostelnan di antemano cu lo el a bai laga nan, pero ainda e tabatin mas cos di bisa pa fortalece nan pa loke tabata spera nan. P’esei el a pasa e ultimo momentonan precioso aki siñando nan lesnan masha importante cu lo a yuda nan keda fiel. Su palabranan ta entre esnan mas cariñoso y mas intimo cu el a yega di comparti cu nan. Pero ta kico a pone cu Hesus tabata mas precupa pa su apostelnan cu pa e mes? Ta kico a haci e ultimo oranan aki cu nan asina precioso p’e? Den un solo palabra: amor. Su amor pa nan tabata profundo.

3. Con nos por sa cu Hesus no a warda te su ultimo anochi pa demostra amor na su siguidonan?

³ Decadanan despues, ora cu apostel Juan a introduci su relato inspira di e sucesonan di e anochi ei, el a skirbi: “Prome cu e Fiesta di Pasco, Hesus, sabiendo cu su ora a yega cu e mester a laga e mundo aki y bai cerca e Tata, a mustra esnan di dje cu tabata den mundo cu el a stima nan te na fin.” (Juan 13:1) Hesus no a warda te e anochi ei pa demostra su amor na “esnan di dje.” Durante henter su ministerio el a duna prueba di su amor pa su discipelnan den tantisimo manera. Ta bon pa nos analisa algun di e maneranan ei, pasobra ora nos ta imit’e den esaki, nos ta duna prueba cu nos ta su berdadero discipelnan.

El A Mustra Pasenshi

4, 5. (a) Dicon Hesus tabatin mester di pasenshi pa trata cu su discipelnan? (b) Con Hesus a reacciona ora tres di su apostelnan no a keda vigila den hofi di Getsemane?

⁴ Amor cu pasenshi ta cana man den man. “Amor tin pasenshi”, segun 1 Corintionan 13:4, y pasenshi ta ensera soporta otro hende sin rabia of keha. Hesus mester a tene pasenshi cu su discipelnan? Claro cu si! Manera nos a mira den Capitulo 3, e apostelnan tabata slow pa cultiva humildad. Mas cu un biaha nan a discuti cu otro tocante cua di nan tabata esun di mas importante. Con Hesus a reacciona? El a rabia cu nan y contesta nan tur irita of cu rencor? No, cu pasenshi el a rasona cu nan, asta ora “un discusion” pisa a lanta tocante e asunto aki durante su ultimo anochi cu nan!—Lucas 22:24-30; Mateo 20:20-28; Marco 9:33-37.

⁵ Mas despues durante e ultimo anochi ei, ora Hesus a bai na e hofi di Getsemane cu e 11 fiel apostelnan, su pasenshi a bolbe ser poni na prueba. Lagando ocho di e apostelnan atras, Hesus a tuma Pedro, Santiago cu Juan y a bai mas paden di e hofi. Hesus a bisa nan: “Mi alma ta masha tristo mes, te na morto; keda akinan y vigila hunto cu mi.” El a bai un poco mas leu for di nan y a cuminsa haci oracion intensamente. Despues di a haci oracion pa basta rato, el a bolbe cerca e tres apostelnan. Kico nan tabata haciendo? Na momento di su prueba di mas grandi, nan tabata morto na soño! El a zundra nan pasobra nan no a keda vigila? No, cu pasenshi el a anima nan. Su palabranan bondadoso a demostra cu el a compronde bou di cuanto tension nan tabata y kico tabata nan debilidad.a El a bisa: “E spirito ta voluntario, ma e carni ta debil.” Hesus a keda demostra pasenshi e anochi ei, a pesar cu el a bin haya nan drumi, no un biaha sino dos biaha mas!—Mateo 26:36-46.

6. Con nos por imita Hesus den nos trato cu otro hende?

⁶ Ta un animacion pa constata cu Hesus no a considera su apostelnan un caso perdi. Su pasenshi cu tempo a duna fruta, pasobra e hombernan fiel aki a siña e importancia di ta humilde y alerta. (1 Pedro 3:8; 4:7) Con nos por imita Hesus den nos trato cu otro hende? Specialmente ancianonan mester tene pasenshi. Rumannan den fe kisas ta acerca un anciano cu nan problemanan ora cu e anciano mes ta cansa of su cabes ta yen di su mes precupacionnan. Tin biaha, rumannan cu tin mester di yudansa ta slow pa reacciona riba conseho. A pesar di esei, ancianonan cu tin pasenshi ta duna instruccion “cu suavidad” y lo “trata e tou cu ternura.” (2 Timoteo 2:24, 25; Echonan 20:28, 29, NW) Mayornan tambe ta haci bon di imita e pasenshi di Hesus, pasobra tin biaha muchanan por ta slow pa reacciona riba conseho of coreccion. Amor cu pasenshi lo yuda mayornan pa no stop di haci esfuerso pa entrena nan yiunan. E recompensanan di tal pasenshi por ta masha grandi.—Salmo 127:3.

El A Satisface Nan Necesidadnan

7. Den ki manera Hesus a satisface e necesidadnan fisico y material di su discipelnan?

⁷ Amor ta ser manifesta pa medio di obranan cu no ta refleha egoismo. (1 Juan 3:17, 18) Amor “no ta busca su propio interes.” (1 Corintionan 13:5) Amor a motiva Hesus pa satisface e necesidadnan fisico y material di su discipelnan. Hopi biaha el a actua na nan fabor asta prome cu nan a bisa kico nan tabatin mester. Por ehempel, ora el a mira cu nan tabata cansa, el a sugeri nan pa bai hunto cu ne “na un luga solitario y sosega un rato.” (Marco 6:31) Ora el a ripara cu nan tabatin hamber, el a tuma e iniciativa pa alimenta nan, y hunto cu nan miles di otro hende cu a bin pa scuch’e.—Mateo 14:19, 20; 15:35-37.

8, 9. (a) Kico ta indica cu Hesus a reconoce e necesidadnan spiritual di su discipelnan y satisface eseinan? (b) Ora Hesus tabata na staca, con el a demostra interes profundo den e bienestar di su mama?

⁸ Hesus a reconoce e necesidadnan spiritual di su discipelnan y a satisface eseinan tambe. (Mateo 4:4; 5:3, NW) Ora Hesus tabata siña hende, hopi biaha el a duna e discipelnan atencion special. El a duna e Sermon Riba Sero specialmente na beneficio di su discipelnan. (Mateo 5:1, 2, 13-16) Na ocasionnan cu el a siña hende cu ilustracion of parabola, “e tabata splica tur cos na su discipelnan ora nan tabata nan so.” (Marco 4:34) Hesus a profetisa cu e lo nombra un “esclabo fiel y prudente” pa haci sigur cu Su siguidonan lo ta bon alimenta den sentido spiritual durante e ultimo dianan. E esclabo ta consisti di un grupo chikito di ruman di Hesus, ungi pa spirito santo, cu ta biba riba Tera. Desde aña 1919, e esclabo aki ta percurando ‘cuminda spiritual na su debido tempo.’—Mateo 24:45.

⁹ Riba e dia cu Hesus a muri el a demostra na un manera masha conmovedor con interesa e tabata den e bienestar spiritual di su sernan keri. Imagina bo e siguiente escena. Hesus tabata na staca, sufriendo un dolor insoportabel. Pa e por a hala rosea, evidentemente e mester a pusha su curpa ariba cu su pia. Esaki sin duda a caus’e masha hopi dolor ya cu e peso di su curpa tabata habri e heridanan di clabo den su pianan y su lomba tur corta di sota tabata raspa contra e staca. Lo mester tabata hopi dificil y doloroso pa el a papia, ya cu pa un hende papia e mester por controla su halamento di rosea. Sinembargo, un poco prome cu Hesus a muri el a papia palabranan cu a demostra su amor profundo pa su mama, Maria. Mirando Maria y apostel Juan para einan, Hesus a bisa su mama cu un stem suficiente duro cu otro hende para eibanda por a tende: “Muher, ata bo yiu!” Anto na Juan el a bisa: “Ata bo mama!” (Juan 19:26, 27) Hesus tabata sa cu e fiel apostel lo a atende no solamente e necesidadnan fisico y material di Maria, sino tambe su bienestar spiritual.b

10. Con mayornan por imita Hesus segun cu nan ta percura pa e necesidadnan di nan yiunan?

¹⁰ Mayornan amoroso ta ripara cu ta probechoso pa medita riba e ehempel di Hesus. Un tata cu realmente ta stima su famia lo percura pa nan materialmente. (1 Timoteo 5:8) Cabesnan di famia balansa y amoroso de bes en cuando ta traha tempo pa relaha y recrea. Mas importante ainda, mayornan cristian ta percura pa e necesidadnan spiritual di nan yiunan. Con? E mayornan ei ta haci areglo pa tene un estudio di Bijbel di famia riba un base regular, y nan ta haci esfuerso pa haci e sesionnan di estudio aki edificante y agradabel pa nan yiunan. (Deuteronomio 6:6, 7) Cu nan palabra y ehempel, mayornan ta siña nan yiunan cu e ministerio ta un actividad importante y cu un parti esencial di nan rutina spiritual ta pa prepara pa e reunionnan cristian y asisti na nan.—Hebreonan 10:24, 25.

Dispuesto pa Pordona

11. Kico Hesus a siña su siguidonan tocante pordona?

¹¹ Pordona ta un faseta di amor. (Colosensenan 3:13, 14) Segun 1 Corintionan 13:5, amor “no ta warda rencor.” Na varios ocasion, Hesus a siña su siguidonan e importancia di pordona. El a urgi nan pa pordona otro hende “no te shete bes, sino te setenta bes shete”, es decir, no tabatin un cantidad limita di biaha pa pordona. (Mateo 18:21, 22) El a siña nan cu si bo reprende un pecador y e mustra arepentimento, lo bo mester pordon’e. (Lucas 17:3, 4) Sinembargo, Hesus no tabata manera e farizeonan hipocrita cu a siña cu boca so; el a siña hende tambe cu su ehempel. (Mateo 23:2-4) Laga nos mira con Hesus a demostra cu e tabata dispuesto pa pordona asta ora un amigo di confiansa a lag’e na caya.

12, 13. (a) Den ki manera Pedro a laga Hesus na caya e anochi di Su aresto? (b) Con loke Hesus a haci despues di su resureccion ta mustra bon cla cu el a haci mas cu djis predica cu mester pordona?

¹² Hesus tabatin un relacion hopi pega cu apostel Pedro, un homber cariñoso cu de bes en cuando a actua sin pensa. Hesus a reconoce e bon cualidadnan di Pedro y a dun’e varios privilegio special. Pedro, hunto cu Santiago y Juan, a presencia cierto milagernan cu e otro apostelnan no a mira. (Mateo 17:1, 2; Lucas 8:49-55) Manera nos a menciona anteriormente, Pedro tabata un di e apostelnan cu a compaña Hesus bai mas paden di e hofi di Getsemane e anochi di Su aresto. Sinembargo, e mesun anochi ei ora Judas a traiciona Hesus y nan a arest’e, Pedro y e otro apostelnan a bandona Hesus y hui bai. Mas despues, Pedro tabatin suficiente curashi pa para pafo mientras cu nan tabata husga Hesus ilegalmente. Pero despues Pedro a bolbe haya miedo y a comete un eror grave: tres biaha el a gaña y a nenga cu e conoce Hesus! (Mateo 26:69-75) Con Hesus a reacciona? Con abo lo a reacciona si un amigo intimo laga bo na caya di e manera ei?

¹³ Hesus tabata cla pa pordona Pedro. E tabata sa cu Pedro a keda hopi kibra pa e peso di su pica. De echo, e apostel arepenti no por a contene su mes y “a cuminsa yora.” (Marco 14:72) Riba e dia cu Hesus a resusita, el a aparece na Pedro, probablemente pa consola y trankilisa e apostel. (Lucas 24:34; 1 Corintionan 15:5) Menos cu dos luna despues, Hesus a duna Pedro e honor di hiba delantera den duna testimonio na e multitud di hende den Jerusalem riba e dia di Pentecoste. (Echonan 2:14-40) Laga nos corda tambe cu Hesus no a carga rencor contra e otro apostelnan tampoco pasobra nan a bandon’e. Al contrario, despues di su resureccion, el a keda yama nan “mi rumannan.” (Mateo 28:10) Ta bisto anto cu Hesus a haci mas cu djis predica cu mester pordona.

14. Dicon nos tin cu siña pordona otro hende, y con nos por demostra cu nos ta cla pa pordona?

¹⁴ Como discipel di Cristo, nos tin cu siña pordona otro hende. Dicon? Pasobra distinto for di Hesus, nos ta imperfecto, mescos cu e hendenan cu ta peca contra nos. De bes en cuando, nos tur ta trompica den palabra y den echo. (Romanonan 3:23; Santiago 3:2) Si nos ta pordona otro hende ora tin base pa mustra misericordia, nos ta habri caminda pa Dios pordona nos nos picanan. (Marco 11:25) Pues anto, con nos por demostra cu nos ta dispuesto pa pordona hende cu ta peca contra nos? Den hopi caso, amor ta yuda nos pasa por halto di pica- y faltanan menor di otro hende. (1 Pedro 4:8) Ora hende cu a haci malo contra nos ta sinceramente arepenti, manera Pedro tabata, nos siguramente lo kier imita Hesus su actitud di ta dispuesto pa pordona. En bes di tene hende na curason, ta sabi pa nos stop di carga rencor. (Efesionan 4:32) Haciendo esei nos ta contribui na pas di e congregacion y tambe na pas den nos mente y curason.—1 Pedro 3:11.

Hesus A Demostra Confiansa

15. Dicon Hesus a confia su discipelnan a pesar di nan faltanan?

¹⁵ Amor y confiansa ta cana man den man. “Tur cos [amor] ta kere.”c (1 Corintionan 13:7) Motiva pa amor, Hesus a demostra di ta dispuesto pa confia su discipelnan a pesar di nan imperfeccionnan. E tabatin confiansa den nan y tabatin sigur cu nan sinceramente a stima Jehova y kier a haci su boluntad. Asta ora nan a comete eror, Hesus no a cuestiona nan motibonan. Por ehempel, ora e apostelnan Santiago cu Juan evidentemente a laga nan mama bai pidi pa nan sinta banda di Hesus den su Reino, Hesus no a duda den nan lealtad y kita nan di sirbi como apostel.—Mateo 20:20-28.

16, 17. Ki responsabilidadnan Hesus a laga den man di su discipelnan?

¹⁶ Hesus a demostra su confiansa dor di encarga su discipelnan cu varios responsabilidad. Na e dos ocasionnan cu el a multiplica cuminda milagrosamente y a alimenta e multitudnan, el a encarga su discipelnan cu e responsabilidad di parti e cuminda. (Mateo 14:19; 15:36) Como preparacion pa su ultimo Pasco Hudiu, el a asigna Pedro cu Juan pa bai Jerusalem y percura pa e cosnan necesario. Ta nan mester a percura di busca e lamchi, biña, pan sin zuurdeeg, yerba marga y otro articulonan necesario. Esaki no tabata un asignacion insignificante, pasobra e celebracion di e Pasco Hudiu na e manera corecto tabata un rekisito di e Lei di Moises, y Hesus tabatin cu cumpli cu e Lei ei. Ademas, mas lat e anochi ei Hesus a uza e biña y e pan sin zuurdeeg como simbolonan importante ora el a institui e Conmemoracion di su morto.—Mateo 26:17-19; Lucas 22:8, 13.

¹⁷ Hesus a haya cu ta apropia pa confia su discipelnan cu responsabilidadnan asta mas pisa. Manera nos a menciona anteriormente, el a encarga un grupo chikito di su siguidonan ungi riba Tera cu e responsabilidad importante di prepara y distribui alimento spiritual. (Lucas 12:42-44) Corda tambe cu el a laga den man di su discipelnan e encargo masha importante pa predica y haci discipel. (Mateo 28:18-20) Te awe, a pesar cu Hesus ta invisibel y ta goberna for di shelo, e ta confia e cuido di su congregacion riba Tera den man di hombernan cu e ta considera spiritualmente cualifica y cu e ta duna como don na e congregacion.—Efesionan 4:8, 11, 12.

18-20. (a) Con nos por demostra confiansa den rumannan den fe? (b) Con nos por imita Hesus su actitud di ta dispuesto pa encarga otro hende cu responsabilidad? (c) Kico nos lo trata den e siguiente capitulo?

¹⁸ Con nos por sigui e ehempel di Hesus den nos trato cu otro hende? Ora nos ta demostra confiansa den nos rumannan den fe, esei ta un muestra di nos amor. Laga nos corda cu amor ta busca loke ta bon den otro hende, no loke ta malo. Ora hende decepciona nos—locual sigur lo sosode de bes en cuando—amor lo yuda nos pa no ta lihe pa asumi cu nan tin mal motibo. (Mateo 7:1, 2) Si nos mantene un punto di bista positivo di nos rumannan den fe, nos lo trata nan na maneranan cu ta edifica nan en bes di kibra nan.—1 Tesalonicensenan 5:11.

¹⁹ Nos por imita Hesus y ser dispuesto pa encarga otro hende cu responsabilidad? Ta bon pa rumannan cu tin puesto di responsabilidad den congregacion siña encarga otro hende cu tareanan apropia y significativo, cu e confiansa cu nan lo haci nan best. Den tal caso ancianonan cu experencia por duna e entrenamento necesario y valioso na rumannan hoben cualifica cu ta “aspira” pa yuda den congregacion. (1 Timoteo 3:1; 2 Timoteo 2:2) E entrenamento aki ta sumamente importante. Segun cu Jehova ta sigui acelera e crecemento di e obra di Reino, lo tin cu entrena hombernan cualifica pa atende e aumento.—Isaias 60:22.

²⁰ Hesus a laga un ehempel maraviyoso pa nos pa loke ta mustra amor na otro hende. Di tur e maneranan cu nos por siguie, esun di mas importante ta pa medio di imita su amor. Den e siguiente capitulo nos lo trata e manera di mas grandi cu el a expresa su amor pa nos, esta, e echo cu e tabata dispuesto pa entrega su bida.