“Keda Sigui Mi”

1-3. (a) Den ki manera Hesus a bai laga su apostelnan, y dicon esaki no tabata un despedida tristo? (b) Dicon nos tin cu siña tocante e bida cu Hesus a hiba desde cu el a regresa na shelo?

DIESUN homber tabata para hunto riba un sero. Cu gran amor y admiracion nan tabata mira e di 12 persona. E tabata den curpa humano, pero de echo tabata Hesus resusita, kende a bolbe bira e yiu spiritual di mas poderoso di Jehova. Tabata pa delaster biaha cu Hesus a reuni cu su apostelnan riba Sero di Oleifi.

² E sero aki siguramente a trece hopi recuerdo pa Hesus. E ta forma parti di un cadena di sero di calki enfrente di Jerusalem na otro banda di Rooi Kedron. Ta na bahada di e seronan aki e pueblo di Betania tabata keda, caminda Hesus a resusita Lazaro. Apenas algun siman prome, Hesus a sali for di Betfage cu a keda djis eibanda pa haci su entrada triunfal den Jerusalem. Probablemente e hofi di Getsemane, caminda Hesus a pasa e oranan di agonia prome cu su aresto, tambe tabata situa na Sero di Oleifi. Anto awor riba e mesun sero aki Hesus a prepara pa bai laga su amigo- y siguidonan di mas intimo atras. Su palabranan di despedida tabata hopi bondadoso. Anto diripiente el a cuminsa subi bai shelo! E apostelnan a keda para, tur babuca, ta mira nan Shon stima ta subi bai laira. Finalmente, un nubia a kit’e for di nan bista y nan no a mir’e mas.—Echonan 1:6-12.

³ E escena aki ta laga bo pensa riba un despedida tristo, di sintimentonan mixto? Wel, e no tabata asina. De echo, manera dos angel a recorda e apostelnan, Hesus su historia definitivamente no a caba. (Echonan 1:10, 11) Den hopi sentido, su subida pa shelo tabata apenas e comienso. E Palabra di Dios no ta laga nos den scuridad tocante kico a sigui pasa cu Hesus. Ta importante pa haya sa di e bida cu Hesus a hiba for di dia cu el a bai for di Tera. Pakico? Corda e palabranan cu Hesus a papia cu Pedro: “Keda sigui mi.” (Juan 21:19, 22, NW) Nos tur tin cu obedece e mandamento ei, no simplemente como un escohencia temporal sino como nos estilo di bida. Pa por haci esei, nos tin cu compronde kico nos Shon ta haciendo awor y ki asignacionnan el a haya den shelo.

E Bida di Hesus Despues Cu El A Bai for di Tera

4. Con Bijbel a revela di antemano kico lo a pasa den shelo despues cu Hesus lo a bolbe einan?

⁴ E Scritura no ta bisa nada tocante Hesus su yegada den shelo, ki bonbini el a haya ni di su reencuentro gososo cu su Tata. Sinembargo, Bijbel a revela si di antemano kico lo a pasa den shelo asina cu Hesus lo a bolbe bek einan. Ta asina cu pa 15 siglo largo, e pueblo Hudiu regularmente tabata testigo di un ceremonia sagrado. Un biaha pa aña, e sumo sacerdote a drenta den e Santisimo di e tempel pa spat e sanger di e sacrificionan di Dia di Expiacion dilanti di e arca di aliansa. Riba e dia ei, e sumo sacerdote a prefigura e Mesias. Despues cu Hesus a bolbe na shelo el a cumpli cu e nificacion profetico di e ceremonia ei un biaha pa semper. El a drenta den shelo den e presencia mahestuoso di Jehova—e luga di mas santo den universo—y a presenta na su Tata e balor di su sacrificio di rescate. (Hebreonan 9:11, 12, 24) Jehova a acept’e?

5, 6. (a) Kico tabata e evidencia cu Jehova a acepta Cristo su sacrificio di rescate? (b) Ken ta beneficia di e rescate, y con?

⁵ Nos ta haya e contesta ora nos considera kico a pasa poco despues cu Hesus a subi na shelo. Un grupo chikito di mas o menos 120 cristian tabata hunto den un sala ariba na Jerusalem ora cu diripiente un zonido manera un biento violento y fuerte a yena e luga. Loke a parce lenga di candela a bai para riba nan cabes, nan a yena cu spirito santo y a cuminsa papia den varios lenga. (Echonan 2:1-4) E suceso aki a nifica e nacemento di un nacion nobo, Israel spiritual, cu tabata Dios su “rasa scohi” y “sacerdocio real” nobo, apunta pa cumpli cu Dios su boluntad riba Tera. (1 Pedro 2:9) Pues, tabata bisto cu Jehova Dios a acepta y a aproba e sacrificio di rescate di Cristo. Dramamento di spirito santo tabata un di e prome bendicionnan cu e rescate a haci posibel.

⁶ Di e tempo ei en adelante, e rescate di Cristo a beneficia su siguidonan rond mundo. Sea cu nos ta parti di e “tou chikito” di cristian ungi, cu lo goberna cu Cristo den shelo, of parti di e “otro carnenan”, cu lo biba riba Tera bou di su gobernacion, nos ta beneficia di su sacrificio. (Lucas 12:32; Juan 10:16) E sacrificio ei ta e base pa nos speransa y pa nos haya pordon pa nos picanan. Tanten cu nos ta sigui “kere” of eherce fe den e rescate ei, siguiendo Hesus dia tras dia, nos por tin un consenshi limpi y un speransa briyante pa futuro.—Juan 3:16.

7. Ki autoridad Hesus a haya despues cu el a bolbe na shelo, y con abo por apoy’e?

⁷ Kico Hesus ta haciendo den shelo desde cu el a bolbe einan? E tin gran autoridad. (Mateo 28:18) Si, Jehova a apunt’e pa goberna riba e congregacion cristian, un asignacion cu el a cumpli cu ne na un manera amoroso y husto. (Colosensenan 1:13) Manera Bijbel a profetisa, Hesus a percura hombernan responsabel pa atende e necesidadnan di su tou. (Efesionan 4:8) Por ehempel, el a scohe Pablo pa e ta un “apostel di e paganonan”, y a mand’e bai plama e bon nobo na paisnan leu. (Romanonan 11:13; 1 Timoteo 2:7) Casi na final di prome siglo, Hesus a manda mensahenan di elogio, conseho y coreccion na shete congregacion den e provincia Romano di Asia. (Revelacion, capitulo 2-3) Abo ta reconoce Hesus como Cabes di e congregacion cristian? (Efesionan 5:23) Pa bo por keda siguie, lo bo mester fomenta un spirito di obediencia y cooperacion den bo congregacion local.

8, 9. Ki autoridad Hesus a haya na 1914, y kico esei lo mester nifica pa nos den e decisionnan cu nos ta tuma?

⁸ Hesus a haya mas autoridad ainda na aña 1914. E aña ei el a keda nombra como Rei di Jehova su Reino Mesianico. Ora cu e gobernacion di Hesus a cuminsa “tabatin guera den shelo.” Cu ki resultado? Satanas cu su demoñonan a ser tira abou riba Tera, locual a inicia un era di “ai.” E gueranan, criminalidad, teror, malesa, temblor y hamber cu ta reina y cu ta aflihi hende den nos tempo ta recorda nos cu Hesus ta gobernando actualmente den shelo. Satanas ainda ta “e prins di e mundo aki” pa “un poco tempo mas.” (Revelacion 12:7-12; Juan 12:31; Mateo 24:3-7; Lucas 21:11) Sinembargo, Hesus ta dunando hende na tur parti di mundo e oportunidad pa acepta su gobernacion.

⁹ Ta di sumo importancia pa nos tuma nos posicion na banda di e Rei Mesianico. Den tur nos decisionnan diario, nos tin cu busca su aprobacion, no aprobacion di e mundo degrada aki. Segun cu e “Rei di Reinan y Señor di Señornan” aki ta inspecciona humanidad, su curason husto ta kima di rabia y ta abunda cu goso. (Revelacion 19:16) Dicon?

E Rabia y e Goso di e Rei Mesianico

10. Ki caracter Hesus tin di naturalesa, sinembargo ta kico ta yena nos Shon cu rabia husto?

¹⁰ Nos Shon, mescos cu su Tata, ta felis di naturalesa. (1 Timoteo 1:11, NW) Como hende, Hesus no tabata ni critico ni exigente. Sinembargo, tin hopi cos ta pasando riba Tera awe cu lo mester ta yen’e cu rabia husto. Definitivamente e ta rabia cu tur e organisacionnan religioso cu falsamente ta pretende di ta represent’e. El a profetisa esei: “No ta tur hende cu bisa mi: ‘Señor, Señor’, lo drenta e reino di shelo; ma esun cu haci e boluntad di mi Tata cu ta den shelo. Hopi lo bisa mi den e dia ei: ‘Señor, Señor, nos no a haci hopi milager den bo nomber?’ E ora ei lo mi declara na nan: ‘Nunca mi no a conoce boso; bai for di mi, boso cu ta haci inikidad.’”—Mateo 7:21-23.

11-13. Dicon algun hende kisas ta keda straña pa e palabranan cu Hesus ta dirigi na esnan cu ta haci “hopi milager” den su nomber, sinembargo dicon e ta rabia? Ilustra esei.

¹¹ Hopi hende awe cu ta yama nan mes cristian lo por haya e palabranan ei straño. Pakico Hesus lo dirigi palabranan fuerte asina na hende cu a haci “hopi milager” den su nomber? E iglesianan di cristiandad a sponsor obranan di caridad, a yuda pober, traha hospital y scol, y a haci hopi otro obra mas. Pa compronde dicon nan ta merece Hesus su rabia, considera e siguiente ilustracion.

¹² Un tata cu mama tin cu bai di biahe. Nan no por bai cu e muchanan, pues nan ta contrata un babysitter. E instruccion cu nan ta dun’e ta simpel: “Cuida e muchanan. Duna nan cuminda, percura pa nan ta limpi y wak pa nada no pasa cu nan.” Pero ora e mayornan bolbe cas, nan ta keda geshock pa mira nan yiunan tur hambra. E muchanan ta tur sushi, enfermo y infelis. Nan ta yorando pa haya atencion di e babysitter, pero e no ta haci caso di nan. Dicon? Pasobra e ta riba trapi ta laba bentana. Rabia, e mayornan ta exigi un splicacion. E babysitter ta contesta: “Wak tur loke mi a haci! E bentananan no ta limpi? Mi a drecha cos na e cas tambe, y tur esei pa boso!” Esaki lo laga e mayornan sinti nan mihor? No! Ni un momento nan no a pidie haci e tareanan ei; unico cos cu nan tabata kier ta pa e cuida e muchanan. E echo cu e no a cumpli cu nan instruccion ta haci nan furioso.

¹³ Cristiandad a actua mescos cu e babysitter ei. Hesus a laga instruccion cerca su representantenan pa nan alimenta e hendenan spiritualmente dor di siña nan e berdad di e Palabra di Dios y yuda nan keda spiritualmente limpi. (Juan 21:15-17) Sinembargo, cristiandad a faya barbaramente y no a obedece su instruccion. Cristiandad a laga e hendenan spiritualmente hambra, confundi pa falsedad y ignorante di e berdadnan fundamental di Bijbel. (Isaias 65:13; Amos 8:11) Asta su intentonan pa drecha e mundo aki no por hustifica su desobediencia delibera. De echo, e sistema mundial aki ta manera un cas cu a keda destina pa basha abou! E Palabra di Dios ta mustra bon cla cu pronto e sistema mundial di Satanas lo ser destrui.—1 Juan 2:15-17.

14. Ki trabou ta haci Hesus contento awe, y dicon?

¹⁴ Di otro banda, Hesus lo mester ta hopi contento ora e wak abou for di shelo y mira miyones di hende ta cumpli cu e encargo di haci discipel cu el a duna su siguidonan prome cu el a bai for di Tera. (Mateo 28:19, 20) Ta un gran privilegio di por contribui na e goso di e Rei Mesianico! Laga nos ta determina pa nunca stop di yuda “e esclabo fiel y prudente.” (Mateo 24:45) Distinto for di clero di cristiandad, e grupo chikito aki di ruman ungi obedientemente a hiba delantera den e trabou di predica y fielmente a alimenta e carnenan di Cristo.

15, 16. (a) Kico Hesus ta pensa di e falta di amor cu ta reina awe, y con nos por sa esei? (b) Con bin cristiandad merece e rabia di Hesus?

¹⁵ Nos por tin sigur cu e Rei ta rabia ora e ta mira e falta di amor cu ta reina riba Tera awe. Kisas nos ta corda con e farizeonan a critica Hesus pasobra el a cura hende riba sabat. Nan curason tabata asina duro, nan tabata asina terco, cu nan no por a mira mas aya di nan propio interpretacion di e Lei di Moises y di e lei oral. E milagernan di Hesus a trece masha hopi beneficio mes pa hende! Pero e goso, e alivio, e fe mas fuerte cu e milagernan ei a produci no a nifica nada pa e farizeonan. Kico Hesus a pensa di e hombernan ei? Un biaha el “a wak nan tur cu cara rabia, tristo pa motibo di e duresa di nan curason.”—Marco 3:5.

¹⁶ Awe, Hesus ta mira hopi mas tanto cos cu ta lag’e sinti su mes masha “tristo.” E lidernan di cristiandad ta ciega pa nan devocion na tradicion- y doctrinanan cu no ta na harmonia cu e Scritura. Ademas, e predicacion di e bon nobo di e Reino di Dios ta haci nan furioso. Den hopi parti di mundo, clero a instiga persecucion cruel contra e cristiannan cu sinceramente ta purba predica e mensahe cu Hesus a predica. (Juan 16:2; Revelacion 18:4, 24) Na mes momento, e miembronan ei di clero hopi biaha ta anima nan propio siguidonan pa bai guera y kita bida di otro hende, como si fuera esei lo agrada Hesucristo!

17. Con e berdadero siguidonan di Hesus ta haci su curason contento?

¹⁷ Na contraste, e berdadero siguidonan di Hesus ta haci esfuerso pa mustra amor na nan prohimo. Nan ta predica e bon nobo na “tur clase di hende”, manera Hesus a haci, a pesar di oposicion. (1 Timoteo 2:4, NW) Anto e amor cu nan ta mustra na otro ta sobresaliente; esei ta e marca principal cu ta identifica nan. (Juan 13:34, 35) Segun cu nan ta trata nan rumannan cristian cu amor, respet y dignidad, nan realmente ta siguiendo Hesus, y ta haci e curason di e Rei Mesianico contento!

18. Kico ta haci nos Shon masha tristo, sinembargo con nos por agrad’e?

¹⁸ Nos tin cu corda tambe cu nos Shon ta sinti su mes masha tristo ora su siguidonan keda sin persevera y ta laga nan amor pa Jehova fria y ta stop di sirbie. (Revelacion 2:4, 5) Sinembargo, Hesus ta keda contento cu esnan cu ta persevera te na fin. (Mateo 24:13) Pues riba tur cos, laga nos corda semper riba e mandamento aki di Cristo: “Keda sigui mi.” (Juan 21:19, NW) Ban considera algun di e bendicionnan cu e Rei Mesianico lo drama riba esnan cu persevera te na fin.

Bendicion Continuo pa Fiel Sirbidornan di e Rei

19, 20. (a) Sigui Hesus ta hiba na ki bendicion for di awor? (b) Con e echo cu nos ta sigui Cristo por yuda nos satisface nos necesidad di tin un tata?

¹⁹ Sigui Hesus ta e caminda pa un bida hopi bendiciona for di awor. Si nos acepta Cristo como nos Shon, siguiendo su instruccion y uzando su ehempel como nos guia, nos lo haya tesoronan cu hende rond mundo ta buscando sin por haya. Nos lo ser bendiciona cu trabou cu ta duna nos bida proposito, un famia di rumannan den fe uni den un berdadero laso di amor, un consenshi limpi y pas mental. Den poco palabra, nos lo haya un bida felis cu ta duna satisfaccion. Anto tin mas cos cu nos lo haya.

²⁰ Jehova a duna Hesus como un “Tata Eterno” pa esnan cu tin e speransa di biba pa semper riba Tera. Hesus ta remplasa e prome tata humano, Adam, kende lamentablemente a laga tur su descendientenan na caya. (Isaias 9:6, 7) Si nos acepta Hesus como nos “Tata Eterno” y eherce fe den dje, nos tin un speransa sigur di bida eterno. Ademas, asina nos ta hala mas y mas cerca di Jehova Dios. Manera nos a siña, e mihor manera pa obedece e mandamento divino, “sea imitadonan di Dios, manera yiunan stima”, ta di haci esfuerso pa sigui e ehempel di Hesus dia aden dia afo.—Efesionan 5:1.

21. Con siguidonan di Cristo ta refleha lus den un mundo scur?

²¹ Segun cu nos ta imita Hesus y su Tata, Jehova, nos tin un privilegio maraviyoso. Nos ta refleha un lus briyante. Den un mundo tapa cu scuridad, caminda miles di miyones di hende ta ser gaña pa Satanas y ta imita su caracteristicanan, nos cu ta sigui Cristo ta refleha tur caminda e lus di mas briyante, esta, e lus di berdadnan spiritual, e lus di bon cualidadnan cristian, e lus di berdadero goso, pas y amor. Na mes momento, nos ta hala mas cerca di Jehova, y esei ta e meta di mas halto cu cualkier criatura inteligente por pone.

22, 23. (a) Ki bendicionnan den futuro lo bin pa esnan cu fielmente ta keda sigui Hesus? (b) Kico lo mester ta nos determinacion?

²² Pensa tambe riba loke Jehova kier haci pa bo den futuro pa medio di su Rei Mesianico. Pronto e Rei ei lo hiba un guera husto contra Satanas su sistema di cosnan malbado. E victoria di Hesus ta sigur! (Revelacion 19:11-15) Despues di esei, Cristo lo cuminsa cu su Reinado di Mil Aña riba Tera. Su gobierno celestial lo distribui e beneficionan di e rescate na tur hende fiel, elevando nan na perfeccion. Imagina bo cu salud perfecto, semper hoben y fuerte, trahando felismente hunto cu un famia humano uni pa transforma e Tera aki den un paradijs! Na fin di Hesus su reinado di Mil Aña lo e entrega e gobernacion bek na su Tata. (1 Corintionan 15:24) Si bo keda sigui Cristo fielmente, lo bo haya un bendicion asina maraviyoso cu e ta asta dificil pa imagina, esta, “e libertad glorioso di e yiunan di Dios”! (Romanonan 8:21) Si, nos lo tin tur e bendicionnan cu Adam cu Eva tabatin y a perde. Siendo yiunan terenal di Jehova, nos lo ta libra pa semper di e mancha di pica di Adam. Di berdad, “lo no tin morto mas.”—Revelacion 21:4.

²³ Corda e hoben gobernante rico cu nos a papia di dje den Capitulo 1. El a nenga Hesus su invitacion: “Bin, sigui mi.” (Marco 10:17-22) No comete e eror ei nunca! Nos ta spera cu bo ta acepta Hesus su invitacion cu goso y entusiasmo. Sea determina pa persevera, pa keda sigui e Bon Wardador dia aden dia afo, aña aden aña afo, y asina biba pa mir’e hiba finalmente tur e propositonan di Jehova na nan glorioso cumplimento!