Con Nos Mester Trata un Persona Expulsa?

Un di e cosnan cu mas ta duel nos ta ora un famia of amigo intimo ser expulsa for di congregacion pa motibo cu e no a arepenti di pica cu el a comete. Sinembargo, e manera cu nos ta reacciona riba loke Bijbel ta bisa pa haci den e asunto aki ta indica cuanto nos ta stima Dios y te na ki grado nos ta keda leal na su areglo.a Laga nos analisa algun pregunta cu por lanta encuanto e tema aki.

Con nos mester trata un persona expulsa? Bijbel ta bisa pa “stop di anda cu esun cu ta yama su mes ruman, pero cu ta un fornicado of un persona golos, of un adorador di dios falso, of un hende cu ta zundra otro, of un burache of un hende cu ta chantahia otronan, y pa boso ni sikiera come cu un hende asina.” (1 Corintionan 5:11) Ademas, Bijbel ta bisa relaciona cu e persona ‘cu no keda den e siñansa di Cristo’: “No ricibie nunca den boso cas ni cumind’e. Pasobra esun cu cumind’e ta complice den su maldad.” (2 Juan 9-11) Pues, nos no ta papia tocante asuntonan spiritual ni tin trato social cu personanan expulsa. La Atalaya di 15 di november 1981, ­pagina 19, a bisa: “Un simpel ‘Con ta bay’ por ta e prome paso cu ta hiba na un combersacion y talbes na un amistad. Nos lo kier dal e prome paso ey relaciona cu un persona expulsa?”

Ta realmente necesario pa evita tur contacto cu e persona? Si, anto pa varios motibo. Di prome, esey ta demostra lealtad na Dios y na su Palabra. Nos ta stima Jehova asina tanto cu semper nos kier obedec’e, hasta ora ta dificil pa haci esey. Ademas, nos ta convenci cu e ta un Dios husto y amoroso y cu tur su leynan ta pa nos mes bon. (Isaias 48:17; 1 Juan 5:3) Di dos, un pecador cu no a arepenti ta un mal influencia. Pues, ora nos ta evita contacto cu ne, nos ta proteha nos mes den sentido moral y spiritual, y nos ta conserva e pureza y e bon reputacion di e congregacion. (1 Corintionan 5:​6, 7) E di tres motibo ta cu e expulsion por hasta beneficia e pecador. Den ki manera? Si nos tuma un posicion firme na fabor di principio biblico y apoya e decision di e comite hudicial, esey lo por touch curason di e pecador, kende te asina leu no a reacciona na un manera positivo riba e esfuerso cu e ancianonan a haci pa yud’e. Kisas ora e mira cu el a perde e relacion precioso cu e tabatin cu su sernan keri, esey por yud’e “recobra su sano huicio”, mira con grave su pica ta y dal e pasonan necesario pa bolbe cerca Jehova.​—Lucas 15:17.

Kico si un miembro di famia ser expulsa? E laso cu ta existi entre miembronan di famia por pone nos lealtad na Jehova na prueba. Con nos mester trata esun expulsa? Nos no por analisa tur situacion cu por surgi, pero laga nos concentra riba dos situacion basico.

Den algun caso e persona expulsa ta keda biba na cas cerca su famia. Ya cu expulsion no ta kibra e lasonan familiar, e trato y actividadnan normal di tur dia por sigui den e famia. Sinembargo, e persona a scoge, pa medio di su comportacion, pa kibra e laso spiritual cu tabata uni e cu su famia creyente. Pues, e miembronan di famia cu a keda fiel no por papia cu ne mas tocante asuntonan spiritual. Por ehempel, si e ta presente durante e estudio di Bijbel di e famia, e no por participa. Pero si e ta un yiu menor di edad, e mayornan por studia Bijbel cu ne, ya cu ainda nan tin e responsabilidad di siñ’e y disciplin’e.b​—Proverbionan 6:​20-22; 29:17.

Awor, kico si e persona expulsa no ta biba na cas cerca su famia? Den e caso ey e cristiannan fiel ta limita nan contacto cu ne na lo minimo, kisas solamente na ocasionnan cu e mester t’ey pa atende asuntonan di famia. Nan lo no busca excuus pa tin trato cu ne. Al contrario, nan lealtad na Jehova y na su organisacion ta motiva nan pa respeta e areglo ­biblico di expulsion. Nan kier lo mihor pa e persona expulsa, y nan posicion leal lo por yud’e beneficia di e disciplina cu el a haya.c​—Hebreonan 12:11.