Ki Ora Mester Tapa Cabes y Dicon?

Bou di inspiracion, apostel Pablo a splica cu tin biaha hende muher cristian tin cu tapa cabes ora nan ta rindi sirbishi na Jehova. Ta den ki situacion nan tin cu hacie y dicon? Laga nos analisa 1 Corintionan 11:​3-16, caminda e apostel a duna nos algun instruccion cu nos tin mester pa por actua di un forma cu ta honra Dios. Pablo a menciona tres factor cu nos tin cu tene cuenta cu ne: (1) E actividadnan cu ta rekeri pa un ruman muher tapa su cabes, (2) e situacionnan den cua e mester haci esey y (3) e motibonan cu e tin pa aplica e norma aki.

E actividadnan. Pablo a menciona dos: haci oracion y profetisa. (Versiculo 4, 5) Manera nos sa, hacimento di oracion ta un forma di adora Jehova. Y den nos tempo, profetisamento ta referi na nos obra di duna siñansa biblico. Acaso Pablo kiermen cu un muher mester tapa su cabes cada bes cu e ta haci oracion of siña hende e berdad di Bijbel? No. Esey ta depende di e di dos factor: e situacionnan den cua e actividadnan ey ta tuma luga.

E situacionnan. E palabranan di Pablo ta indica dos situacion of area di actividad: den famia y den congregacion. El a skirbi: “Cabes di muher ta homber . . . Tur muher cu ta haci oracion of profetisa sin tapa cabes ta brongosa su cabes.” (Versiculo 3, 5) Den famia, Jehova a nombra e esposo como cabes di e muher. Pero kico si e muher ta atende responsabilidad cu Jehova a asigna na su esposo? Si e ta atende nan sin duna e debido reconocemento na e autoridad di su esposo, e ta brongosa su esposo. Considera un par di ehempel. Si e tin cu dirigi un estudio di Bijbel den presencia di su esposo, e ta tapa su cabes pa mustra respet pa e autoridad di su esposo. Anto lo e haci esey, sea cu e esposo ta batisa of no, pasobra e esposo ta cabes di e famia.a Kico si e muher mester haci oracion of studia Bijbel cu un hende den presencia di su yiu menor di edad cu ta batisa? Aunke e yiu no ta cabes di e famia, toch e mama lo tapa su cabes. Dicon? Pa mustra respet pa e autoridad cu Dios ta duna hende homber batisa den e congregacion cristian.

Pablo ta menciona e di dos situacion, esta, den congregacion, ora el a skirbi: “Si un hende kier discuti riba esaki pa e por sigui un otro custumber, ni nos ni e congregacionnan di Dios no tin otro custumber.” (Versiculo 16) Den e congregacion cristian, Jehova a duna hende homber batisa autoridad como cabes. (1 Timoteo 2:​11-14; Hebreonan 13:17) Pesey ta homber so ta ser nombra como anciano y sirbidor ministerial pa carga e responsabilidad di cuida Su tou. (Echonan 20:28) Pero, de bes en cuando, circunstancianan ta pone cu un muher cristian tin cu atende un tarea cu normalmente ta un ruman homber batisa y capaz tin cu haci. Por ehempel, kisas e tin cu dirigi un reunion pa sirbishi di veld pasobra no tin un ruman homber batisa y capaz. Of e tin cu dirigi den presencia di un ruman homber batisa un estudio biblico estableci. Como cu den e casonan ey e actividadnan ta en realidad un extension di e programa di siñansa di e congregacion cristian, e ruman muher lo tapa su cabes pa mustra cu e ta reconoce cu e ta haciendo un tarea cu normalmente ta un ruman homber lo mester haci.

Di otro banda, tin hopi ocasion durante nos adoracion den cua un ruman muher no tin cu tapa cabes. Por ehempel, e no tin nodo di hacie ora e ta comenta na reunion, ta predica di cas pa cas cu su esposo of cu un otro ruman homber batisa, of ora e ta haci oracion of studia cu su yiunan cu no ta batisa. Claro cu por lanta mas pregunta den un cierto caso. Si e ruman muher no sa sigur kico pa haci, e por investiga e asunto mas aleu.b Pero si e keda cu duda y si su consenshi ta motiv’e pa tapa su cabes, no tin nada malo den esey, manera e plachi ta mustra.

E motibonan. Den versiculo 10, nos ta haya dos motibo pakico un muher cristian lo kier cumpli cu e rekisito aki: “Muher mester tin un señal di sumision riba su cabes, pa motibo di e angelnan.” Nos ta deduci e prome motibo for di e expresion “un señal di sumision.” Con nos mester compronde e expresion aki? Wel, ora un ruman muher tapa su cabes, esey ta un señal cu e ta reconoce e autoridad cu Jehova a duna hende homber batisa den congregacion. Esey pues ta un manera cu e ruman muher ta mustra su amor pa Jehova Dios y su lealtad na dje. E di dos motibo nos ta haya den e palabranan “pa motibo di e angelnan.” Ki efecto un muher cu tapa su cabes por tin riba e spiritonan poderoso ey?

E angelnan ta interesa pa wak si tur miembro di e organisacion di Jehova, tanto den cielo como riba tera, ta mustra respet pa Su autoridad. Eigenlijk, nan ta beneficia di e ehempel di obediencia di hende imperfecto. Con cu bay bin, e angelnan tambe mester ta sumiso na Jehova su areglo, algo cu basta angel no a haci den pasado. (Judas 6) Awe, e angelnan ta haya un magnifico ehempel di sumision cada biaha cu un ruman muher somete su mes boluntariamente na e autoridad di un ruman homber batisa den congregacion, hasta si e ruman muher tin mas experencia, conocemento of inteligencia cu e ruman homber. Den algun caso e ruman muher ta un cristian ungi cu despues lo bira parti di e grupo di heredero cu lo reina hunto cu Cristo den cielo, den un posicion mas halto cu e angelnan. Pues, e ruman muhernan tin un privilegio unico! Ora nan ta leal y sumiso, nan ta duna miyones di angel un berdadero ehempel di humildad y obediencia.