Saludamento di Bandera, Votamento y Servicio Civil Alternativo

Saludamento di Bandera. Testigonan di Jehova ta kere cu ora un hende saluda of buig pa un bandera, hopi biaha durante tocamento di himno, e ta haciendo un acto di adoracion cu ta atribui salbacion na patria of su lidernan, en bes di na Dios. (Isaias 43:11; 1 Corintionan 10:14; 1 Juan 5:21) Un lider cu a ricibi e tipo di veneracion ey ta Rey Nabucodonosor di Babilonia. Pa impresiona e pueblo cu su grandeza y fervor religioso, e monarca poderoso aki a traha un imagen inmenso y a obliga su subditonan buig pa e imagen, segun cu un tipo di himno tabata toca. Sinembargo, tres mucha homber Hebreo—Sadrak, Mesak y Abed-nego—a nenga di buig pa e imagen, aunke tabatin castigo di morto pa esey.—Daniel, capitulo 3.

Kico di awe? E historiado Carlton Hayes a skirbi cu den nos era “nacionalismo su simbolo principal di fe y obheto central di adoracion ta bandera. . . . Hombernan ta kita sombre ora bandera ta pasa; poetanan ta dedica alabanza na honor di bandera y muchanan ta canta himno p’e.” Ademas, el a bisa cu nacionalismo tambe tin su “dianan sagrado” (manera 4 di juli cu ta Dia di Independencia di Merca), su “santo- y heroenan” y su “tempelnan” of luganan sagrado. Durante un ceremonia publico na Brazil, e presidente di e Corte Militar Superior a reconoce cu ‘hende ta venera y adora bandera mescos cu nan ta adora Patria.’ Manera Encyclopedia Americana a yega di menciona: “Bandera ta mes sagrado cu cruz.”

E mesun enciclopedia ey a splica recientemente cu himno nacional ta un “expresion di sintimentonan patriotico cu hopi bes ta inclui un peticion na Dios pa guia y proteha e pueblo of su gobernantenan.” Pues, e punto di bista di e sirbidornan di Jehova no ta extremo. Nan tin rason di mira ceremonianan patriotico, den cua ta saluda bandera of toca himno, como actonan di adoracion. Comentando riba e echo cu e yiunan di Testigonan di Jehova ta nenga di rindi homenahe na bandera of di ripiti e huramento di lealtad na scol, na Merca, e buki The American Character (E Caracteristicanan di e Pueblo Mericano) a bisa: “Porfin Corte Supremo a confirma den un serie di sentencia cu e ritualnan diario aki ta di caracter religioso.”

Testigonan di Jehova no ta participa den e ceremonianan ey pasobra nan ta haya cu esakinan ta bay contra principio biblico; pero si otro hende kier hacie, e Testigonan ta respeta e derecho cu nan tin. Tambe nan ta respeta bandera como un simbolo nacional y ta somete nan mes na gobiernonan legitimo, ya cu esakinan ta e “autoridadnan superior” cu ta fungi como “sirbidor di Dios.” (Romanonan 13:1-4) Pesey, Testigonan di Jehova ta sigui e conseho pa haci oracion “pa reynan y tur esnan cu ta den puesto halto.” Sinembargo, nos ta hacie pa “nos por sigui hiba un bida trankil y keto cu pleno devocion na Dios y seriedad.”—1 Timoteo 2:2.

Votamento den eleccion politico. Cristiannan berdadero ta respeta e derecho cu otro hende tin di vota. Nan no ta core campaña contra eleccion ni nenga di coopera cu e autoridadnan eligi. Sinembargo, nan ta tuma e decision firme di keda completamente neutral den asunto politico. (Mateo 22:21; 1 Pedro 3:16) Kico un cristian mester haci si den su pais votamento ta obligatorio of si tin sintimentonan fuerte contra hende cu no bay stemlokaal? Si su consenshi ta permitie, e por bay stemlokaal. E ta actua e ora ey mescos cu Sadrak, Mesak y Abed-nego, kendenan den circunstancianan similar a bay e yanura di Dura. Ma e cristian lo percura pa no viola su neutralidad. Lo e tene cuenta cu e seis principionan aki:

1. E siguidornan di Hesus “no ta parti di mundo.”—Juan 15:19.

2. Cristiannan ta representa Cristo y su Reino.—Juan 18:36; 2 Corintionan 5:20.

3. Tur miembro di congregacion ta uni den e mesun creencia y e mesun amor cristian.—1 Corintionan 1:10; Colosensenan 3:14.

4. Esun cu vota pa un mandatario ta carga cierto grado di responsabilidad pa loke e mandatario ey haci.—Tuma nota di e principionan cu tin den e palabranan di 1 Samuel 8:5, 10-18 y 1 Timoteo 5:22.

5. Ora Israel a pidi pa haya un gobernante visibel, pa Jehova esey tabata un señal cu nan a rechasa Su soberania.—1 Samuel 8:7.

6. Cristiannan mester keda neutral pa nan por papia cu frankesa cu hende di tur ideologia politico tocante e Reino di Dios.—Mateo 24:14; 28:19, 20; Hebreonan 10:35, nota.

Servicio civil alternativo. Tin pais ta exigi di personanan cu nenga servicio militar pa haci un tipo di servicio alternativo, cu no ta militar, pa un periodo di tempo. E servicio ey por ta, entre otro, cobamento di pos, trahamento di caminda, scol y hospital. Kico nos mester haci si nos haya nos cu e situacion aki? Haci oracion na Jehova y busca informacion tocante e asunto. Tambe nos por pidi un cristian maduro conseho. Asina nos por tuma un bon decision a base di nos consenshi.—Proverbionan 2:1-5; Filipensenan 4:5.

E Palabra di Dios ta bisa nos pa nos ta “obediente na gobierno y autoridad”, pa nos ta “cla pa tur bon obra” y pa nos ta “rasonabel.” (Tito 3:1, 2) Cu esey na mente, nos por puntra nos mes lo siguiente tocante e servicio civil alternativo cu nan ta ofrece: ‘Lo mi compromete mi neutralidad cristian of haya mi envolvi den religion falso si mi acept’e?’ (Mikeas 4:3, 5; 2 Corintionan 6:16, 17) ‘Lo ta dificil, of casi imposibel, pa mi cumpli cu mi responsabilidadnan cristian si mi bay haci e trabou aki?’ (Mateo 28:19, 20; Efesionan 6:4; Hebreonan 10:24, 25) ‘Of, lo mi tin mas tempo pa participa den actividadnan spiritual, kisas hasta cuminsa cu sirbishi di tempo completo?’—Hebreonan 6:11, 12.

Si un cristian dicidi a base di su consenshi cu e por cumpli cu servicio civil alternativo, en bes di bay prizon, su rumannan den fe mester respeta su decision. (Romanonan 14:10) Di otro banda, si e ta sinti cu e no por haci tal servicio, e rumannan tin cu respeta su punto di bista e ora ey tambe.—1 Corintionan 10:29; 2 Corintionan 1:24.