Cuanto testigo di Jehova bo conoce? Algun di nos por ta bo bisiña, colega di trabou of compañero di scol. Of talbes nos a yega di combersa cu bo tocante Bijbel. Pero ken nos ta realmente, y dicon nos ta papia di nos creencianan cu otro hende?

Nos ta hende normal, mescos cu tur hende. Nos ta bin di diferente nacionalidad, cultura y nivel social. Antes algun di nos tabata pertenece na otro religion; otronan no tabata kere mes den Dios. Pero prome cu nos a bira testigo di Jehova, nos tur a tuma tempo pa analisa e siñansanan di Bijbel. (Echonan 17:11) Nos a acepta loke nos a siña y a tuma e decision pa sirbi Jehova Dios.

Estudio di Bijbel ta yuda nos. Mescos cu tur otro hende, nos tambe tin nos problema- y debilidadnan. Pero segun cu nos ta haci esfuerso pa aplica principionan di Bijbel, nos ta ripara con esey ta yuda nos hiba un mihor bida. (Salmo 128:1, 2) Esey ta un di e motibonan pakico nos ta comparti e bon cosnan cu nos a siña for di Bijbel cu otro hende.

Nos ta biba segun e normanan di Dios. Hende cu ta aplica normanan di Bijbel ta hiba un bida mas feliz y ta respeta otro hende. Nos ta hende honesto y bondadoso y ciudadano util pa comunidad. Ademas, e normanan di Dios ta contribui na union den famia, un bida moralmente limpi y mas saludabel. Cu e conviccion cu “Dios no ta haci distincion di persona”, nos ta forma parti di un hermandad internacional uni, liber di barera politico y racial. Pues, aunke nos ta hende normal mescos cu tur hende, nos ta un pueblo unico.—Echonan 4:13; 10:34, 35.

• Den ki sentido testigonan di Jehova ta mescos cu tur otro hende?

• Ki normanan testigonan di Jehova a siña durante nan estudio di Bijbel?

Hopi hende ta kere cu testigonan di Jehova ta nomber di un religion nobo. Sinembargo, mas cu 2.700 aña pasa, e Dios berdadero a yama su sirbidornan “mi testigonan.” (Isaias 43:10-12) Prome cu 1931, nos tabata conoci como Studiantenan di Bijbel. Dicon nos a cuminsa uza e nomber testigonan di Jehova?

E nomber ta identifica nos Dios. Segun e manuscritonan di antiguedad, e nomber di Dios, Jehova, ta aparece mas cu 7.000 biaha den Bijbel. Hopi version di Bijbel a reemplasa e nomber aki cu titulonan, manera Señor of Dios. Sinembargo, e Dios berdadero a uza su nomber, Jehova, pa identifica su mes ora el a bisa: “Pa e hendenan cu resta, hunto cu hende di tur nacion, esta, hende cu ta carga mi nomber, por haci esfuerso pa busca Jehova. Esaki ta loke Jehova ta bisa, kende ta esun cu ta haci e cosnan aki.” (Echonan 15:17) Dios su nomber santo ta distinguie for di tur dios falso, y nos ta orguyoso di por carga su nomber.

E nomber ta bisa kico ta nos mision. Den pasado, cuminsando for di e homber husto Abel, un fila largo di hende a duna testimonio di nan fe den Jehova. A traves di siglonan, hopi sirbidor di Jehova, entre otro, Noe, Abraham, Sara, Moises y David, a forma parti di e “nubia ... grandi di testigo” ey. (Hebreonan 11:4–12:1) Mescos cu un hende por duna testimonio den corte na fabor di un persona inocente, nos tambe ta determina pa laga hende sa e berdad tocante nos Dios.

Nos ta imita Hesus. Bijbel ta yama Hesus “e testigo fiel y berdadero.” (Revelacion 3:14) Y Hesus mes a bisa cu el a “haci [Dios su] nomber conoci” y a sigui “duna testimonio di e berdad” tocante Dios. (Juan 17:26; 18:37) Pesey, berdadero siguidornan di Cristo mester carga e nomber di Jehova y hacie conoci na tur hende. Esaki ta loke testigonan di Jehova ta determina pa haci.

• Dicon e Studiantenan di Bijbel a cuminsa uza e nomber testigonan di Jehova?

• Pa cuanto tempo caba Jehova tin su testigonan aki riba Tera?

• Ken ta e Testigo principal di Jehova?

Bijbel a profetisa cu despues di e morto di Cristo, maestronan falso lo a lanta meymey di e prome cristiannan y contamina berdad biblico. (Echonan 20:29, 30) Esey ta exactamente loke a sosode. Nan a mescla e siñansanan di Hesus cu ideanan di religion pagano, y asina nan a crea un forma di cristianismo falso. (2 Timoteo 4:3, 4) Awor, con nos por ta sigur cu awe nos tin e comprondemento corecto di loke Bijbel ta siña realmente?

E tempo a yega pa Jehova revela e berdad. El a bisa cu durante “e tempo di e fin, [“berdadero”, NW] ... conocemento lo aumenta.” (Daniel 12:4) Na 1870, un grupo chikito di hende cu tabata busca e berdad a ripara cu hopi doctrina di iglesia no ta cuadra cu Bijbel. Pesey, nan a cuminsa studia e siñansanan original di Bijbel pa yega na un comprondemento corecto, y Jehova a bendiciona nan esfuersonan.

Hende sincero a studia Bijbel cuidadosamente. E grupo diligente ey di Studiantenan di Bijbel, nos predecesornan, a sigui un metodo di estudio cu te awe nos ta uza. Nan tabata analisa Bijbel a base di topico. Ora nan a topa un parti di Bijbel cu nan no a compronde, nan tabata busca otro textonan biblico pa haya clarificacion. Anto na momento cu nan a yega na un conclusion cu a cuadra cu e resto di e Scritura, nan tabata haci un anotacion di esaki. Pues, nan tabata laga Bijbel splica su mes. Di e manera ey, nan a saca na cla e berdad tocante e nomber di Dios y su Reino, e proposito cu Dios tin pa Tera y humanidad, e condicion di e mortonan y e speransa di resureccion. Nan estudio a libra nan di hopi creencia y tradicion pagano.—Juan 8:31, 32.

Na 1879, e Studiantenan di Bijbel a compronde cu e tempo a yega pa hende rond mundo haya sa e berdad. Pues den e aña ey, nan a cuminsa publica na Ingles e revista cu te awe nos ta imprimi, esta, E Toren di Vigilancia Anunciando e Reino di Jehova Dios. Awe nos ta siña hende berdadnan biblico den mas cu 240 pais y den mas cu 750 idioma. Nunca prome berdadero conocemento tabata asina plama.

• Despues di e morto di Cristo, kico a pasa cu berdad biblico?

• Kico a yuda nos saca e berdad di e Palabra di Dios na cla?

Pa hopi aña, testigonan di Jehova a uza, imprimi y distribui varios version di Bijbel. Pero despues, nos a cuminsa mira e necesidad pa bin cu un traduccion nobo cu lo tabata un mihor yudansa pa hende haya “conocemento exacto di e berdad”, loke ta e boluntad di Dios pa tur hende. (1 Timoteo 2:3, 4) Pues, na 1950 nos a cuminsa publica porcionnan di un Bijbel na Ingles moderno, e asina yama Traduccion di Mundo Nobo. E traduccion aki ta exacto y ta obtenibel den mas cu 130 idioma.

Tabatin mester di un Bijbel cu ta facil pa compronde. Idioma ta desaroya cu tempo, y hopi traduccion di Bijbel ta contene expresionnan vago y anticua cu ta dificil pa compronde. Ademas, recientemente, nan a descubri manuscritonan antiguo mas exacto cu ta yuda traductornan haya un mihor comprondemento di e idiomanan den cua a skirbi Bijbel originalmente, esta, Hebreo, Arameo y Griego.

Tabatin mester di un traduccion cu ta pega fielmente na Dios su palabra. En bes di tuma e libertad di cambia e scrituranan inspira di Dios, traductornan di Bijbel mester pega na e texto original. Sinembargo, mayoria di traduccion di e Scritura Santo no tin e nomber di Dios, Jehova.

Tabatin mester di un Bijbel cu ta duna merito na su Autor. (2 Samuel 23:2) Manera e ehempel aki bou ta ilustra, e manuscritonan mas antiguo di Bijbel ta contene e nomber di Jehova. E nomber aki ta aparece rond di 7.000 biaha. Pesey, e Traduccion di Mundo Nobo a pone e nomber di Dios bek caminda e mester ta den e Scritura. (Revelacion 4:11) E traduccion aki ta producto di añanan largo di investigacion diligente. E ta agradabel pa lesa, pasobra e ta trece Dios su pensamentonan na un manera cla padilanti. Sea cu bo tin e Traduccion di Mundo Nobo den bo idioma of no, nos ta anima bo pa crea e bon custumber di lesa e Palabra di Dios tur dia.—Josue 1:8; Salmo 1:2, 3.

• Dicon un traduccion nobo di Bijbel tabata necesario?

• Si un hende kier haya sa kico ta e boluntad di Dios, kico e tin cu haci tur dia?