Awendia, hopi hende a stop di bay iglesia of misa pasobra nan no ta haya e guia spiritual of consuelo cu nan ta busca. Kisas bo ta puntra bo mes: Pakico mi tin cu asisti na e reunionnan di testigonan di Jehova? Kico lo mi haya eynan?

E goso di ta entre hende cu ta stima otro y cu ta mustra interes den otro. Cada cristian di prome siglo tabata pertenece na un congregacion. Nan tabata bin hunto pa adora Dios, studia e Scritura y anima otro. (Hebreonan 10:24, 25) E ambiente caluroso cu tabata reina na e reunionnan ey a laga e cristiannan sinti cu nan tabata entre berdadero amigo—nan rumannan spiritual. (2 Tesalonicensenan 1:3; 3 Juan 14) Nos reunionnan ta sigui e mesun patronchi, y nos ta sinti e mesun goso.

E bentaha di siña con pa aplica principionan di Bijbel. Manera tabata e caso den tempo biblico, awe tambe, tanto homber, muher como mucha ta bin hunto. Maestronan competente ta uza Bijbel pa yuda nos mira con nos por aplica principionan biblico den nos bida diario. (Deuteronomio 31:12; Nehemias 8:8) Nos tur por duna comentario durante partinan di pregunta y contesta y canta cantica di alabanza; asina nos ta expresa nos speransa cristian.—Hebreonan 10:23.

E bendicion di mira bo fe den Dios bira mas fuerte. Apostel Pablo a bisa un di e congregacionnan di su tempo: “Mi tin masha gana mes di mira boso ... pa por tin un intercambio di estimulo entre nos; pa nos cada un anima otro pa medio di nos fe, tanto di boso como di mi.” (Romanonan 1:11, 12) Ora nos ta asisti regularmente na nos reunionnan hunto cu nos rumannan, nos fe y nos determinacion pa biba segun principionan di Bijbel ta bira mas fuerte.

Pues, en bista di e beneficionan aki, dicon bo no ta asisti na e siguiente reunion di nos congregacion y comproba esaki pa bo mes? Lo bo haya un caluroso bonbini. Entrada ta gratis, y nos no ta pasa collect.

• Ki patronchi nos reunionnan ta sigui?

• Con nos ta beneficia ora nos ta asisti na e reunionnan?

Nos ta asisti regularmente na nos reunionnan, hasta si nos tin cu sali den mal weer. Dicon nos como testigonan di Jehova ta haci asina tanto esfuerso pa ta hunto cu nos rumannan den fe a pesar di contratiempo of cansancio di un dia largo di trabou?

E ta pa nos bienestar. Apostel Pablo a anima nos pa, ora nos ta asocia cu otro, nos “presta atencion na otro.” (Hebreonan 10:24) E palabranan ey ta duna e idea di siña conoce otro. Cu e expresion aki, Pablo ta anima nos pa mustra interes den otro miembronan di congregacion. Si nos ta haci esey, nos lo realisa cu algun di nan a logra vence e mesun tipo di problemanan cu nos tambe tin, y nan experencia por yuda nos.

Nos por cera amistadnan duradero. Na nos reunionnan, nos ta topa berdadero amigo, no djis un grupo di conoci. Na otro ocasion, nos ta recrea hunto na un manera sano. Con esaki ta beneficia nos? Wel, esaki ta yuda nos siña balora otro mas, y esey ta fortalece nos lasonan di amistad. Anto, e amistad estrecho cu nos tin cu nos rumannan den fe lo motiva nos pa ta semper cla pa yuda nan ora nan haya nan cu dificultad. (Proverbionan 17:17) Pesey, ora nos ta asocia cu tur miembro di nos congregacion, nos ta mustra cu nos ta “preocupa pa otro.”—1 Corintionan 12:25, 26.

Nos ta anima bo pa bira amigo di hende cu ta haci e boluntad di Dios. Entre testigonan di Jehova bo por haya hende asina. No laga nada stroba bo di asocia cu nos.

• Dicon ta bon pa nos ta hunto cu nos rumannan na e reunionnan?

• Ki dia lo bo kier bin Salon di Reino pa cera conoci cu nos rumannan?

Ora e cristiannan di prome siglo tabata bin hunto, nan tabata canta, haci oracion y tambe lesa y analisa Bijbel; no tabatin ningun rito religioso. (1 Corintionan 14:26) Bo por spera algo similar na nos reunionnan.

Nos ta ricibi instruccion practico basa riba Bijbel. Den weekend, cada congregacion ta reuni pa scucha un discurso biblico di mey ora cu ta splica kico e Scritura ta bisa di nos tempo y con e por yuda nos den nos bida. E orador ta anima nos pa lesa e textonan hunto cu ne den nos Bijbel. Despues di e discurso, ta sigui e Estudio di “Toren di Vigilancia” cu ta dura un ora. Den e ora aki, nos ta analisa un articulo di estudio for di E Toren di Vigilancia y tur hende presente por participa. E estudio aki ta yuda nos aplica siñansa di Bijbel den nos bida. Cada un di e mas di 110.000 congregacionnan cu tin rond mundo ta studia e mesun informacion.

Nos ta haya yudansa pa bira mas capaz pa siña otro hende. Den siman, nos tin un reunion cu ta consisti di tres parti. E reunion yama Nos Bida y Sirbishi Cristian y e ta basa riba e informacion cu ta sali tur luna den e publicacion Material i Tarea pa Reunion. E ta cuminsa cu Tesoronan di e Palabra di Dios y e parti aki ta trata e porcion di Bijbel cu nos mester lesa di antemano. E di dos parti ta Sea Diligente den Sirbishi y ta consisti di demostracion cu ta duna nos un idea con pa papia cu otro hende tocante Bijbel. Y un consehero lo duna sugerencia pa yuda nos lesa y expresa nos mes mihor. (1 Timoteo 4:13) Por ultimo, nos ta haya Nos Bida Cristian. E parti aki ta yuda nos mira con nos por aplica principionan di Bijbel den nos bida di tur dia. Ademas, e parti aki lo consisti di pregunta y contesta cu ta yuda nos compronde Bijbel mas mihor.

Ora bo asisti na nos reunionnan, sin duda lo bo keda impresiona cu e calidad di siñansa biblico cu bo ta haya.—Isaias 54:13.

• Kico bo por siña na nos reunionnan?

• Cua di nos reunionnan semanal lo bo tin gana di bay?

Bo a ripara riba e potretnan den e foyeto aki con nechi testigonan di Jehova ta bisti pa bay nan reunionnan? Dicon nos ta pone atencion na nos manera di bisti y na nos apariencia?

Pa mustra e debido respet pa Dios. Bijbel ta mustra cu Dios no ta husga hende a base di nan apariencia. (1 Samuel 16:7) Sinembargo, ora nos ta reuni pa ador’e, di curason nos kier mustra e debido respet p’e y pa nos rumannan den fe. Si ta dilanti di un rey of presidente nos tin cu presenta, sin duda nos lo tene cuenta cu nos manera di bisti y nos apariencia. Asina tambe, e manera cu nos ta bisti pa bay nos reunionnan ta mustra nos aprecio pa e “Rey di eternidad”, Jehova Dios, y respet pa e luga caminda nos ta ador’e.—1 Timoteo 1:17.

Pa mustra ki norma y balor nos tin. Bijbel ta anima cristiannan pa nan bisti “cu modestia y [cu] sano huicio”, manera ta pas pa hende cu ta “devoto na Dios.” (1 Timoteo 2:9, 10) Un hende cu ta bisti “cu modestia” no ta hala mucho atencion na su mes. E ta evita di bisti paña yamativo, provocativo of mucho sunu. Y “sano huicio” ta yud’e evita di scoge paña cu ta slons of mucho grandi. Toch e principionan aki ta duna cada un di nos suficiente espacio pa scoge entre un variedad amplio di manera di bisti. Nos apariencia di bon gusto so caba ta “dorna e siñansa di nos Salbador” y ta “glorifica Dios.” (Tito 2:10; 1 Pedro 2:12) Pues, e forma nechi cu nos ta bisti pa bay reunion por influencia e manera cu otro hende ta mira e adoracion di Jehova.

No laga paña stroba bo di asisti na Salon di Reino. Nos pañanan no tin nodo di ta caro ni extravagante; pa nan ta apropia, nan mester ta limpi y representabel.

• Dicon e manera cu nos ta bisti pa bay reunion ta importante?

• Ki principionan mester guia nos den nos manera di bisti?

Si bo ta studia Bijbel cu un testigo di Jehova, probablemente bo ta haci esfuerso pa repasa e informacion prome cu e estudio. Mescos ta conta pa e reunionnan di congregacion. Pa bo por saca mayor beneficio for di nan, bo mester repasa e material di reunion di antemano. Si bo tin e custumber di haci esaki, bo ta haya bon resultado.

Stipula e ora y scoge e luga. Ki ora bo por concentra mihor? Mainta trempan prome cu bo cuminsa bo dia di trabou of anochi laat despues cu e muchanan bay drumi? Hasta si bo no tin hopi tempo pa studia, ta bon pa bo pone un ora fiho pa studia y no laga nada stroba bo. Busca un luga keto; paga radio, television y telefon celular ya cu esakinan por distrai bo. Ademas, ta bon pa haci oracion prome cu bo cuminsa studia. Esaki lo kita bo mente for di bo preocupacionnan y permiti bo concentra mihor riba e Palabra di Dios.—Filipensenan 4:6, 7.

Prepara e informacion pa bo por duna comentario. Pa cuminsa, trata di haya un cuadro general di e topico. Medita riba e tema di e articulo of capitulo. Despues, tuma nota con cada subtema ta conecta cu e tema, y si tin plachi y cuadro di repaso, analisa con esakinan ta enfatisa e puntonan principal. Despues, lesa cada paragraf y busca contesta pa pregunta riba e paragraf. Busca e textonan di Bijbel, lesa nan y analisa con cada un ta apoya e informacion. (Echonan 17:11) Ora bo haya contesta pa un pregunta, marca e palabra- of frasenan clave den e paragraf cu lo yuda bo corda e contesta. Anto na reunion, sinti bo liber pa hisa bo dede y duna comentario cortico den bo mes palabra.

Ora bo ta tuma tempo pa analisa e diferente topiconan cu ta ser trata tur siman na reunion, lo bo amplia bo “tesoro” di conocemento biblico.—Mateo 13:51, 52.

• Kico bo tin cu tene cuenta cu ne ora di prepara pa reunion?

• Con bo por prepara pa duna comentario na reunion?

Hopi tempo pasa, Jehova a duna instruccion pa cada famia pasa tempo hunto pa nan fortalece nan relacion cu ne y cera mas cu otro como famia. (Deuteronomio 6:6, 7) Pesey tur siman, famianan testigo di Jehova ta saca tempo pa adora Dios como famia. Den un ambiente relaha, nan ta trata topiconan spiritual adapta na e necesidadnan di e famia. Hasta si bo ta biba bo so, bo por haci bon uzo di e ocasion aki pa analisa temanan biblico cu por yuda bo hala mas cerca Dios, esta, tin un bon relacion cu ne.

Un ocasion pa hala mas cerca Jehova. Santiago 4:8 ta anima nos: “Hala cerca Dios, y lo e hala cerca boso.” Ora nos ta lesa Bijbel y siña tocante Jehova su personalidad y trato cu hende, nos ta siña conoc’e mihor. Un manera facil pa cuminsa boso adoracion como famia ta pa laga cada miembro di famia lesa algun versiculo di Bijbel na bos halto. Kisas boso por uza e programa semanal di e Reunion Nos Bida y Sirbishi Cristian. Despues di e lesamento, cada miembro di famia por comenta riba loke nan a siña for di e Scritura.

Un ocasion pa e famia hala mas cerca otro. Tanto esposo como esposa, mayornan y yiunan, ta cera mas cu otro ora nan ta studia Bijbel como famia. Pues, e ocasion aki mester ta un ocasion agradabel, un dia di siman cu tur hende ta anhela pa yega. Dependiendo di edad di e yiunan, mayornan por trata topiconan practico cu nan por haya den E Toren di Vigilancia y Spierta! of riba nos website jw.org. Kisas, boso por papia tocante un problema cu boso yiunan a haya nan cu ne na scol y con nan por trata cu esaki. Of boso lo por wak un programa di JW Broadcasting (tv.jw.org) y despues papia riba dje. Ta dushi tambe pa train e canticanan cu boso lo canta na e siguiente reunionnan, y despues di boso adoracion como famia, boso por come y bebe algo hunto.

E tempo precioso cu boso ta dedica tur siman na adora Jehova hunto lo yuda henter e famia haya delicia den e Palabra di Dios, y Jehova lo bendiciona boso esfuersonan ricamente.—Salmo 1:1-3.

• Dicon nos ta saca tempo pa Adoracion Como Famia?

• Con mayornan por haci e ocasion aki placentero pa henter e famia?

Dicon e hendenan aki ta asina contento? Nan ta na un di nos asambleanan. Jehova a instrui su sirbidornan den pasado pa bin hunto tres biaha pa aña, y mescos cu nan, nos tambe ta anhela pa reuni den gruponan mas grandi. (Deuteronomio 16:16) Tur aña, nos tin tres di e reunionnan aki: dos asamblea di circuito di un dia y e congreso regional di tres dia. Con e reunionnan aki ta beneficia nos?

Nan ta fortalece nos hermandad cristian. Mescos cu e Israelitanan a alegra ora nan tabata alaba Jehova “den e asamblea”, asina tambe nos ta disfruta ora nos bin hunto na nos ocasionnan special pa adora Jehova. (Salmo 26:12; 111:1) E reunionnan aki ta duna nos oportunidad pa asocia cu rumannan di diferente congregacion of hasta di otro pais. Durante pausa, nos ta come hunto na e luga di asamblea, y esaki ta haci e ocasionnan spiritual aki mas agradabel ainda, ya cu nos por cera amistadnan nobo. (Echonan 2:42) Na nos asambleanan, nos ta experencia personalmente e amor cu ta uni “henter e hermandad” mundial.—1 Pedro 2:17.

Nan ta yuda nos progresa den sentido spiritual. Algo tambe cu a beneficia e Israelitanan tabata cu nan a “compronde e palabranan” splica for di e Scritura. (Nehemias 8:8, 12) Nos tambe ta balora e instruccionnan biblico cu nos ta haya na nos asambleanan. Cada programa ta basa riba un tema biblico. Mediante discurso, simposio y presentacion interesante, nos ta siña con pa haci e boluntad di Dios. Nos ta sinti nos anima ora nos tende experencia di rumannan cu a enfrenta cu exito desafionan cu cristiannan sa haya nan cu ne den e tempo dificil aki. Na congresonan regional, dramanan den trahe y escenario antiguo ta haci relatonan biblico mas real pa nos y ta siña nos lesnan practico. Na tur asamblea tin oportunidad pa esnan cu kier simbolisa nan dedicacion na Dios batisa.

• Kico ta haci nos asambleanan ocasionnan gososo?

• Ki beneficio bo por saca for di un asamblea?

Djis prome cu Hesus su morto, el a bisa: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.” (Mateo 24:14) Pero, con nos por logra predica e bon noticia di Reino rond mundo? Siguiendo e ehempel cu Hesus a pone tempo cu e tabata riba Tera.—Lucas 8:1.

Nos ta bishita e hendenan na nan cas. Hesus a siña su discipelnan con pa predica e bon noticia di cas pa cas. (Mateo 10:11-13; Echonan 5:42; 20:20) Nan a haya teritorionan specifico caminda nan mester a predica. (Mateo 10:5, 6; 2 Corintionan 10:13) Awe ta mescos. Nos trabou di predica ta bon organisa y cada congregacion ta haya un area specifico pa cubri. Esaki ta permiti nos cumpli cu e mandato di Hesus pa “predica ... y duna testimonio cabal.”—Echonan 10:42.

Nos ta haci esfuerso pa bay tur caminda cu tin hende. Hesus a predica na luganan publico tambe, manera canto di lama y na un pos publico, poniendo asina un otro ehempel pa nos. (Marco 4:1; Juan 4:5-15) Pesey, nos tambe ta probecha di tur oportunidad cu nos haya pa papia cu hende tocante Bijbel, entre otro riba caya, den negoshi, den parke of hasta na telefon. Ademas, ora situacion ta permiti, nos ta predica na bisiña, colega di trabou, compañero di scol y famia. Debi na tur e esfuersonan aki, miyones di hende rond mundo ta tende “e bon nobo di salbacion.”—Salmo 96:2.

Cu ken lo bo kier comparti e bon noticia di e Reino di Dios? Bo a pensa kico esey lo nifica pa su futuro? E prome chens cu bo haya, probecha di dje!

• Ki “bon noticia” nos mester proclama?

• Con testigonan di Jehova ta imita Hesus su forma di predica?

Por lo general, un pionero ta un persona cu ta bay explora un teritorio nobo y habri caminda pa otronan. Den un sentido, Hesus tabata un pionero, pasobra Dios a mand’e na Tera pa cumpli cu un trabou cu ta duna bida y pa habri e caminda cu ta hiba na salbacion. (Mateo 20:28) Awe, Hesus su siguidornan ta sigui su ehempel y ta dedica mas tanto tempo posibel na e trabou di “haci ... discipel.” (Mateo 28:19, 20) Varios di nan a cuminsa cu loke nos ta yama sirbishi di pionero.

Un pionero ta uza gran parti di su tempo pa predica. Tur testigo di Jehova ta predica e bon noticia. Pero algun di nan a plania nan asuntonan di tal manera cu nan por sirbi como pionero regular y ta dedica 70 ora pa luna na e trabou di predica. Pa nan logra esaki, hopi di nan ta traha part-time. Otronan a haya e asignacion pa sirbi como pionero special den areanan caminda tin mas necesidad di proclamador di Reino, y tur luna nan ta dedica 130 ora of mas na nan sirbishi. Pioneronan ta satisfecho cu un bida simpel y tin e confianza cu Jehova lo percura pa nan necesidad material. (Mateo 6:31-33; 1 Timoteo 6:6-8) Esnan cu no por sirbi como pionero regular of special por traha como pionero auxiliar ora nan por, aumentando asina nan actividad di predica na 30 of 50 ora pa luna.

Amor pa Dios y pa hende ta motiva nan. Mescos cu Hesus, awe, nos tambe ta mira cu hopi hende ta den un condicion spiritual deplorabel. (Marco 6:34) Y nos tin e conocemento cu por yuda nan for di awor, loke por duna nan un fe solido pa futuro. Amor pa prohimo ta motiva un pionero pa duna generosamente di su tempo y energia pa yuda otro hende spiritualmente. (Mateo 22:39; 1 Tesalonicensenan 2:8) Como resultado, e pionero su fe ta bira mas fuerte, e ta hala mas cerca Dios y ta mas feliz.—Echonan 20:35.

• Kico ta un pionero?

• Kico ta motiva algun testigo di Jehova pa uza gran parti di nan tempo pa predica?

Testigonan di Jehova ta duna hopi importancia na enseñanza biblico. Pesey, nos tin scolnan special pa testigonan di Jehova cu ta dedica gran parti di nan tempo na e trabou di predica e Reino. E scolnan aki ta yuda nan “cumpli cu [nan] sirbishi cabalmente.”—2 Timoteo 4:5.

Scol di Sirbishi di Pionero. Esaki ta un curso di seis dia pa pionero regular cu ta tuma luga na un Salon di Reino. Un pionero por haya invitacion pa asisti na e scol aki despues cu e tin por lo menos un aña den sirbishi di tempo completo. Meta di e scol ta pa yuda pioneronan hala mas cerca di Jehova, bira mas eficaz den tur aspecto di sirbishi y anima nan pa sigui cu e trabou fielmente.

Scol pa Predicador di Reino. E curso aki ta dura dos luna y su meta ta pa train pioneronan experencia cu ta dispuesto pa laga nan cas pa bay sirbi caminda tin necesidad. Siguiendo e ehempel di e Predicador di mas importante cu a yega di biba aki riba Tera, Hesucristo, ta comosifuera nan ta bisa: “At’ami aki! Manda ami!” (Isaias 6:8; Juan 7:29) Kisas ora nan muda, nan tin cu adapta nan mes na un nivel di bida mas simpel. Podise e cultura, clima y cuminda ta totalmente diferente for di loke nan a custumbra cu ne. Kisas nan tin cu hasta siña un otro idioma. E curso aki ta yuda ruman homber y muher soltero y parehanan casa, entre 23 y 65 aña, cultiva e cualidadnan spiritual cu ta necesario pa nan asignacion y desaroya habilidadnan cu lo capacita nan pa sirbi Jehova y su organisacion mas plenamente.

Scol Biblico di Galaad di Watchtower. Na Hebreo, e palabra “Galaad” tin di haber cu “Testimonio.” For di tempo cu Galaad a ser funda na 1943, a manda mas cu 8.000 graduado di e scol aki como misionero kendenan tabatin hopi exito den duna testimonio “te na e parti mas leu di Tera.” (Echonan 13:47) Por ehempel, ora e prome graduadonan a yega Peru, no tabatin ningun congregacion den e pais. Pero awor tin mas cu 1.000 congregacion. Tempo nos misioneronan a yega Japon, tabatin menos cu dies Testigo den e pais. Awe tin mas cu 200.000 Testigo. E curso biblico di Galaad cu ta dura cinco luna ta inclui un estudio profundo di e Palabra di Dios. Pioneronan special, misioneronan cu ta traha den sirbishi di veld, e personanan cu ta traha na sucursal of cu ta den e trabou di circuito ta esnan cu ta ser invita pa asisti na e scol aki. Nan ta haya un entrenamento intensivo pa yuda stabilisa y sostene e obra mundial.

• Kico ta e proposito di e Scol di Sirbishi di Pionero?

• Ken por asisti na e Scol pa Predicador di Reino?