E Reino Ta Nace den Cielo

1, 2. Kico tabata e suceso di mas grandi cu a yega di tuma luga den historia di mundo, y dicon hende no a mira esey?

BO A yega di puntra bo mes con lo bo a sinti bo si bo tabata biba durante un tempo den historia den cua un cambio grandi a tuma luga? Hopi hende sa puntra nan mes esey. Pero pensa un rato: Si bo tabata biba den un tempo historico asina, bo ta kere cu abo lo a mira e sucesonan clave cu lo a trece e cambio? Kisas no. Hopi biaha, sucesonan cu a hiba na caida di regimennan bieu y cu a yena paginanan di historia a tuma luga fuera di bista di publico. Den un sentido, gran parti di historia a tuma luga tras di porta cera: den palacio, den sala priva di conseho of den oficina di gobierno. A pesar di esaki, e cambionan ey a afecta bida di miyones di hende.

² Kico di e suceso di mas grandi cu a yega di tuma luga den historia di mundo? E suceso ey a toca bida di miyones di hende. Sinembargo, el a tuma luga fuera di bista humano. Naturalmente, nos ta referi na nacemento di e Reino di Dios den cielo, esta, e dia cu e gobierno Mesianico a cuminsa reina. E gobierno aki, priminti for di basta tempo pasa, pronto lo trece un fin na henter e mundo malbado aki. (Lesa Daniel 2:34, 35, 44, 45.) Niun hende no a mira e nacemento historico ey tuma luga. Acaso nos tin cu conclui cu Jehova a sconde e suceso aki for di humanidad? Of, mas bien, el a prepara su pueblo leal pa esey for di antemano? Laga nos wak.

“Mi Mensahero ... Lo Prepara e Caminda Mi Dilanti”

3-5. (a) Ken tabata “e mensahero di e alianza” menciona na Malakias 3:1? (b) Kico lo a pasa prome cu “e mensahero di e alianza” bin na e tempel?

³ For di antiguedad, Jehova su proposito tabata pa prepara su pueblo pa nacemento di e Reino Mesianico. Por ehempel, considera e profecia di Malakias 3:1: “Mira, mi ta bay manda mi mensahero, y e lo prepara e caminda mi dilanti. Y e Señor, kende boso ta busca, diripiente lo bin na su tempel; y e mensahero di e alianza, den kende boso tin delicia, at’e ta bin.”

⁴ E profecia ey tin un cumplimento den nos tempo. Pues, ki dia Jehova, “e Señor”, a bin inspecciona su tempel? E profecia ta indica cu Jehova lo a bin hunto cu “e mensahero di e alianza.” Ken esey tabata? E Rey Mesianico, Hesucristo. (Luc. 1:68-73) Como e Gobernante recien corona, lo el a inspecciona y refina e pueblo di Dios riba Tera cu ta sirbi den e patio terenal di su tempel spiritual.—1 Ped. 4:17.

⁵ Pero ken tabata e otro “mensahero”, esun menciona prome na Malakias 3:1? E personahe profetico aki lo tabata riba escenario basta tempo prome cu presencia di e Rey Mesianico. Acaso tabatin un persona cu a “prepara e caminda” pa e Rey Mesianico den e decadanan prome cu 1914?

6. Segun profecia, ken a actua como e “mensahero” cu a bin prome pa prepara e pueblo di Dios pa e sucesonan cu tabata na caminda?

⁶ E buki cu bo ta lesando aki lo contesta e preguntanan ey contando e historia emocionante di e pueblo di Jehova di nos tempo. E historia aki ta mustra cu den e ultimo parti di siglo 19, un grupo chikito di hende sincero a cuminsa destaca—den e cunucu grandi di cristiannan falso—como e unico grupo di cristiannan berdadero. E grupo ey a bira conoci como Studiantenan di Bijbel. E rumannan cu tabata dirigi e grupo ey—Charles T. Russell cu su colaboradornan—en berdad a actua como e “mensahero” profetisa, ya cu nan a duna guia spiritual na e pueblo di Dios y a prepar’e pa e sucesonan cu tabata na caminda. Laga nos analisa cuater manera cu e “mensahero” a haci esey.

Nan A Adora Dios di Acuerdo cu e Berdad

7, 8. (a) Durante siglo 19, ken a cuminsa saca na cla cu e doctrina cu alma ta inmortal no ta cuadra cu berdad? (b) Menciona otro siñansanan falso cu C. T. Russell cu su colaboradornan a saca na cla.

⁷ Segun cu e “mensahero” di tempo moderno tabata studia e Palabra di Dios, nan a pidi Dios su guia; nan a compila e berdadnan biblico cu tabata bon cla, y cu nan tur tabata di acuerdo cu ne, y a publica nan. Pa siglonan largo, mundo di cristiandad tabata completamente den scuridad spiritual; hopi di su siñansanan tabata hancra den paganismo. Un bon ehempel di esaki ta e doctrina cu alma ta inmortal. Rond di aña 1850, un par di studiante sincero di Bijbel a analisa e siñansa ey, y nan a mira cu esaki no tabatin apoyo di Bijbel. Cu curashi, Henry Grew, George Stetson y George Storrs a skirbi articulonan tocante esey y tambe a tene charlanan cu a saca e mentira satanico ey na cla.a Nan obra, na su turno, a yuda C. T. Russell cu su colaboradornan haya un mihor comprondemento di e Scritura.

⁸ E grupo chikito ey di Studiante di Bijbel a descubri cu otro doctrinanan conecta cu e siñansa cu alma ta inmortal tambe tabata confuso y no a cuadra cu berdad, entre nan, e siñansa cu tur bon hende ta bay cielo y cu Dios ta tormenta alma di hende malbado den candela eterno di fierno. Cu curashi, Russell cu su colaboradornan a saca e mentiranan ey na cla den un cantidad di articulo, buki, pamfleta, tratado y sermon cu nan a publica den corant.

9. Con e revista Zion’s Watch Tower a mustra cu e doctrina di Trinidad ta falso?

⁹ E Studiantenan di Bijbel a mustra bon cla tambe cu e siñansa di Trinidad, un doctrina masha respeta tur caminda, no a cuadra cu berdad. Na 1887, e revista Zion’s Watch Tower a comenta: “E Scritura ta mustra bon cla cu Jehova y nos Señor Hesus no ta e mesun persona y cu cada un ta diferente for di otro; un ta e Tata y e otro ta e Yiu.”b Anto e articulo a sigui bisa cu tabata hopi remarcabel mes cu e idea di tres Dios den un y alabes un Dios den tres a logra bira asina popular y haya aceptacion general. Pero e solo echo cu esey a sosode ta un prueba mas cu e iglesianan tabata morto na soño y Satanas a haya chens di plama e siñansa falso aki.

10. Kico E Toren di Vigilancia a splica tocante aña 1914?

¹⁰ Manera e titulo completo di e revista Toren di Vigilancia di Sion y Anunciado di e Presencia di Cristo ta indica, e revista aki tabata sumamente interesa den e profecianan relaciona cu e presencia di Cristo. E fiel unginan cu tabata skirbi pa e revista a ripara cu e profecia di Daniel tocante e “shete periodo di tempo” tabatin di haber cu e tempo cu Dios su proposito lo a cumpli en conexion cu e Reino Mesianico. For di decada di 1870, nan a indica cu 1914 lo ta e aña cu e shete periodo di tempo aki lo a termina. (Dan. 4:25; Luc. 21:24) Aunke nos rumannan di e epoca ey no a compronde completamente kico lo sosode na aña 1914, nan a proclama den tur skina loke nan tabata sa tocante berdadnan biblico y te awe nos ta sinti efecto di nan proclamacion.

11, 12. (a) Na ken Ruman Russell a duna credito pa loke e tabata siña hende? (b) Con importante e trabou cu Russell y su colaboradornan a haci den e decadanan prome cu 1914 tabata?

¹¹ Ni Russell ni su fiel colaboradornan no a tuma credito pa e berdadnan spiritual importante cu nan a saca na cla y compronde. Russell a duna hopi credito na otro hende cu tabat’ey prome cu ne. Pero el a duna credito principalmente na Jehova Dios, Esun responsabel pa siña Su pueblo loke nan mester haya sa y na e tempo cu nan mester haya sa esey. Ta bisto cu Jehova a bendiciona e esfuerso cu Russell y su colaboradornan a haci pa separa berdad for di mentira. Segun cu añanan a pasa, e diferencia entre nan y cristiandad a bira mas y mas bisto.

¹² E trabou cu e hombernan fiel ey a haci pa sali na defensa di berdadnan biblico den e decadanan prome cu 1914 tabata simplemente asombroso. Mirando atras, e edicion di 1 di november 1917 di E Toren di Vigilancia a comenta esaki: “Awe, miyones di hende a ser libra di e gara di miedo cu nan tabatin debi na e siñansa di fierno di candela y otro doctrina falso ... E ola di Berdad, cu a cuminsa mas cu 40 aña pasa, ta creciendo keto bay y lo sigui crece te ora cu e tapa henter e Tera; oponentenan ta purba di stroba e Berdad di plama rond mundo, loke nan ta haci ta comosifuera nan ta purba di uza un basora pa wanta e olanan grandi di un ocean.”

13, 14. (a) Con e “mensahero” a yuda prepara caminda pa e Rey Mesianico? (b) Kico nos por siña for di nos rumannan cu a biba mas cu un siglo pasa?

¹³ Pensa un rato: Acaso e pueblo di Dios lo tabata prepara pa e cuminsamento di e presencia di Cristo si nan no por a distingui Hesus for di su Tata, Jehova? Claro cu no! Tampoco nan lo no tabata prepara si nan a kere cu inmortalidad ta algo cu tur hende tin; nan a compronde cu esaki ta un regalo precioso cu Dios ta duna solamente un cantidad relativamente chikito di siguidor di Cristo. Ni nan lo no tabata prepara tampoco si nan a kere cu Dios ta tormenta hende den fierno di candela pa tur eternidad. Pues, no tin duda cu e “mensahero” a prepara caminda pa e Rey Mesianico.

¹⁴ Kico di nos awe? Kico nos por siña for di nos rumannan cu a biba mas cu un siglo pasa? Wel, nos tambe mester ta bon lesador y studiante di e Palabra di Dios. (Juan 17:3) Laga nos apetit pa cuminda spiritual sigui crece, segun cu e mundo materialista aki ta bira flaco den sentido spiritual.—Lesa 1 Timoteo 4:15.

“Sali for di Dje, Mi Pueblo”

15. Kico e Studiantenan di Bijbel a bin compronde gradualmente? (Wak e nota tambe.)

¹⁵ E Studiantenan di Bijbel tabata siña hende cu nan mester kibra tur laso cu iglesia mundano. Na 1879, E Toren di Vigilancia a menciona e “iglesianan di Babilonia.” Na kico e revista tabata referi? Na e posicion di papa? Na Iglesia Catolico Romano? Wel, pa hopi siglo gruponan protestant tabata bisa cu ta asina. Pero e Studiantenan di Bijbel a compronde gradualmente cu e “Babilonia” di tempo actual ta inclui tur iglesia di cristiandad. Dicon? Pasobra nan tur ta siña doctrinanan falso manera esnan cu nos a trata mas prome.c Cu tempo, nos publicacionnan a cuminsa bisa mas y mas directo ki paso miembronan sincero di e iglesianan di Babilonia mester tuma.

16, 17. (a) Con Volumen 3 di Millennial Dawn y E Toren di Vigilancia a urgi hende pa sali for di religion falso? (b) Ki factor a pone e spiertamentonan di e tempo ey perde un poco forsa? (Wak nota.)

¹⁶ Por ehempel, na 1891, Volumen 3 di Millennial Dawn (Aurora di Milenio) a analisa con Dios a rechasa Babilonia di nos tempo y a comenta: “Henter e sistema—un sistema di sistemanan—a ser rechasa”, si, tur iglesia di cristiandad! E revista a sigui bisa cu “awor nos ta haci un yamada na tur hende cu no ta simpatisa cu e doctrina- y practicanan falso di Babilonia pa separa nan mes for di dje.”

¹⁷ Pero ainda tabatin hende cu no a kita nan nomber como miembro di e iglesianan di cristiandad y cu a hustifica esey, bisando: “Mi ta simpatisa completamente cu e berdad, y masha poco biaha mi ta asisti na otro reunion [religioso].” Pesey, E Toren di Vigilancia di januari 1900 a duna un conseho na e hendenan ey. E articulo a puntra: “Acaso esaki ta corecto? Un hende por ta un pia den Babilonia y un pia pafo? Ta esaki ta e obediencia cu Dios ta rekeri y cu ta agradabel y aceptabel p’e? Claro cu no! Ora cu e miembro di e iglesia a join e denominacion ey, e miembro a drenta publicamente den un combenio cu ne, y e mester cumpli fielmente cu tur e condicionnan di e combenio ey te ora cu e renuncia of cancela su miembresia oficialmente.” A traves di añanan, e mensahe ey a bira mas y mas fuerte.d Un sirbidor di Jehova mester kibra tur laso cu religion falso.

18. Dicon hende mester a sali for di Babilonia e Grandi?

¹⁸ Pensa un rato: E Studiantenan di Bijbel a proclama cu regularidad e spiertamento pa sali for di Babilonia e Grandi. Si nan no a haci esey, bo ta kere cu Cristo lo tabatin un grupo di sirbidor prepara y ungi riba Tera ora lo el a ser corona como Rey? Claro cu no, pasobra ta solamente cristiannan cu no ta den gara di Babilonia por adora Jehova “cu spirito y cu berdad.” (Juan 4:24) Kico di nos awe? Anos tambe ta determina pa keda leu for di religion falso? Si ta asina, laga nos sigui obedece e mandamento pa “sali for di dje, mi pueblo”!—Lesa Revelacion 18:4.

Nan A Reuni Hunto pa Adora Dios

19, 20. Con E Toren di Vigilancia a anima e pueblo di Dios pa reuni hunto pa adora Dios?

¹⁹ E Studiantenan di Bijbel tabata siña hende cu, caminda ta posibel, rumannan den fe mester reuni hunto pa adora Dios. Cristiannan berdadero no solamente mester sali for di religion falso. Ta hopi importante tambe pa nan participa den adoracion berdadero. E Toren di Vigilancia, den su prome edicionnan, a anima su lectornan pa reuni hunto pa adora Dios. Por ehempel, den e edicion di juli 1880, Ruman Russell a conta di un gira cu el a haci como discursante. El a comenta ki un gran animacion tur e reunionnan ey tabata, y el a urgi e lectornan pa manda carchi cu un informe di nan progreso y a priminti cu lo e publica algun di nan. Cu ki meta? “Pa laga nos tur sa ... con Señor ta bendiciona boso, y pa nos sa si boso ta sigui reuni hunto cu esnan cu ta comparti boso fe precioso.”

²⁰ Na 1882, E Toren di Vigilancia tabatin un articulo titula “Cristiannan Ta Reuni Hunto.” E articulo a anima cristiannan pa tene reunion pa asina nan “por edifica, anima y fortalece otro.” E articulo a sigui bisa: “No ta importa si tin hende studia of talentoso entre boso. Laga cada ken bin cu su mes Bijbel, papel y potlood, y haci mas tanto uzo posibel di tur yudansa cu tin, manera por ehempel, un index alfabetico ... Scoge boso topico; pidi guia di spirito santo pa comprond’e; despues lesa, pensa, compara texto biblico cu texto biblico, y sigur spirito santo lo guia boso na e berdad.”

21. E congregacion di Allegheny, na Pennsylvania, a pone ki bon ehempel relaciona cu e trabou di pastoreo y asistencia na reunion?

²¹ E oficina principal di e Studiantenan di Bijbel tabata na Merca, na e stad Allegheny, Pennsylvania. Eynan e Studiantenan tabata reuni hunto. Nan a pone un bon ehempel den esey, siguiendo e conseho inspira cu ta para na Hebreonan 10:24 y 25. (Les’e.) Hopi tempo despues, Charles Capen, un ruman di edad avansa, a conta con e tabata asisti na e reunionnan ey tempo e tabata mucha. El a skirbi: “Ainda mi ta corda un di e textonan di Bijbel skirbi riba muraya di e salon di asamblea di e Sociedad cu a bisa: ‘Un ta boso Maestro, si Cristo; y boso tur ta ruman.’ Semper e texto ey a keda graba den mi mente, pasobra el a mustra cu no tin un distincion entre clero y laico den e pueblo di Jehova.” (Mat. 23:8) Ruman Capen ta corda tambe e reunionnan stimulante, e animacion caluroso y e esfuerso diligente di Ruman Russell pa pastorea tur miembro di e congregacion personalmente.

22. Con hende fiel a reacciona na e animacion pa asisti na reunionnan cristian, y ki les nos por siña for di nan?

²² Personanan fiel a reacciona bon na e ehempel aki y na e instruccion cu nan tabata ricibi. Congregacionnan a keda forma den otro estadonan, manera Ohio y Michigan, y despues den henter Norte America y otro paisnan. Pensa un rato: Hende fiel lo tabata realmente prepara pa e presencia di Cristo si nan no a siña obedece e conseho inspira di reuni hunto pa adora Dios? Claro cu no! Kico di nos awe? Mescos cu e rumannan ey, nos mester ta determina pa asisti regularmente na nos reunionnan cristian, buscando asina tur oportunidad pa adora Dios hunto cu nos rumannan y pa nos ta un animacion spiritual pa otro.

Nan A Predica cu Entusiasmo

23. Con E Toren di Vigilancia a mustra bon cla cu tur ruman ungi mester predica e berdad?

²³ E Studiantenan di Bijbel tabata siña hende cu tur ruman ungi mester predica e berdad. Na 1885, E Toren di Vigilancia a comenta: “Nos no mester lubida cu a ungi tur miembro di e grupo ungi pa predica (Isa. 61:1), pa cumpli cu e ministerio.” Un edicion di e revista di 1888 tabatin e animacion aki: “Nos encargo ta bon cla ... Un cos ta sigur, si nos ignor’e y busca un excuus pa no cumpli cu ne, nos ta demostra cu nos ta sirbidornan floho cu no merece e yamada cu nos a haya pa e posicion eleva aki [como ungi].”

24, 25. (a) Con Russell cu su colaboradornan a haci mas cu simplemente anima hende pa predica? (b) Con un colporteur a describi su trabou den e tempo cu tabatin masha poco auto?

²⁴ Ruman Russell cu su colaboradornan a haci mas cu simplemente anima e hendenan pa predica. Tambe nan a cuminsa publica un serie di tratado titula Bible Students’ Tracts. Despues e nomber a bira Old Theology Quarterly (Teologia Antiguo—Publicacion Trimestral). Lectornan di E Toren di Vigilancia a ricibi e tratadonan aki pa parti gratis pa publico.

²⁵ E rumannan cu tabata dedica nan mes full-time na sirbishi di veld tabata ser yama colporteur—awe nos ta yama nan pionero. Un di nan tabata Charles Capen, menciona anteriormente. Despues el a conta: “Mi tabata uza mapa di Departamento di Investigacion Geologico di Merca pa yuda mi cubri e teritorio na Pennsylvania. Riba e mapanan aki tabatin tur e cayanan, y esey a haci posibel cu mi por a bay tur seccion di cada region na pia. Tin biaha, despues di pasa tres dia den areanan di cunucu tumando pedido pa e serie di buki Studies in the Scriptures, mi tabata huur un tipo di kitrin (un garoshi cu cabay ta lastra) pa entrega e bukinan. Hopi biaha, mi tabata pasa anochi cerca e cunukeronan. E tempo ey tabatin masha poco auto.”

26. (a) Dicon e pueblo di Dios mester a participa den e trabou di predica pa nan por tabata prepara pa e reinado di Cristo? (b) Kico ta bon pa nos puntra nos mes?

²⁶ E rumannan di e tempo ey tabatin mester di hopi curashi y entusiasmo pa bay predica. Acaso cristiannan berdadero lo tabata prepara pa e reinado di Cristo si nan no a siña e importancia di e trabou di predica? No, toch? En realidad, e trabou ey lo mester a bira un di e cosnan importante cu lo mester a tuma luga durante e presencia di Cristo. (Mat. 24:14) Lo mester a prepara e pueblo di Dios pa nan haci e trabou ey e parti principal di nan bida, ya cu esaki ta un obra cu lo salba bida di hopi hende. Ta bon pa nos puntra nos mes: E trabou di predica ta principal den mi bida? Mi ta haci sacrificio pa mi por participa plenamente den e actividad ey?

E Reino di Dios A Nace

27, 28. Kico apostel Juan a mira den vision, y con Satanas cu su demoñonan a reacciona riba nacemento di e Reino?

²⁷ Porfin e aña historico a yega: 1914. Manera nos a mira na principio di e capitulo aki, niun hende no tabata testigo di e sucesonan glorioso cu a tuma luga den cielo. Pero Jehova a duna apostel Juan un vision cu a describi esey cu palabranan simbolico. Purba di imagina esaki: Juan a “mira un señal grandi den cielo.” E “muher” di Dios, esta, su organisacion di criaturanan spiritual den cielo, tabata na estado y a duna luz na un yiu homber. Bijbel ta bisa nos cu pronto e yiu simbolico aki lo “goberna tur nacion cu un bara di hero.” Pero asina cu e yiu a nace, el a “ser hiba lihe cerca Dios y su trono.” Un stem duro den cielo a bisa: “Nos Dios a trece salbacion pa hende, su poder a keda revela, su Reino a keda estableci y su Cristo a cuminsa uza su autoridad.”—Rev. 12:1, 5, 10.

²⁸ No tin duda cu loke Juan a mira den e vision ey tabata nacemento di e Reino Mesianico. Esey sigur tabata un suceso glorioso, pero no ta tur persona a keda contento cu esaki. Satanas cu su demoñonan a bringa contra e angelnan fiel, kendenan tabata bou di e liderato di Miguel, esta, Cristo. Kico tabata e resultado? Nos ta lesa: “E dragon grandi, e colebra original, esun cu yama Diabel y Satanas, cu ta gaña henter e Tera habita a ser benta abou; el a ser benta abou riba Tera y su angelnan a ser benta abou hunto cu ne.”—Rev. 12:7, 9.

29, 30. Despues cu e Reino Mesianico a nace, ki cambio a tuma luga (a) riba Tera y (b) den cielo?

²⁹ Hopi prome cu 1914, e Studiantenan di Bijbel a bisa cu un tempo di problema lo a cuminsa na e aña ey. Pero nan mes no por a imagina con exacto e pronostico ey lo a resulta di ta. Manera e vision di Juan a revela, awor Satanas lo tabatin un influencia hopi mas grandi riba humanidad: “Ay di Tera y di lama, ya cu Diabel a baha bin cerca boso yen di rabia, pasobra e sa cu a ked’e masha poco tempo.” (Rev. 12:12) Na 1914, Prome Guera Mundial a cuminsa y e señal cu a indica Cristo su presencia como Rey corona a cuminsa cumpli mundialmente. E “ultimo dianan” di e mundo malbado aki a inicia.—2 Tim. 3:1.

³⁰ Pero den cielo tabatin alegria. Hesus a saca Satanas cu su demoñonan for di eynan pa semper. E relato di Juan ta bisa: “Pesey alegra, cielo, y boso cu ta biba den dje!” (Rev. 12:12) Awor cu cielo tabata limpi y Hesus a keda corona como Rey, e Reino Mesianico tabata cla pa traha na bienestar di e pueblo di Dios riba Tera. Kico tabata e prome cos cu e Reino lo a haci? Manera nos a mira na principio di e capitulo aki, Cristo, como e “mensahero di e alianza”, lo a cuminsa refina e sirbidornan di Dios riba Tera. Kico esey a nifica?

Un Tempo di Prueba

31. Kico Malakias a profetisa tocante e periodo di refinamento, y con esey a cuminsa cumpli? (Wak e nota tambe.)

³¹ Malakias a profetisa cu e proceso di refinamento lo no tabata facil. El a skirbi: “Ken por soporta e dia di su binida? Y ken por para ora cu e aparece? Pasobra e ta manera candela di un refinado y manera habon di un labado di paña.” (Mal. 3:2) E palabranan ey a resulta di ta berdad. Cuminsando na 1914, e pueblo di Dios riba Tera a confronta un serie di prueba y dificultad. Ora Prome Guera Mundial tabata den full swing, hopi Studiante di Bijbel a ser encarcela y persigui cruelmente.e

32. Den ki problema e pueblo di Dios a pasa aden despues di 1916?

³² Den e organisacion mes tambe tabatin problema. Na 1916, Ruman Russell a muri cu apenas 64 aña di edad, como consecuencia hopi ruman a keda den shock. Su morto a saca na cla cu algun ruman tabata concentra mucho riba un solo hende. E echo cu Ruman Russell tabata un homber asina ehemplar a pone cu nan tabata casi ador’e, a pesar cu e mes no tabata kier esey. Hopi hende a kere cu e morto di Russell a nifica cu e revelacion progresivo di e berdad a yega na un fin. Pesey algun di nan a bringa contra e esfuersonan pa sigui padilanti. E actitud ey a causa un apostasia cu a dividi e organisacion.

33. Con e expectativanan cu no a cumpli a pone e fe di e pueblo di Dios na prueba?

³³ Un otro prueba dificil tabata e expectativanan cu no a cumpli. E Toren di Vigilancia a indica corectamente cu 1914 tabata e aña cu e Tempo di e Paganonan lo a termina, pero ainda e rumannan no a compronde kico precies lo a tuma luga e aña ey. (Luc. 21:24) Nan a pensa cu na 1914 Cristo lo a hiba su bruid—cu a consisti di rumannan ungi—cielo pa goberna hunto cu ne eynan. E speransa ey no a bira realidad. Na final di 1917, E Toren di Vigilancia a anuncia cu un periodo di cosecha di 40 aña lo a termina na cuminsamento di aña 1918. Pero e trabou di predica no a termina. Despues cu e fecha ey a pasa, e predicacion a sigui prospera. E revista a indica e ora ey cu posiblemente e cosecha general a termina, pero cu awor tabatin un periodo pa piki of recoge loke a keda atras. Toch hopi hende a stop di sirbi Jehova pasobra nan a keda decepciona.

34. Ki prueba grandi a surgi na 1918, y dicon cristiandad a kere cu e pueblo di Dios tabata “morto”?

³⁴ J. F. Rutherford a tuma e trabou di C. T. Russell over y a cuminsa dirigi e pueblo di Dios. Pero na 1918 a surgi un prueba hopi grandi. Polis a aresta Ruman Rutherford hunto cu shete ruman homber responsabel. Corte a condena nan inhustamente na castigonan largo di prizon y a encarcela nan na Atlanta, Georgia. Pa un tempo a parce cu e trabou di e pueblo di Dios a paralisa. Hopi pastoor di cristiandad a alegra. Segun nan, e Studiantenan di Bijbel tabata “morto.” Nan lo no a forma un menasa mas, ya cu nan “lidernan” tabata den prizon, e oficina principal na Brooklyn a cera y e trabou di predica tabata bou di atake na Merca y Europa. (Rev. 11:3, 7-10) Pero e pastoornan tabata completamente ekiboca.

E Pueblo di Dios A Rebiba!

35. Dicon Hesus a permiti dificultad asota su siguidornan, y kico el a haci pa yuda nan?

³⁵ Enemigonan di e berdad no tabata sa cu e unico motibo pakico Hesus a permiti e dificultadnan aki asota su pueblo ta pasobra e tempo ey Jehova tabata sinta como “un refinado y purificado di plata.” (Mal. 3:3) Jehova cu su Yiu tabata sigur cu e rumannan fiel lo a sali for di e pruebanan intenso ey bon refina, purifica y mihor prepara cu nunca pa traha den sirbishi di e Rey. Na principio di 1919 a bira bisto cu e spirito di Dios a haci net loke e enemigonan di su pueblo a kere tabata imposibel: El a rebiba e cristiannan fiel! (Rev. 11:11) Cristo a cumpli na e tempo ey cu un parti clave di e señal di e ultimo dianan: El a nombra “e esclavo fiel y prudente”, esta, un grupo chikito di homber ungi cu lo a dirigi su pueblo door di percura pa nan haya cuminda spiritual na e debido tempo.—Mat. 24:45-47.

36. Kico a duna prueba cu e pueblo di Dios a cuminsa rebiba spiritualmente?

³⁶ Dia 26 di maart 1919, oficialnan a laga Ruman Rutherford cu su colaboradornan sali for di prizon. Un poco despues, nan a programa un congreso pa september di e aña ey. Nan a cuminsa traha plan pa publica un otro revista, cu lo a haya e nomber The Golden Age (E Epoca di Oro). E intencion tabata pa uz’e den sirbishi di veld hunto cu E Toren di Vigilancia.f E mesun aña ey nan a publica e prome edicion di Bulletin (Boletin), cu awor ta Nos Bida y Sirbishi Cristian​—⁠Tarea pa Reunion. For di principio, e publicacion ey a stimula participacion den e predicacion. Sin duda, di 1919 padilanti e sirbishi di cas pa cas a haya mas prioridad.

37. Den e añanan despues di 1919, con algun cristian a resulta di ta infiel?

³⁷ E trabou di predica a sigui refina e sirbidornan di Cristo, pasobra esnan cu tabata orguyoso y arogante no tabata dispuesto pa haci un trabou humilde asina. Esnan cu no kier a participa den e trabou di predica a separa nan mes for di e rumannan fiel. Den e añanan despues di 1919, algun cristian infiel a bira amarga y a cuminsa calumnia y difama fiel sirbidornan di Jehova y hasta a join nan persiguidonan.

38. Cada biaha cu e siguidornan di Cristo riba Tera tabatin exito y nan a gana batayanan ta duna nos prueba di kico?

³⁸ Pero, a pesar di e atakenan ey, e siguidornan di Cristo riba Tera a sigui prospera spiritualmente. Cada biaha cu nan tabatin exito y cada bataya cu nan a gana di e tempo ey en adelante ta convence nos cu e Reino di Dios ta goberna. Con un grupo di hende imperfecto por a logra gana bataya contra Satanas y e mundo malbado aki? Esey tabata posibel solamente cu e sosten y bendicion di Dios, cu e ta percura mediante su Yiu y e Reino Mesianico.—Lesa Isaias 54:17.

39, 40. (a) Kico ta algun caracteristica di e buki aki? (b) Ki beneficio bo por saca ora bo studia e buki aki?

³⁹ Den e capitulonan cu lo sigui den e buki aki, nos lo analisa loke e Reino di Dios a logra riba Tera durante e 100 añanan cu a pasa desde cu el a nace den cielo. Cada seccion di e buki aki ta trata un otro aspecto di e trabou di Reino aki riba Tera. Cada capitulo tin un cuadro di repaso pa yuda cada un di nos determina con real e Reino ta pa nos. Den e capitulonan di conclusion, nos lo considera kico nos por verwacht den futuro cercano ora cu e Reino bin pa destrui e malbadonan y introduci e paradijs riba Tera. Ki beneficio lo bo saca ora bo studia e buki aki?

⁴⁰ Satanas kier debilita bo fe den e Reino di Dios. Pero Jehova kier fortalece bo fe pa asina bo fe por proteha bo y tene bo fuerte. (Efe. 6:16) Pues, nos kier anima bo pa studia e buki aki diligentemente. Keda puntra bo mes: Mi ta mira e Reino di Dios como algo real? Mas fuerte bo fe ta den e Reino, mas grandi e chens ta cu lo bo t’ey dia cu tur hende lo mira cu e ta real y cu e ta goberna. Si, lo bo ta entre nan, apoyando e Reino di Dios aki fielmente y activamente.