LES 26
Dicon Cos Malo Ta Sosode y Dicon Hende Ta Sufri?
Ora algo malo sosode, ta normal pa hende puntra: Dicon e cos aki a pasa? Esta contento nos ta cu Bijbel ta contesta e pregunta ey!
1. Con maldad a cuminsa riba Tera?
Satanas, esta, Diabel, a rebeldia contra Dios. Satanas kier a goberna riba hende, pesey el a influencia e prome pareha, Adam cu Eva, pa nan tambe rebeldia contra Dios. Con Satanas a haci esaki? El a gaña Eva. (Genesis 3:1-5) El a pone Eva pensa cu Jehova tabata sconde algo bon for di nan. Cu otro palabra, el a pone hende kere cu nan lo ta mas feliz si nan no obedece Dios. Ora cu Satanas a gaña Eva cu e lo no muri, el a bisa e prome mentira. Pesey, Bijbel ta yama Satanas “un gañado y e tata di mentira.”—Juan 8:44.
2. Ki decision Adam cu Eva a tuma?
Jehova tabata masha generoso cu Adam cu Eva. El a bisa nan cu nan por come di tur e palonan den Hofi di Eden cu excepcion di un palo. (Genesis 2:15-17) Toch, nan a dicidi di come fruta di e palo ey. Eva “a coge fruta y come.” Despues, Adam “tambe a come.” (Genesis 3:6) Nan tur dos a desobedece Dios. Como cu Adam cu Eva tabata perfecto, tabata facil pa nan haci loke ta corecto. Pero, ora nan a scoge pa desobedece Dios, nan a peca y a rechasa Dios como nan Gobernante. E decision ey a pone nan sufri masha hopi mes!—Genesis 3:16-19.
3. Con e decision di Adam cu Eva a afecta nos?
Ora Adam cu Eva a peca, nan a bira imperfecto y a pasa imperfeccion pa tur nan descendientenan. Bijbel ta bisa lo siguiente tocante Adam: “Pa medio di un hende pica a drenta mundo, y morto pa medio di pica, y asina morto a pasa pa tur hende.”—Romanonan 5:12.
Pero dicon nos ta sufri? Tin biaha, nos ta sufri pasobra nos ta tuma mal decision. Nos por sufri tambe ora otro hende tuma mal decision. Anto tin ora nos por sufri pasobra algo inespera ta sosode cu nos.—Lesa Eclesiastes 9:11.
KICO MAS NOS POR SIÑA?
Wak dicon Dios no ta responsabel pa e maldad y sufrimento cu tin den mundo y wak con e ta sinti ora nos ta sufri.
4. Ken ta responsabel pa nos sufrimento?
Hopi hende ta pensa cu ta Dios ta goberna mundo. Pero, esey ta berdad? Pasa e VIDEO.
Lesa Santiago 1:13 y 1 Juan 5:19. Despues, analisa e siguiente pregunta:
Ta Dios ta culpabel cu tin sufrimento y maldad?
5. Kico a pasa desde cu Satanas a cuminsa goberna?
Lesa Genesis 3:1-6. Despues, analisa e siguiente preguntanan:
Kico Satanas a gaña Eva?—Wak versiculo 4, 5.
Con Satanas a duna e impresion cu Jehova a sconde algo bon for di hende?
Con Satanas a duna e impresion cu hende no tin mester di Jehova como nan Gobernante pa nan ta feliz?
Lesa Eclesiastes 8:9. Despues, analisa e siguiente pregunta:
Kico a sosode desde cu Jehova no ta goberna mundo?
Adam cu Eva tabata perfecto, y nan tabata biba den Paradijs. Pero nan a scucha Satanas y a rebeldia contra Jehova
Pica, sufrimento y morto a plama rond mundo door di e rebelion
Jehova lo caba cu pica, sufrimento y morto. E ora ey, hende lo ta perfecto atrobe, y nan lo biba den Paradijs
6. Jehova ta sinti pa nos ora nos ta sufri
Dios ta worry ora nos ta sufri? Wak kico Rey David y Apostel Pedro a skirbi. Lesa Salmo 31:7 y 1 Pedro 5:7. Despues, analisa e siguiente pregunta:
Con bo ta sinti awor cu bo sa cu Dios ta mira ora nos ta sufri y cu e ta sinti pa nos?
7. Dios lo caba cu tur sufrimento
Lesa Isaias 65:17 y Revelacion 21:3, 4. Despues, analisa e siguiente pregunta:
Dicon ta un consuelo pa sa cu Dios lo elimina tur cos malo cu hende ta experencia?
Bo tabata sa?
Ora Satanas a gaña pa prome biaha, el a daña nomber di Jehova. Cu otro palabra, el a daña Jehova su reputacion y a pone hende kere cu Dios ta un mal Gobernante y cu e no ta husto. Ora cu Jehova caba cu tur sufrimento den futuro, lo e vindica su nomber, esta, elimina cualkier idea robes cu hende por tin tocante dje. Pues, lo e demostra cu su manera di goberna ta mihor. Limpia Jehova su nomber ta e cos di mas importante den universo.—Mateo 6:9, 10.
LOKE HENDE SA BISA: “Dios ta pone nos sufri pa pone nos na prueba.”
Kico lo bo bisa?
RESUMEN
Esnan cu ta principalmente culpabel pa e maldad cu tin riba Tera, ta Satanas, esta, Diabel, y e prome pareha. Jehova ta sinti pa nos ora nos ta sufri y pronto lo e caba cu tur sufrimento.
Repaso
Kico Satanas, esta, Diabel, a gaña Eva?
Con Adam cu Eva su decision pa rebeldia contra Dios a afecta nos tur?
Con nos sa cu Jehova ta sinti pa nos ora nos ta sufri?
MAS INFORMACION INTERESANTE
Wak kico Bijbel ta bisa cu pica ta.
Lesa mas tocante e cuestion cu Satanas, esta, Diabel, a lanta den Hofi di Eden.
“Dicon Dios Ta Permiti Sufrimento?” (E Toren di Vigilancia di 1 di januari 2014)
Wak con contesta pa un pregunta dificil por consola nos.
“Dicon e Holocaust A Tuma Luga? Dicon Dios No A Par’e?” (articulo riba jw.org)
Wak kico un homber a siña tocante e sufrimento cu e tabata mira rond di dje.