• Kico e Reino di Dios Ta?
    Bo Por Disfruta di Bida pa Semper!—Curso di Bijbel Interactivo
    • Les 31. Den cielo, Hesucristo como Rey ta para den presencia di e gloria di Jehova.

      LES 31

      Kico e Reino di Dios Ta?

      E Reino di Dios ta e tema principal di Bijbel. Jehova lo uza e Reino ey pa cumpli cu e proposito cu e tabatin for di principio pa Tera, esta, pa haci Tera un paradijs. Kico e Reino di Dios ta? Con nos por sa cu e ta gobernando caba? Kico e Reino ey a logra y kico lo e haci den futuro? Den e les aki y e siguiente dosnan, nos lo haya contesta pa e preguntanan ey.

      1. Kico e Reino di Dios ta, y ken ta Rey di e Reino ey?

      E Reino di Dios ta un gobierno cu Jehova Dios mes a forma. Hesucristo ta Rey di e Reino ey y e ta goberna for di cielo. (Mateo 4:17; Juan 18:36) Bijbel ta bisa tocante Hesus: “Lo e reina como Rey pa semper.” (Lucas 1:32, 33) Como Rey di e Reino di Dios, Hesus lo goberna tur hende riba Tera.

      2. Ken lo goberna hunto cu Hesus?

      Hesus lo no goberna su so. Hende for di “tur tribu, idioma, pueblo y nacion ... lo goberna e Tera” como rey hunto cu Hesus. (Revelacion 5:9, 10) For di tempo cu Hesus a bin na Tera, miyones di hende a bira su siguidor. Ta nan tur lo goberna hunto cu ne? No. Di tur e siguidornan di Hesus, ta solamente 144.000 persona lo bay cielo pa goberna hunto cu ne. (Lesa Revelacion 14:1-4.) Tur e otro siguidornan di Hesus lo biba riba Tera y e Reino di Dios lo goberna riba nan.—Salmo 37:29.

      3. Dicon e Reino di Dios ta mihor cu gobernacion humano?

      Hasta ora un gobernante humano kier haci bon, su poder ta limita y e no por haci tur loke e ta desea. Ademas, e gobernantenan cu bin despues di dje, kisas ta egoista y no kier yuda e pueblo. Pero, niun persona lo no reemplasa Hesus como Gobernante di e Reino di Dios. Dios a “lanta un reino cu nunca lo ser destrui.” (Daniel 2:44) Hesus lo goberna henter Tera y e lo no mustra faboritismo, esta, e lo no trata algun hende mihor cu otro. E ta un gobernante amoroso, bondadoso y husto y lo e siña hende pa trata otro mescos, esta, cu amor, bondad y husticia.—Lesa Isaias 11:9.

      KICO MAS NOS POR SIÑA?

      Laga nos wak dicon e Reino di Dios ta mihor cu cualkier gobernacion humano.

      Hesucristo ta goberna Tera for di su trono den cielo. E personanan cu lo goberna hunto cu ne ta sinta patras dje. Jehova ta briya patras di nan.

      4. Un gobierno poderoso lo goberna henter Tera

      Hesucristo tin mas autoridad pa goberna cu cualkier gobernante den historia. Lesa Mateo 28:18. Despues, analisa e siguiente pregunta:

      • Kico ta e diferencia entre Hesus su autoridad y esun di gobernante humano?

      Ta masha normal cu un gobierno ta bay y un otro ta bin. Ademas, cada gobierno ta goberna un parti di mundo. Awor, kico di e Reino di Dios? Lesa Daniel 7:14. Despues, analisa e siguiente preguntanan:

      • Dicon ta bon cu e Reino di Dios “lo no ser destrui”?

      • Dicon ta bon cu lo e goberna henter Tera?

      5. E Reino di Dios mester reemplasa gobierno humano

      Dicon e Reino di Dios mester reemplasa gobernacion humano? Pasa e VIDEO. Despues, analisa e siguiente pregunta:

      VIDEO: Kiko e Reino di Dios Ta?—Fragmento (1:41)

      • Kico ta e problemanan cu gobiernonan humano a causa?

      Lesa Eclesiastes 8:9. Despues, analisa e siguiente preguntanan:

      • Abo ta pensa cu e Reino di Dios mester reemplasa gobernacion humano? Dicon bo ta pensa esey?

      6. E gobernantenan di e Reino di Dios ta compronde con nos ta sinti

      Como cu nos Rey Hesus a biba como hende riba Tera, e por “tene compasion cu nos debilidadnan.” (Hebreonan 4:15) Jehova a scoge 144.000 homber y muher fiel pa goberna hunto cu Hesus. Nan ta bin “for di tur tribu, idioma, pueblo y nacion.”—Revelacion 5:9.

      • Awor cu bo sa cu Hesus y tur esnan cu lo goberna hunto cu ne a biba como hende riba Tera, con esey ta laga bo sinti? Dicon?

      Varios homber y muher ungi di diferente epoca, cultura y nacion.

      Jehova a scoge homber y muher di diferente cultura y nacionalidad pa goberna hunto cu Hesus

      7. E leynan di e Reino di Dios ta mihor cu e leynan di gobierno humano

      Por lo general, gobierno ta traha ley pa yuda y proteha su pueblo. E Reino di Dios tambe tin ley pa hende cu lo biba bou di su gobernacion. Lesa 1 Corintionan 6:9-11. Despues, analisa e siguiente preguntanan:

      • Con bo ta kere cu mundo lo ta ora tur hende ta obedece e leynan di Dios?a

      • Bo ta kere ta bon cu Jehova ta verwacht pa hende cu ta biba bou di su Reino obedece su leynan? Dicon bo ta pensa asina?

      • Kico ta mustra cu hende cu no ta obedece e leynan aki por cambia?—Wak versiculo 11.

      Un polis ta dirigi trafico riba un caminda druk. Hende di diferente edad ta crusa caya.

      Un gobierno ta traha ley pa proteha y cuida su pueblo. E leynan cu e Reino di Dios tin pa proteha y cuida hende cu ta bou di su gobernacion ta mihor cu e leynan di gobierno humano

      LOKE HENDE SA BISA: “E Reino di Dios ta den nos curason.”

      • Kico lo bo contest’e?

      RESUMEN

      E Reino di Dios ta un gobierno real den cielo cu lo goberna henter Tera.

      Repaso

      • Ken ta e gobernantenan di e Reino di Dios?

      • Dicon e Reino di Dios ta mihor cu cualkier gobierno riba Tera?

      • Kico Jehova ta spera di hende cu lo biba bou di su gobernacion?

      Meta

      MAS INFORMACION INTERESANTE

      Unda Hesus a bisa cu e Reino di Dios ta?

      “E Reino di Dios Ta Algo den Bo Curason?” (articulo riba jw.org)

      Dicon testigonan di Jehova ta pensa cu ta mas importante pa nan keda leal na e Reino di Dios cu na gobierno humano?

      Nan Tabata Leal na e Reino di Dios (1:43)

      Wak kico Bijbel ta bisa tocante e 144.000 personanan cu Jehova a scoge pa goberna hunto cu Hesus.

      “Ken Ta Bay Cielo?” (articulo riba jw.org)

      Kico a convence un señora cu tabata den prizon cu ta Dios so por trece husticia na mundo?

      “Mi A Haya Sa Ken Lo Caba cu Inhusticia” (¡Despertad! di november 2011)

      a Parti 3 lo trata algun di e leynan aki.

  • E Reino di Dios Ya Ta Gobernando!
    Bo Por Disfruta di Bida pa Semper!—Curso di Bijbel Interactivo
    • Les 32. Hesucristo como Rey den cielo tin un septer den su man y ta goberna Tera.

      LES 32

      E Reino di Dios Ya Ta Gobernando!

      E Reino di Dios a cuminsa goberna den cielo na aña 1914. E aña ey mes, e ultimo dianan di gobernacion humano a cuminsa. Con nos por sa esey? Laga nos wak kico Bijbel a profetisa. Ademas, nos lo wak con situacion na mundo y comportacion di hende ta desde 1914.

      1. Kico Bijbel a profetisa?

      E buki di Bijbel Daniel ta mustra cu e Reino di Dios a cuminsa goberna na final di un periodo cu Bijbel ta yama “shete tempo.” (Daniel 4:16, 17) Varios siglo despues, Hesus a referi na e periodo ey como “e tempo stipula di e nacionnan.” Ademas, e tempo ey, Hesus a bisa cu ainda e periodo aki no a termina. (Lucas 21:24) Manera nos lo mira, e periodo di shete tempo ey a termina na 1914.

      2. Desde 1914, kico ta pasando na mundo y con hende ta comporta nan mes?

      E discipelnan di Hesus a puntra Hesus: “Kico lo ta e señal di bo presencia y di conclusion di e era aki?” (Mateo 24:3) Como contesta, Hesus a papia di varios suceso cu lo tuma luga despues cu e cuminsa goberna den cielo como Rey di e Reino di Dios. Por ehempel, Hesus a menciona guera, scarsedad di cuminda y temblor. (Lesa Mateo 24:7.) Bijbel a bisa tambe cu e manera cu hende ta comporta nan mes den “e ultimo dianan” lo haci bida “dificil.” (2 Timoteo 3:1-5) Desde 1914, e cosnan aki ta mas bisto cu nunca.

      3. Dicon situacion na mundo a bira asina malo desde cu e Reino di Dios a cuminsa goberna?

      Poco despues cu Hesus a bira Rey di e Reino di Dios, el a bringa contra Satanas y e demoñonan. Satanas a perde e guera ey. Bijbel ta bisa cu Satanas “a ser benta abou riba Tera y su angelnan a ser benta abou hunto cu ne.” (Revelacion 12:9, 10, 12) Satanas ta hopi rabia pasobra e sa cu lo e ser destrui. Pesey e ta causa dolor y sufrimento riba henter Tera. Esaki ta yuda nos compronde dicon tin asina tanto maldad riba mundo. E Reino di Dios lo caba cu tur maldad y resolve tur e problemanan cu tin na mundo.

      KICO MAS NOS POR SIÑA?

      Laga nos wak dicon nos por bisa cu e Reino di Dios a cuminsa goberna na 1914 y con nos por demostra cu nos ta kere cu e Reino di Dios ta gobernando.

      4. Profecia di Bijbel ta mustra cu e Reino di Dios a cuminsa goberna na 1914

      Pasa e VIDEO.

      VIDEO: E Reino di Dios A Kuminsá Goberná na 1914 (5:02)

      Dios a laga Rey Nabucodonosor di Babilonia di antiguedad haya un soño cu a mustr’e kico lo pasa den futuro. Den Bijbel, nos por lesa tocante e soño aki y tocante e splicacion cu Daniel a duna di e soño aki. Ta bisto cu e soño aki tabata tocante e gobernacion di Nabucodonosor y e Reino di Dios.—Lesa Daniel 4:17.a

      Lesa Daniel 4:20-26. Despues, uza e tabel pa contesta e siguiente preguntanan:

      • (A) Kico Nabucodonosor a mira den su soño?—Wak versiculo 20 y 21.

      • (B) Kico lo a pasa cu e palo?—Wak versiculo 23.

      • (C) Kico lo a sosode ora “shete tempo” pasa?—Wak versiculo 26.

      Ki Relacion Tin Entre e Soño Tocante e Palo y e Reino di Dios?

      E PROFECIA (Daniel 4:20-36)

      Gobernacion

      (A) Un palo masha grandi

      Un palo masha halto.

      Gobernacion a ser interumpi

      (B) “Kap e palo basha abou” y laga “shete tempo” pasa

      Un stam di palo cu banchi di hero y di koper.

      Gobernacion a ser reestableci

      (C) Lo bo bolbe sinta riba bo trono

      Un palo masha halto.

      Prome cumplimento:

      • (D) Ken e palo a representa?—Wak versiculo 22.

      • (E) Na ki tempo Nabucodonosor a stop di goberna?—Lesa Daniel 4:29-33.

      • (F) Kico a pasa cu Nabucodonosor despues di “shete tempo”? —Lesa Daniel 4:34-36.

      PROME CUMPLIMENTO

      Gobernacion

      (D) Nabucodonosor, Rey di Babilonia

      Rey Nabucodonosor ta para yen di orguyo.

      Gobernacion a ser interumpi

      (E) Despues di aña 606 prome cu Cristo, Nabucodonosor a bira loco y no por a goberna mas pa shete aña literal

      Nabucodonosor ta riba suela y ta come yerba manera un bestia.

      Gobernacion a ser reestableci

      (F) Nabucodonosor a haya su sano huicio bek y a bolbe cuminsa goberna

      Rey Nabucodonosor ta wak cielo cu su mannan na laira.

      Di dos cumplimento:

      • (G) Ken e palo a representa?—Lesa 1 Cronicanan 29:23.

      • (H) Na ki tempo e reynan di Israel a stop di goberna? Con nos por sa cu e reynan aki no tabata goberna tempo cu Hesus tabata riba Tera?—Lesa Lucas 21:24.

      • (I) Na ki tempo y na unda e gobernacion a ser reestableci?

      DI DOS CUMPLIMENTO

      Gobernacion

      (G) E reynan di Israel cu a representa Dios su gobernacion

      Varios rey di Israel sinta riba trono un tras di otro. Rayo di luz ta briya riba nan.

      Gobernacion a ser interumpi

      (H) Jerusalem a ser destrui. E gobernacion di e reynan di Israel a ser interumpi pa 2.520 aña

      Candela a destrui antiguo Jerusalem na aña 607 prome cu Cristo. Despues, 2.520 aña a pasa.

      Gobernacion a ser reestableci

      (I) Hesus a cuminsa goberna den cielo como Rey di e Reino di Dios

      Hesus ta goberna Tera for di su trono den cielo na 1914. Rayo di luz ta briya for di caminda Hesus ta sinta riba trono.

      Con largo shete tempo a dura?

      Tin parti di Bijbel cu por yuda nos compronde otro parti di Bijbel. Por ehempel, e buki di Bijbel Revelacion ta bisa cu tres tempo y mey ta 1.260 dia. (Revelacion 12:6, 14) Shete tempo ta dos biaha e number ey, of 2.520 dia. Tin biaha, Bijbel ta uza un dia pa referi na un aña. (Ezekiel 4:6) Pues, e shete tempo den e buki di Daniel ta 2.520 aña.

      5. Mundo a cambia desde 1914

      Pasa e VIDEO.

      VIDEO: Mundu A Kambia Desde 1914 (1:10)

      Hesus a bisa con situacion na mundo lo ta despues cu e bira Rey. Lesa Lucas 21:9-11. Despues, analisa e siguiente pregunta:

      • Cua di e cosnan cu e texto aki ta menciona bo a mira of bo a tende di dje?

      Apostel Pablo a bisa con hende lo ta den e ultimo dianan. Lesa 2 Timoteo 3:1-5. Despues, analisa e siguiente pregunta:

      • Bo ta mira cu hende ta comporta nan mes di e manera aki?

      Collage: Escena cu ta mustra con mundo ta den e ultimo dianan. 1. Un lider militar ta para na un speaker stand y ta grita cu su mannan na laira. 2. Ruina di algun edificio despues di un temblor. 3. Algun avion militar. 4. Hende cu tapaboca bisti ta cana pafo. 5. Twin Tower na New York ta na candela despues di un atake terorista. 6. Un homber ta uza droga. 7. Un esposo ta grita y ta maltrata su casa. 8. Varios droga y boter di alcohol. 9. Dos hende muher bisti cu paña y joya cu ta na moda ta saca potret hunto cu otro. 10. Un DJ ta toca na un concierto. 11. Un homber cu ta welga ta bay tira un bom di gasolin.

      6. Con bo por demostra cu bo ta kere cu e Reino di Dios ta gobernando?

      Lesa Mateo 24:3, 14. Despues, analisa e siguiente preguntanan:

      • Ki trabou importante ta mustra cu e Reino di Dios ta gobernando?

      • Con abo por yuda den e trabou importante aki?

      E Reino di Dios ta gobernando awor, y e dia pa e cuminsa goberna henter Tera ta yegando cerca. Lesa Hebreonan 10:24, 25. Despues, analisa e siguiente pregunta:

      • Kico cada un di nos mester haci segun cu nos “ta mira e dia ta yega cerca”?

      Collage: 1. Un studiante di Bijbel ta na un reunion di testigonan di Jehova. 2. E mesun studiante di Bijbel ey ta predica na un hende cu e conoce.

      Si bo a haya sa di algo cu lo por yuda otro hende y cu lo por scapa nan bida, kico lo bo haci?

      SI UN HENDE PUNTRA: “Dicon testigonan di Jehova ta bisa cu 1914 ta un aña asina importante?”

      • Kico lo bo bisa?

      RESUMEN

      Profecia di Bijbel y loke ta pasa na mundo ta mustra cu e Reino di Dios ta gobernando awor. Nos ta demostra cu nos ta kere esey ora nos ta predica tocante e Reino di Dios y ta asisti na nos reunionnan.

      Repaso

      • Kico a sosode ora e shete tempo cu e buki di Bijbel Daniel a profetisa a pasa?

      • Kico ta convence abo cu e Reino di Dios a cuminsa goberna na 1914?

      • Con bo por demostra cu bo ta kere cu e Reino di Dios ta gobernando awor?

      Meta

      MAS INFORMACION INTERESANTE

      Wak kico algun historiador y otro hende a bisa tocante e cambionan na mundo desde 1914.

      “E Tempo Cu Norma di Hende A Cambia Drasticamente” (Despertad! di april 2007)

      Lesa con un homber a cambia su bida ora el a siña tocante e profecia na Mateo 24:14.

      “Mi Tabata Stima Baseball Mas cu Tur Cos!” (E Toren di Vigilancia Num. 3 2017)

      Con nos por sa cu e profecia na Daniel capitulo 4 ta tocante e Reino di Dios?

      “Na Ki Tempo e Reino di Dios A Cuminsa Goberna? (Parti 1)” (E Toren di Vigilancia di 1 di october 2014)

      Kico ta mustra cu e periodo di “shete tempo” menciona den Daniel capitulo 4 a termina na 1914?

      “Na Ki Tempo e Reino di Dios A Cuminsa Goberna? (Parti 2)” (E Toren di Vigilancia di 1 di november 2014)

      a Wak e dos ultimo articulonan den e seccion Mas Informacion Interesante di e les aki.

  • Kico e Reino di Dios Lo Logra?
    Bo Por Disfruta di Bida pa Semper!—Curso di Bijbel Interactivo
    • Les 33. Hende cu ta biba den Paradijs aki riba Tera.

      LES 33

      Kico e Reino di Dios Lo Logra?

      E Reino di Dios ta gobernando den cielo caba. Pronto lo e trece cambio grandi riba Tera. Laga nos trata algun cos cu lo bo por disfruta di dje bou di e Reino di Dios.

      1. Con e Reino di Dios lo trece paz y husticia na Tera?

      Como Rey di e Reino di Dios, Hesus lo destrui tur hende malbado den e guera di Armagedon. (Revelacion 16:14, 16) Na e tempo ey, e siguiente promesa di Bijbel lo cumpli completamente: “Djis aki, lo no tin hende malbado mas.” (Salmo 37:10) Mediante e Reino di Dios, Hesus lo haci sigur cu lo tin paz y husticia riba henter Tera.—Lesa Isaias 11:4.

      2. Con bida lo ta ora Dios su boluntad cumpli riba Tera?

      Bou di gobernacion di e Reino di Dios, “hende husto lo hereda Tera, y nan lo biba riba dje pa semper.” (Salmo 37:29) Imagina bo con bida lo ta den un mundo asina. Tur hende riba Tera lo ta husto, y nan lo stima Jehova y stima otro. Niun hende lo no bira malo y tur hende lo biba pa semper.

      3. Kico e Reino di Dios lo logra despues cu destrui tur hende malbado?

      Hesus lo goberna como Rey pa 1.000 aña despues cu hende malbado ser destrui. Durante e tempo ey, Hesus y e 144.000 personanan cu lo goberna hunto cu ne lo yuda hende riba Tera bira perfecto. Na final di e periodo di mil aña, henter Tera lo ta un bunita paradijs y tur hende lo ta feliz pasobra nan ta obedece e leynan di Jehova. Despues, Hesus lo entrega e Reino bek na su Tata, Jehova. Jehova su “nomber [lo ser] santifica” manera nunca prome. (Mateo 6:9, 10) Na e tempo ey, lo ta bisto cu Jehova ta un bon Gobernante y cu e ta cuida hende cu ta bou di su gobernacion. Despues, Jehova lo destrui Satanas, e demoñonan y cualkier otro persona cu kier rebeldia contra Su gobernacion. (Revelacion 20:7-10) Tur loke e Reino di Dios logra lo dura pa semper.

      KICO MAS NOS POR SIÑA?

      Laga nos wak dicon nos por tin sigur cu Dios lo uza su Reino pa cumpli cu tur loke Bijbel ta priminti pa futuro.

      4. E Reino di Dios lo caba cu gobernacion humano

      Bijbel ta bisa: “Hende ta domina hende, y esey ta causa sufrimento.” (Eclesiastes 8:9) Jehova lo uza su Reino pa caba cu tur inhusticia cu gobernacion humano a causa.

      Lesa Daniel 2:44 y 2 Tesalonicensenan 1:6-8. Despues, analisa e siguiente preguntanan:

      • Kico Jehova y su Yiu, Hesus, lo haci cu gobierno humano y e hendenan cu ta apoya e gobiernonan ey?

      • Di loke bo a siña tocante Jehova y Hesus, dicon bo por ta sigur cu loke nan lo haci ta husto?

      Hesus ta Rey den cielo y ta goberna Tera transforma den un paradijs.

      5. Hesus ta e mihor Rey cu por tin

      Como Rey di e Reino di Dios, Hesus lo yuda hende cu ta biba riba Tera na varios manera. Pasa e VIDEO pa wak con Hesus a demostra cu e kier yuda hende y cu Dios a dun’e poder pa haci esey.

      VIDEO: Hesus A Demostrá Kiko e Reino di Dios Lo Hasi (1:13)

      E milagernan cu Hesus a haci tempo cu e tabata riba Tera ta mustra kico e Reino di Dios lo haci den futuro. Cua di e siguiente bendicionnan bo tin mas gana di mira cumpli? Pa siña mas tocante e bendicionnan ey, lesa e textonan cu tin nan tras.

      TEMPO CU HESUS TABATA RIBA TERA, ...

      FOR DI CIELO, HESUS LO ...

      • e tabatin control riba forsa di naturaleza.—Marco 4:36-41.

      • drecha tur daño cu a ser haci riba Tera.—Isaias 35:1, 2.

      • milagrosamente el a duna miles di hende di come.—Mateo 14:17-21.

      • caba cu hamber rond mundo.—Salmo 72:16.

      • el a cura hopi hende malo.—Lucas 18:35-43.

      • percura pa tur hende tin salud perfecto.—Isaias 33:24.

      • el a lanta hende for di morto.—Lucas 8:49-55.

      • resucita hende morto y caba cu morto.—Revelacion 21:3, 4.

      6. E Reino di Dios lo zorg pa nos por tin un futuro maraviyoso

      Pa medio di e Reino di Dios, Jehova lo cumpli cu e proposito cu e tabatin for di principio pa hende. Nan lo biba pa semper den Paradijs riba Tera. Pasa e VIDEO pa wak con Jehova mediante su Yiu, Hesus, lo cumpli cu su proposito.

      VIDEO: E Futuro Maravioso Ku Ta Spera Humanidat (4:38)

      Lesa Salmo 145:16. Despues, analisa e siguiente pregunta:

      • Con bo ta sinti bo awor cu bo sa cu Jehova lo “satisface deseo di tur ser bibo”?

      LOKE HENDE SA BISA: “Si nos tur traha hunto, nos por soluciona e problemanan di mundo.”

      • Menciona algun problema cu e Reino di Dios si por soluciona, pero cu gobernacion humano no por soluciona.

      RESUMEN

      E Reino di Dios lo cumpli cu Dios su boluntad. E Reino di Dios lo haci henter Tera un paradijs caminda hende husto lo adora Jehova pa semper.

      Repaso

      • Con e Reino di Dios lo santifica of haci Jehova su nomber limpi?

      • Dicon nos por tin sigur cu e Reino di Dios lo cumpli cu e promesanan cu tin den Bijbel?

      • Di tur e bendicionnan cu e Reino di Dios lo trece, cua di nan bo tin mas gana di mira cumpli?

      Meta

      MAS INFORMACION INTERESANTE

      Lesa e articulo aki pa haya sa kico Armagedon ta.

      “Kico e Guera di Armagedon Ta?” (articulo riba jw.org)

      Haya sa kico lo sosode durante e tempo cu Hesusa yama “tribulacion grandi.”—Mateo 24:21.

      “Kico e Tribulacion Grandi Ta?” (articulo riba jw.org)

      Wak con un famia ta imagina nan mes hunto den Paradijs.

      Imaginá Bo Mes den Paradeis (1:50)

      Pa wak con un homber cu tabata contra e sistema politico di su pais a haya e solucion cu e tabata busca, lesa e articulo “Mi Tabatin Hopi Pregunta.”

      “Bijbel Ta Cambia Bida di Hende” (La Atalaya di 1 di januari 2012)