LES 29

Kico Ta Pasa cu Nos ora Nos Muri?

Edicion Imprimi

Bo a yega di perde un ser keri? Na un momento dificil asina, kisas bo ta puntra bo mes: Kico ta pasa cu nos ora nos muri? Nos lo por mira nos sernan keri atrobe? E contestanan cu Bijbel ta duna ta consola nos. Nos lo wak e contestanan ey den e les aki y esun siguiente.

1. Kico ta pasa cu nos ora nos muri?

Hesus a compara morto cu un soño profundo. Dicon? Wel, un persona cu ta den un soño profundo no sa kico ta pasa rond di dje. Di mes manera, ora un hende muri, e no ta consciente di nada. Pues, e no ta sinti dolor ni e no ta sufri mas. Bijbel ta bisa: “E mortonan no ta consciente di absolutamente nada.”—Lesa Eclesiastes 9:5.

2. Dicon ta bon pa nos sa e berdad tocante morto?

Hopi hende tin miedo di muri, y tin di nan hasta tin miedo di hende morto. Sinembargo, loke Bijbel ta bisa tocante morto por consola bo. Hesus a bisa: “E berdad lo haci boso liber.” (Juan 8:32) Algun religion ta siña hende cu ora nos muri, di un manera of otro, un parti di nos ta sigui biba. Pero esey no ta loke Bijbel ta siña. Pues, no tin sufrimento despues di morto. Ademas, como cu hende morto no sa nada, nan no por haci nos daño. Pesey, nos no mester haci oracion pa hende morto ni adora nan ni sinti cu nos tin cu complace nan pa nan no rabia cu nos.

Algun hende ta bisa cu nan por papia cu hende morto. Pero esey ta imposibel. Manera nos a caba di siña, hende morto no ta consciente di nada. Hende cu ta kere cu nan ta papiando cu nan sernan keri cu a muri kisas ta papiando cu demoño ya cu e demoñonan por pretende di ta nan ser keri cu a muri. Pues, ora nos sa e berdad tocante morto, esey por proteha nos contra e demoñonan. Jehova ta spierta nos pa no purba papia cu hende morto pasobra e sa cu contacto cu demoño lo haci nos daño.—Lesa Deuteronomio 18:10-12.

KICO MAS NOS POR SIÑA?

Wak kico mas Bijbel ta siña nos tocante morto. Ademas, wak con bo por fortalece bo fe den un Dios amoroso cu no ta castiga hende cu a muri.

Un homber ta sinta cu su dos yiunan chikito riba un banki na e entiero di su casa y mama di su yiunan. Famia y amigo ta purba di consola y apoya nan.

3. Haya sa loke realmente ta pasa cu nos ora nos muri

Rond mundo, hende tin diferente opinion tocante kico ta pasa cu nos ora nos muri. Pero no ta tur loke hende ta bisa ta berdad.

Caminda abo ta biba, kico hende ta pensa ta pasa cu nos ora nos muri?

Pa haya sa loke Bijbel ta siña, pasa e VIDEO.

VIDEO: Kiko Ta Pasa ku Nos ora Nos Muri?—Fragmento (1:19)

Escena di e video “Kiko Ta Pasa ku Nos ora Nos Muri?—Fragmento.” Collage: 1. Curpa di un hende morto riba un cama di hospital. 2. Un homber ta pega soño meymey di dos hende mientras e ta sinta den trein.

Lesa Eclesiastes 3:20. Despues, analisa e siguiente preguntanan:

Segun e versiculo aki, kico ta pasa cu un hende ora e muri?
E texto ta bisa cu ora un hende muri, e tin un spirito of alma cu ta sigui biba un otro caminda?

Bijbel ta papia tocante e morto di Lazaro, kende tabata un bon amigo di Hesus. Segun cu bo ta lesa Juan 11:11-14, tuma nota con Hesus a describi loke a pasa cu Lazaro. Despues, analisa e siguiente preguntanan:

Cu kico Hesus a compara morto?
Con e comparacion aki ta yuda nos compronde loke ta pasa cu nos ora nos muri?
Kico abo ta pensa di loke Bijbel ta bisa tocante morto?

4. Ora nos sa e berdad tocante morto, ki bon efecto esey por tin den nos bida?

Ora nos sa e berdad tocante morto, nos lo no tin miedo di hende morto mas. Lesa Eclesiastes 9:10. Despues, analisa e siguiente pregunta:

Hende morto por haci nos daño?

Ora nos haya sa loke Bijbel ta siña, nos lo no kere e mentira cu nos mester complace of adora hende cu a muri. Lesa Isaias 8:19 y Revelacion 4:11. Despues, analisa e siguiente pregunta:

Con bo ta kere Jehova ta sinti ora un persona ta adora of busca yudansa cerca hende cu a muri?

Collage: Custumber cu tin di haber cu dunamento di honor na hende morto. 1. Un homber ta haci oracion na rudia dilanti di un graf cu tin ofrenda di cuminda. 2. Tres homber di un tribu ta balia den nan trahe. 3. Un grupo di hende cu mascarada di carpachi ta carga cabes di skelet grandi riba Dia di Tur Difunto. — E berdad tocante morto ta libra nos for di varios custumber cu ta desagrada Jehova

5. E berdad tocante morto ta consola nos

Hopi hende a siña cu ora nan muri, nan lo haya castigo pa e cosnan malo cu nan a haci. Pero ta un consuelo pa sa cu ningun hende no ta sufri despues di morto, ni hende cu a haci hopi cos malo. Lesa Romanonan 6:7. Despues, analisa e siguiente pregunta:

Bijbel ta bisa cu ora un persona muri, Dios no ta consider’e culpabel di su picanan mas. Pues, abo ta pensa cu un hende cu a muri por ta sufriendo pa paga pa su picanan?

Mas mihor nos siña conoce Jehova, mas nos lo realisa cu nunca lo e pone hende morto sufri. Lesa Deuteronomio 32:4 y 1 Juan 4:8. Despues, analisa e siguiente preguntanan:

Un Dios cu tin e cualidadnan cu nos a mira den e versiculonan aki lo tormenta hende cu a muri?
Bo ta haya cu e berdad tocante morto ta consola bo? Dicon bo ta bisa esey?

LOKE HENDE SA BISA: “Mi tin miedo di sufri despues cu mi muri.”